ਤਮਿਲਨਾਡੂ 29 July 2026 AJ DI Awaaj
National Desk : ਤਮਿਲਨਾਡੂ ਦੇ ਸਲੇਮ ਜ਼ਿਲ੍ਹੇ ਵਿੱਚ ਇੱਕ ਹੈਰਾਨ ਕਰਨ ਵਾਲਾ ਠੱ*ਗੀ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਇੱਕ ਵਿਅਕਤੀ ਨੇ ਖੁਦ ਨੂੰ ਤਹਿਸੀਲਦਾਰ ਦੱਸ ਕੇ ਕਥਿਤ ਸਰਕਾਰੀ ਯੋਜਨਾ ਦਾ ਝਾਂਸਾ ਦਿੱਤਾ ਅਤੇ ਕਰੀਬ 20 ਔਰਤਾਂ ਨੂੰ ਸਿਰ ਮੁੰਡਵਾਉਣ ਲਈ ਰਾਜ਼ੀ ਕਰ ਲਿਆ। ਇਨ੍ਹਾਂ ਵਿੱਚੋਂ ਤਿੰਨ ਬਜ਼ੁਰਗ ਔਰਤਾਂ ਨੇ ₹15 ਹਜ਼ਾਰ ਦੀ ਮਦਦ ਮਿਲਣ ਦੀ ਉਮੀਦ ਵਿੱਚ ਆਪਣਾ ਸਿਰ ਵੀ ਮੁੰਡਵਾ ਲਿਆ।
ਪੁਲਿਸ ਮੁਤਾਬਕ 39 ਸਾਲਾ ਦੋਸ਼ੀ ਨੇ ਇੱਕ ਔਰਤ ਨੂੰ ਫੋਨ ਕਰਕੇ ਦਾਅਵਾ ਕੀਤਾ ਕਿ ਇੱਕ ਖਤ*ਰਨਾਕ ਬਿਮਾਰੀ ਵਾਲਾਂ ਰਾਹੀਂ ਫੈਲ ਰਹੀ ਹੈ ਅਤੇ ਸਰਕਾਰ ਨੇ ਸਿਰ ਮੁੰਡਵਾਉਣ ਵਾਲਿਆਂ ਲਈ ਵਿਸ਼ੇਸ਼ ਆਰਥਿਕ ਸਹਾਇਤਾ ਯੋਜਨਾ ਸ਼ੁਰੂ ਕੀਤੀ ਹੈ। ਉਸ ਨੇ ਔਰਤਾਂ ਨੂੰ ₹15 ਹਜ਼ਾਰ, ਮਰਦਾਂ ਨੂੰ ₹6 ਹਜ਼ਾਰ ਅਤੇ ਕਾਲਜ ਵਿਦਿਆਰਥੀਆਂ ਨੂੰ ₹45 ਹਜ਼ਾਰ ਦੇਣ ਦਾ ਝੂਠਾ ਵਾਅਦਾ ਕੀਤਾ। ਭਰੋਸਾ ਜਮਾਉਣ ਲਈ ਉਸ ਨੇ ਵਟਸਐਪ ‘ਤੇ ਫਰਜ਼ੀ ਤਸਵੀਰਾਂ ਵੀ ਭੇਜੀਆਂ।
ਇਸ ਤੋਂ ਬਾਅਦ ਪਿੰਡ ਦੀਆਂ ਕਈ ਔਰਤਾਂ ਇਸ ਕਥਿਤ ਯੋਜਨਾ ਨਾਲ ਜੁੜ ਗਈਆਂ ਅਤੇ ਤਿੰਨ ਔਰਤਾਂ ਨੇ ਸਥਾਨਕ ਸੈਲੂਨ ਵਿੱਚ ਜਾ ਕੇ ਆਪਣਾ ਸਿਰ ਮੁੰਡਵਾ ਲਿਆ। ਜਦੋਂ ਕਈ ਦਿਨਾਂ ਤੱਕ ਕਿਸੇ ਨੂੰ ਕੋਈ ਰਕਮ ਨਹੀਂ ਮਿਲੀ ਤਾਂ ਸ਼ੱਕ ਪੈਦਾ ਹੋਇਆ। ਤਹਿਸੀਲ ਦਫ਼ਤਰ ਵਿੱਚ ਪੁੱਛਗਿੱਛ ਕਰਨ ‘ਤੇ ਪਤਾ ਲੱਗਾ ਕਿ ਅਜਿਹੀ ਕੋਈ ਸਰਕਾਰੀ ਯੋਜਨਾ ਮੌਜੂਦ ਹੀ ਨਹੀਂ ਹੈ।
ਸ਼ਿਕਾਇਤ ਮਿਲਣ ਤੋਂ ਬਾਅਦ ਪੁਲਿਸ ਨੇ ਜਾਂਚ ਕਰਦਿਆਂ ਅਰਿਆਲੁਰ ਜ਼ਿਲ੍ਹੇ ਦੇ ਰਹਿਣ ਵਾਲੇ 39 ਸਾਲਾ ਸਤੀਸ਼ਕੁਮਾਰ ਨੂੰ ਗ੍ਰਿਫ਼ਤਾਰ ਕਰ ਲਿਆ। ਪੁੱਛਗਿੱਛ ਦੌਰਾਨ ਦੋਸ਼ੀ ਨੇ ਦੱਸਿਆ ਕਿ ਉਹ ਸੋਸ਼ਲ ਮੀਡੀਆ ‘ਤੇ ਵਾਇਰਲ ਹੋਣ ਵਾਲੇ ਪ੍ਰੈਂਕ ਵੀਡੀਓ ਤੋਂ ਪ੍ਰਭਾਵਿਤ ਸੀ ਅਤੇ ਉਸੇ ਤਰ੍ਹਾਂ ਲੋਕਾਂ ਨਾਲ ਮਜ਼ਾਕ ਕਰਨਾ ਚਾਹੁੰਦਾ ਸੀ। ਪੁਲਿਸ ਹੁਣ ਇਹ ਵੀ ਜਾਂਚ ਕਰ ਰਹੀ ਹੈ ਕਿ ਉਸ ਨੇ ਇਸ ਤਰੀਕੇ ਨਾਲ ਹੋਰ ਕਿੰਨੇ ਲੋਕਾਂ ਨੂੰ ਨਿਸ਼ਾਨਾ ਬਣਾਇਆ।
