12 July 2026 Aj Di Awaaj
Lifestyle Desk: ਸੋਸ਼ਲ ਮੀਡੀਆ ਦੇ ਦੌਰ ਵਿੱਚ ਦੋਸਤਾਂ ਦੀ ਗਿਣਤੀ ਭਾਵੇਂ ਸੈਂਕੜਿਆਂ ਵਿੱਚ ਹੋਵੇ, ਪਰ ਅਸਲ ਮੁਸੀਬਤ ਵੇਲੇ ਭਰੋਸਾ ਕਰਨ ਲਈ ਕੁਝ ਹੀ ਲੋਕ ਹੁੰਦੇ ਹਨ। ਇੱਕ ਤਾਜ਼ਾ ਸਰਵੇਖਣ ਮੁਤਾਬਕ, ਅੱਜਕੱਲ੍ਹ ਬਹੁਤ ਸਾਰੇ ਲੋਕ ਸਿਰਫ਼ ਰਸਮੀਅਤ ਜਾਂ ਮਜਬੂਰੀ ਵਜੋਂ ਦੋਸਤੀ ਨਿਭਾ ਰਹੇ ਹਨ।
ਸਰਵੇ ਵਿੱਚ ਸਾਹਮਣੇ ਆਇਆ ਕਿ 67% ਲੋਕ ਅਜਿਹੀਆਂ ਦੋਸਤੀਆਂ ਨਿਭਾ ਰਹੇ ਹਨ, ਜਿਨ੍ਹਾਂ ਵਿੱਚ ਹੁਣ ਨਾ ਆਪਣਾਪਣ ਬਚਿਆ ਹੈ ਅਤੇ ਨਾ ਹੀ ਭਾਵਨਾਤਮਕ ਜੁੜਾਅ। ਇਹ ਦੋਸਤੀਆਂ ਅਕਸਰ ਪੁਰਾਣੇ ਸਕੂਲ, ਕਾਲਜ ਜਾਂ ਦਫ਼ਤਰ ਦੇ ਰਿਸ਼ਤਿਆਂ ਕਰਕੇ ਜਾਰੀ ਰਹਿੰਦੀਆਂ ਹਨ।
ਇਸੇ ਸਰਵੇ ਵਿੱਚ 54% ਲੋਕਾਂ ਨੇ ਮੰਨਿਆ ਕਿ ਉਨ੍ਹਾਂ ਦੀਆਂ ਕਈ ਦੋਸਤੀਆਂ ਸਿਰਫ਼ ਸ਼ਿਕਾਇਤਾਂ, ਚੁਗਲੀਆਂ, ਦਫ਼ਤਰੀ ਤਣਾਅ ਜਾਂ ਹੋਰਾਂ ਦੀ ਬੁਰਾਈ ਤੱਕ ਹੀ ਸੀਮਤ ਹਨ। ਅਜਿਹੇ ਰਿਸ਼ਤਿਆਂ ਵਿੱਚ ਸਕਾਰਾਤਮਕ ਗੱਲਬਾਤ ਜਾਂ ਆਪਸੀ ਵਿਕਾਸ ਦੀ ਘਾਟ ਹੁੰਦੀ ਹੈ।
ਖੋਜਕਾਰਾਂ ਦਾ ਕਹਿਣਾ ਹੈ ਕਿ ਇੱਕ ਵਿਅਕਤੀ ਲਗਭਗ 150 ਸਮਾਜਿਕ ਰਿਸ਼ਤਿਆਂ ਨੂੰ ਹੀ ਪ੍ਰਭਾਵਸ਼ਾਲੀ ਢੰਗ ਨਾਲ ਨਿਭਾ ਸਕਦਾ ਹੈ। ਇਸ ਤੋਂ ਵੱਧ ਲੋਕਾਂ ਨਾਲ ਇੱਕੋ ਜਿਹਾ ਭਰੋਸਾ, ਸਮਾਂ ਅਤੇ ਡੂੰਘਾ ਜੁੜਾਅ ਬਣਾਈ ਰੱਖਣਾ ਵਿਹਾਰਕ ਤੌਰ ‘ਤੇ ਸੰਭਵ ਨਹੀਂ ਹੁੰਦਾ।
ਮਾਹਿਰਾਂ ਅਨੁਸਾਰ, ਜੇ ਦੋਸਤੀ ਦਾ ਆਧਾਰ ਸਿਰਫ਼ ਨਕਾਰਾਤਮਕ ਗੱਲਾਂ, ਸ਼ਿਕਾਇਤਾਂ ਜਾਂ ਕਿਸੇ ਤੀਜੇ ਵਿਅਕਤੀ ਦੀ ਆਲੋਚਨਾ ਹੋਵੇ, ਤਾਂ ਅਜਿਹਾ ਰਿਸ਼ਤਾ ਸਮੇਂ ਦੇ ਨਾਲ ਮਾਨਸਿਕ ਤਣਾਅ ਦਾ ਕਾਰਨ ਬਣ ਸਕਦਾ ਹੈ। ਇਸ ਲਈ ਦੋਸਤਾਂ ਦੀ ਗਿਣਤੀ ਵਧਾਉਣ ਦੀ ਬਜਾਏ ਕੁਝ ਭਰੋਸੇਮੰਦ ਅਤੇ ਸੱਚੇ ਰਿਸ਼ਤੇ ਬਣਾਉਣਾ ਜ਼ਿਆਦਾ ਮਹੱਤਵਪੂਰਨ ਹੈ।
ਮਾਹਿਰਾਂ ਦਾ ਮੰਨਣਾ ਹੈ ਕਿ ਅੱਜ ਦੇ ਸਮੇਂ ਵਿੱਚ ਘੱਟ ਪਰ ਸੱਚੇ ਦੋਸਤ ਮਾਨਸਿਕ ਸਿਹਤ ਅਤੇ ਭਾਵਨਾਤਮਕ ਸੰਤੁਲਨ ਲਈ ਵੱਧ ਲਾਭਦਾਇਕ ਹਨ। ਗੁਣਵੱਤਾ ਭਰੇ ਰਿਸ਼ਤੇ, ਗਿਣਤੀ ਨਾਲੋਂ ਕਈ ਗੁਣਾ ਵੱਧ ਮਹੱਤਵ ਰੱਖਦੇ ਹਨ।
