ਕਣਪੱਥਾ: 12 ਸਾਲਾ ਵਿਦਿਆਰਥਣ ਨਾਲ ਕਥਿਤ ਬਲਾਤਕਾਰ, ਮੁਲਜ਼ਮ ਫਰਾਰ
ਅੱਜ ਦੀ ਆਵਾਜ਼ | 15 ਅਪ੍ਰੈਲ 2025
ਕਣਪੱਥਾ ਦੇ ਇਕ ਸ਼ਹਿਰੀ ਇਲਾਕੇ ਵਿਚ 12 ਸਾਲਾ ਵਿਦਿਆਰਥਣ ਨਾਲ ਕਥਿਤ ਤੌਰ ‘ਤੇ ਬਲਾ*ਤਕਾਰ ਹੋਣ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਦੋਸ਼ ਲਾਇਆ ਗਿਆ ਹੈ ਕਿ ਘਟਨਾ ਉਸ ਵੇਲੇ ਵਾਪਰੀ ਜਦੋਂ ਲੜਕੀ ਦੇ ਮਾਪੇ ਘਰ ਤੋਂ ਬਾਹਰ ਗਏ ਹੋਏ ਸਨ। ਮੁਲਜ਼ਮ ਨੇ ਛੱਤ ‘ਤੇ ਗਈ ਨਾਬਾਲਿਗ ਨੂੰ ਆਪਣੇ ਕਮਰੇ ਵਿੱਚ ਖਿੱਚ ਕੇ ਮੂੰਹ ਬੰਨ੍ਹ ਕੇ ਜ਼ਬਰਦਸਤੀ ਕੀਤੀ। ਇਹ ਸੱਚਾਈ ਉਸ ਵੇਲੇ ਸਾਹਮਣੇ ਆਈ ਜਦੋਂ ਲੜਕੀ ਨੂੰ ਪੇਟ ਦਰਦ ਹੋਣ ਲੱਗਾ ਅਤੇ ਮਾਂ ਨੇ ਜਾਂਚ ਕਰਵਾਈ, ਜਿਸ ਵਿੱਚ ਲੜਕੀ ਦੇ ਇੱਕ ਮਹੀਨੇ ਦੀ ਗਰਭਵਤੀ ਹੋਣ ਦੀ ਪੁਸ਼ਟੀ ਹੋਈ। ਪਰਿਵਾਰ ਨੇ ਤੁਰੰਤ ਪੁਲਿਸ ਨੂੰ ਸੂਚਿਤ ਕੀਤਾ ਅਤੇ ਮਾਮਲਾ ਦਰਜ ਕਰ ਲਿਆ ਗਿਆ। ਮੁਲਜ਼ਮ ਜੋ ਕਿ ਦੋ ਬੱਚਿਆਂ ਦਾ ਪਿਤਾ ਹੈ, ਪਿਛਲੇ ਤਿੰਨ ਸਾਲਾਂ ਤੋਂ ਕਿਰਾਏ ‘ਤੇ ਉਥੇ ਰਹਿ ਰਿਹਾ ਸੀ। ਘਟਨਾ ਉਜਾਗਰ ਹੋਣ ਤੋਂ ਬਾਅਦ ਉਹ ਘਰ ਛੱਡ ਕੇ ਫਰਾਰ ਹੋ ਗਿਆ। ਲੜਕੀ ਨੇ ਦੱਸਿਆ ਕਿ ਜੇ ਕਿਸੇ ਨੂੰ ਦੱਸਿਆ ਤਾਂ ਪਰਿਵਾਰ ਨੂੰ ਨੁਕਸਾਨ ਪਹੁੰਚਾਉਣ ਦੀ ਧਮਕੀ ਦਿੱਤੀ ਗਈ ਸੀ। ਪੁਲਿਸ ਨੇ ਮਾਮਲੇ ਦੀ ਗੰਭੀਰਤਾ ਨੂੰ ਦੇਖਦੇ ਹੋਏ ਵੱਖ-ਵੱਖ ਧਾਰਾਵਾਂ ਹੇਠ ਕੇਸ ਦਰਜ ਕਰਕੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।
