1November 2025 Aj Di Awaaj
Entertainment Desk ਉਸਨੇ ਆਪਣੀ ਅਦਾਕਾਰੀ ਦੀ ਪਹਿਲੀ ਸ਼ੁਰੂਆਤ ਮਾਡਰਨ ਸਕੂਲ ਵਸੰਤ ਵਿਹਾਰ ਦੇ ਮੰਚ ਤੋਂ ਕੀਤੀ। ਉਸ ਵੇਲੇ ਦਿੱਲੀ ਦੀ ਹਵਾ ਵਿੱਚ ਨਾ ਕੈਮਰਿਆਂ ਦੀ ਚਮਕ ਸੀ, ਨਾ ਸੈਲਫੀਆਂ ਦਾ ਸ਼ੌਕ, ਨਾ ਹੀ ਪ੍ਰਸਿੱਧੀ ਦੀ ਦੌੜ। ਸਿਰਫ਼ ਇੱਕ ਮੰਚ ਸੀ, ਕੁਝ ਸੰਵਾਦ ਸਨ, ਤੇ ਇੱਕ ਬੇਚੈਨ ਰੂਹ ਜੋ ਕਹਿੰਦੀ ਸੀ— “ਜੇ ਮੈਂ ਇਹ ਕਰ ਸਕਦਾ ਹਾਂ, ਤਾਂ ਤੁਸੀਂ ਵੀ ਕਰ ਸਕਦੇ ਹੋ।”
ਸ਼ਾਹਰੁਖ—ਇੱਕ ਅਜਿਹਾ ਨਾਮ ਜੋ ਨਾ ਕਿਸੇ ਧਰਮ ਦੀ ਹੱਦਾਂ ਵਿੱਚ ਬੰਨ੍ਹਿਆ ਹੈ, ਨਾ ਕਿਸੇ ਸ਼ਹਿਰ ਨਾਲ ਸੀਮਿਤ, ਤੇ ਨਾ ਹੀ ਕਿਸੇ ਇਕ ਸੁਪਨੇ ਵਿੱਚ ਸਮਾਇਆ ਹੋਇਆ। ਉਸਦੇ ਪਿਤਾ ਇੱਕ ਆਜ਼ਾਦੀ ਸੈਨਾਨੀ ਸਨ, ਮਾਂ ਪਿਆਰ ਤੇ ਮਮਤਾ ਦੀ ਮੂਰਤ ਸੀ, ਤੇ ਪੁੱਤਰ ਇੱਕ ਐਸਾ ਕਲਾਕਾਰ ਬਣਿਆ ਜਿਸਨੇ ਭਾਰਤ ਨੂੰ ਸਿਰਫ਼ ਸ਼ੀਸ਼ੇ ਵਿੱਚ ਨਹੀਂ, ਸਗੋਂ ਅਸਮਾਨ ਦੀ ਉਚਾਈ ਤੋਂ ਵੇਖਿਆ।
ਰਾਜ ਕਪੂਰ ਦਾ ਸੁਪਨਾ ਹੈ ਸ਼ਾਹਰੁਖ ਖਾਨ
ਰਾਜ ਕਪੂਰ ਨੇ ਕਦੇ ਗਾਇਆ ਸੀ — “ਮੇਰਾ ਜੂਤਾ ਹੈ ਜਪਾਨੀ, ਮੇਰੀ ਪੈਂਟ ਹੈ ਇੰਗਲਿਸਤਾਨੀ, ਸਿਰ ’ਤੇ ਲਾਲ ਟੋਪੀ ਰੂਸੀ…”
ਉਸ ਗੀਤ ਦੀਆਂ ਲਾਈਨਾਂ ਵਿੱਚ ਇਕ ਅਜਿਹੀ ਭਾਵਨਾ ਲੁਕੀ ਸੀ ਜੋ ਆਉਣ ਵਾਲੇ ਯੁੱਗ ਦਾ ਚਿਹਰਾ ਬਣੀ — “ਫਿਰ ਵੀ ਦਿਲ ਹੈ ਹਿੰਦੁਸਤਾਨੀ”।
ਕਿਹਾ ਜਾ ਸਕਦਾ ਹੈ ਕਿ ਰਾਜ ਕਪੂਰ ਜਿਸ ਹਿੰਦੁਸਤਾਨੀ ਦਾ ਸੁਪਨਾ ਦੇਖਦਾ ਸੀ, ਉਹ ਸੁਪਨਾ ਸ਼ਾਹਰੁਖ ਖਾਨ ਦੇ ਰੂਪ ਵਿੱਚ ਸਾਕਾਰ ਹੋਇਆ।
ਉਹ ਕੱਦ ਵਿੱਚ ਔਸਤ ਹੈ ਪਰ ਉਚਾਈਆਂ ਨੂੰ ਛੂਹ ਲੈਂਦਾ ਹੈ। ਦਿੱਖ ਸਧਾਰਨ ਹੈ ਪਰ ਚਿਹਰੇ ’ਤੇ ਜਾਦੂ ਵੱਸਦਾ ਹੈ। ਉਹ ਮੁਸਲਮਾਨ ਹੈ ਪਰ ਇਕ ਹਿੰਦੂ ਪਰਿਵਾਰ ਵਿੱਚ ਵਿਆਹਿਆ ਹੋਇਆ ਹੈ। ਉਹ ਨਿਮਰ ਹੈ ਪਰ ਦਿਲ ਅਤੇ ਸੋਚ ਦੋਵੇਂ ਵਿਸ਼ਾਲ ਹਨ।
ਗੌਰੀ — ਉਸਦੀ ਪ੍ਰਾਰਥਨਾ, ਉਸਦੀ ਪ੍ਰੇਮ ਕਹਾਣੀ। ਦਿੱਲੀ ਦੀ ਇਕ ਛਿੱਬਰ ਕੁੜੀ, ਜਿਸਨੇ ਆਪਣੇ ਖਾਨ ਨਾਲ ਪਿਆਰ ਦਾ ਸਭ ਤੋਂ ਖੂਬਸੂਰਤ ਪ੍ਰਤੀਕ ਬਣਾਇਆ।
ਜਿੱਥੇ ਭਾਰਤ ਦੀਆਂ ਕੰਧਾਂ ਅਕਸਰ ਧਰਮ ਨਾਲ ਵੰਡੀਆਂ ਜਾਂਦੀਆਂ ਹਨ, ਉਥੇ ਉਨ੍ਹਾਂ ਨੇ ਇਕ ਐਸਾ ਘਰ ਬਣਾਇਆ ਜਿੱਥੇ ਆਰਤੀ ਦੀ ਧੁਨ ਤੇ ਅਜ਼ਾਨ ਦੀ ਗੂੰਜ ਇਕੱਠੇ ਸੁਣਾਈ ਦਿੰਦੀ ਹੈ।
ਤਿੰਨ ਬੱਚੇ — ਤਿੰਨ ਤਾਰੇ, ਤੇ ਇਕ ਵਿਆਹ ਜੋ ਸਮੇਂ ਦੇ ਤੂਫ਼ਾਨਾਂ ਵਿਚ ਵੀ ਪਿਆਰ ਨਾਲ ਮੁਸਕਰਾਉਂਦਾ ਰਿਹਾ।
