Chandigarh 04 Sep 2026 AJ DI Awaaj
Chandigarh Desk : ਗੂਗਲ ਨੇ ਐਂਡਰਾਇਡ ਯੂਜ਼ਰਸ ਲਈ ਨਵਾਂ ਅਪਡੇਟ ਜਾਰੀ ਕੀਤਾ ਹੈ, ਜਿਸ ਵਿੱਚ ਰੋਜ਼ਾਨਾ ਦੀ ਜ਼ਿੰਦਗੀ ਨਾਲ ਜੁੜੇ ਕਈ ਕੰਮ ਆਸਾਨ ਬਣਾਉਣ ਵਾਲੇ ਫੀਚਰ ਸ਼ਾਮਲ ਕੀਤੇ ਗਏ ਹਨ। ਸਤੰਬਰ ਐਂਡਰਾਇਡ ਡ੍ਰਾਪ ਤਹਿਤ ਲਿਆਂਦੇ ਗਏ ਇਨ੍ਹਾਂ ਫੀਚਰਾਂ ਵਿੱਚ AI, ਐਕਸੈਸਬਿਲਟੀ ਅਤੇ ਮੈਸੇਜਿੰਗ ’ਤੇ ਖਾਸ ਧਿਆਨ ਦਿੱਤਾ ਗਿਆ ਹੈ।
1. ਜ਼ਰੂਰੀ ਚੀਜ਼ਾਂ ਦੀ ਲੋਕੇਸ਼ਨ ਯਾਦ ਰੱਖੇਗਾ Gemini
ਹੁਣ ਯੂਜ਼ਰ Gemini ਨੂੰ ਦੱਸ ਸਕਣਗੇ ਕਿ ਉਨ੍ਹਾਂ ਨੇ ਪਾਸਪੋਰਟ, ਚਾਬੀਆਂ ਜਾਂ ਕੋਈ ਹੋਰ ਜ਼ਰੂਰੀ ਚੀਜ਼ ਕਿੱਥੇ ਰੱਖੀ ਹੈ। ਇਸ ਨਾਲ ਬਾਅਦ ਵਿੱਚ Gemini ਉਸ ਥਾਂ ਦੀ ਜਾਣਕਾਰੀ ਯਾਦ ਕਰਵਾ ਸਕੇਗਾ। ਲੋੜ ਪੈਣ ’ਤੇ ਚੀਜ਼ ਰੱਖਣ ਵਾਲੀ ਥਾਂ ਦੀ ਫੋਟੋ ਵੀ ਜੋੜੀ ਜਾ ਸਕਦੀ ਹੈ।
2. ਸਫ਼ਰ ਦੌਰਾਨ ਚੱਕਰ ਆਉਣ ਤੋਂ ਮਿਲੇਗੀ ਰਾਹਤ
ਗੂਗਲ ਨੇ Motion Cues ਫੀਚਰ ਪੇਸ਼ ਕੀਤਾ ਹੈ, ਜੋ ਕਾਰ ਵਿੱਚ ਸਫ਼ਰ ਕਰਦੇ ਸਮੇਂ ਮੋਸ਼ਨ ਸਿਕਨੈੱਸ ਨੂੰ ਘਟਾਉਣ ਵਿੱਚ ਮਦਦ ਕਰ ਸਕਦਾ ਹੈ। ਸਕ੍ਰੀਨ ’ਤੇ ਦਿਖਾਈ ਦੇਣ ਵਾਲੇ ਬੁਲਬੁਲੇ ਗੱਡੀ ਦੀ ਹਿਲਜੁਲ ਨਾਲ ਤਾਲਮੇਲ ਬਣਾਉਣ ਦੀ ਕੋਸ਼ਿਸ਼ ਕਰਦੇ ਹਨ।
3. ਘੱਟ ਨਜ਼ਰ ਵਾਲੇ ਲੋਕਾਂ ਲਈ Guided Vision
Guided Vision ਫੀਚਰ Gemini Live ਦੀ ਮਦਦ ਨਾਲ ਕੈਮਰੇ ਸਾਹਮਣੇ ਮੌਜੂਦ ਚੀਜ਼ਾਂ ਬਾਰੇ ਬੋਲ ਕੇ ਜਾਣਕਾਰੀ ਦੇ ਸਕਦਾ ਹੈ। ਇਹ ਛੋਟੇ ਅੱਖਰ ਪੜ੍ਹਨ, ਮੀਨੂ ਸਮਝਣ ਜਾਂ ਆਲੇ-ਦੁਆਲੇ ਦੀਆਂ ਚੀਜ਼ਾਂ ਪਛਾਣਨ ਵਿੱਚ ਘੱਟ ਨਜ਼ਰ ਵਾਲੇ ਯੂਜ਼ਰਸ ਲਈ ਮਦਦਗਾਰ ਹੋ ਸਕਦਾ ਹੈ।
4. Google Messages ’ਚ ਬਣਾਓ ਸਾਂਝੇ ਨੋਟਸ
ਹੁਣ Google Messages ਵਿੱਚ Google Keep ਦੀ ਸਹੂਲਤ ਜੋੜੀ ਗਈ ਹੈ। ਯੂਜ਼ਰ ਚੈਟ ਦੇ ਅੰਦਰ ਹੀ ਸਾਂਝੇ ਨੋਟਸ ਬਣਾ ਅਤੇ ਐਡਿਟ ਕਰ ਸਕਣਗੇ। ਇਸ ਦਾ ਇਸਤੇਮਾਲ ਗ੍ਰੋਸਰੀ ਲਿਸਟ, ਟ੍ਰਿਪ ਪਲਾਨ ਜਾਂ ਹੋਰ ਕੰਮਾਂ ਲਈ ਕੀਤਾ ਜਾ ਸਕਦਾ ਹੈ।
5. ਚੈਟ ਨੂੰ ਦਿਓ ਆਪਣੀ ਪਸੰਦ ਦਾ ਲੁੱਕ
Google Messages ਵਿੱਚ Chat Themes ਫੀਚਰ ਰਾਹੀਂ ਹੁਣ ਯੂਜ਼ਰ ਚੈਟ ਦਾ ਬੈਕਗ੍ਰਾਊਂਡ ਅਤੇ ਰੰਗ ਬਦਲ ਸਕਣਗੇ। ਆਪਣੀ ਫੋਟੋ ਜਾਂ ਵਾਲਪੇਪਰ ਵੀ ਲਗਾਇਆ ਜਾ ਸਕਦਾ ਹੈ, ਜਿਸ ਨਾਲ ਹਰ ਗੱਲਬਾਤ ਨੂੰ ਨਵਾਂ ਲੁੱਕ ਦਿੱਤਾ ਜਾ ਸਕੇਗਾ।
ਗੂਗਲ ਦੇ ਇਹ ਨਵੇਂ ਫੀਚਰ ਵੱਖ-ਵੱਖ ਐਂਡਰਾਇਡ ਵਰਜਨਾਂ ਅਤੇ ਡਿਵਾਈਸਾਂ ਲਈ ਪੜਾਅਵਾਰ ਉਪਲਬਧ ਹੋ ਰਹੇ ਹਨ। ਕੁਝ ਫੀਚਰਾਂ ਲਈ Gemini, Google Messages ਜਾਂ ਹੋਰ ਸੇਵਾਵਾਂ ਦਾ ਸਪੋਰਟ ਲਾਜ਼ਮੀ ਹੋ ਸਕਦਾ ਹੈ।
