ਨਵੀਂ ਦਿੱਲੀ: 27 Aug 2026 AJ DI Awaaj
National Desk : ਦੇਸ਼ ਵਿੱਚ ਖੰਡ ਦੀਆਂ ਵਧ ਰਹੀਆਂ ਕੀਮਤਾਂ ਨੂੰ ਕਾਬੂ ਕਰਨ ਲਈ ਸਰਕਾਰ ਵੱਲੋਂ ਕੀਤੀ ਜਾ ਰਹੀ ਸਖ਼ਤੀ ਦਾ ਅਸਰ ਹੁਣ ਬਾਜ਼ਾਰ ਵਿੱਚ ਦਿਖਾਈ ਦੇਣ ਲੱਗਾ ਹੈ। ਇੱਕ ਹਫ਼ਤਾ ਪਹਿਲਾਂ ਕਰੀਬ ₹68 ਪ੍ਰਤੀ ਕਿਲੋਗ੍ਰਾਮ ਤੱਕ ਪਹੁੰਚੀ ਐਕਸ-ਮਿਲ ਕੀਮਤ ਹੁਣ ਘਟ ਕੇ ਲਗਭਗ ₹53-55 ਪ੍ਰਤੀ ਕਿਲੋਗ੍ਰਾਮ ਰਹਿ ਗਈ ਹੈ।
ਮਹਾਰਾਸ਼ਟਰ ਵਿੱਚ ਖੰਡ ਦੀ ਕੀਮਤ ਕਰੀਬ ₹51-52 ਪ੍ਰਤੀ ਕਿਲੋਗ੍ਰਾਮ ਅਤੇ ਕੋਲਕਾਤਾ ਵਿੱਚ ਥੋਕ ਕੀਮਤ ਲਗਭਗ ₹53 ਪ੍ਰਤੀ ਕਿਲੋਗ੍ਰਾਮ ਦੱਸੀ ਜਾ ਰਹੀ ਹੈ। ਹਾਲਾਂਕਿ ਕੀਮਤਾਂ ਵਿੱਚ ਕਮੀ ਆਈ ਹੈ, ਪਰ ਇਸ ਦਾ ਪੂਰਾ ਲਾਭ ਹਾਲੇ ਖਪਤਕਾਰਾਂ ਤੱਕ ਪਹੁੰਚਣਾ ਬਾਕੀ ਹੈ।
ਸਰਕਾਰ ਨੇ ਵਧਾਈ ਸਪਲਾਈ
ਕੀਮਤਾਂ ’ਤੇ ਕਾਬੂ ਪਾਉਣ ਲਈ ਸਰਕਾਰ ਨੇ 10 ਲੱਖ ਟਨ ਕੱਚੀ ਖੰਡ ਦੀ ਡਿਊਟੀ-ਮੁਕਤ ਦਰਾਮਦ ਦੀ ਤਿਆਰੀ ਕੀਤੀ ਹੈ। ਕਰੀਬ 80 ਹਜ਼ਾਰ ਟਨ ਦੀਆਂ ਚਾਰ ਖੇਪਾਂ ਰਵਾਨਾ ਹੋ ਚੁੱਕੀਆਂ ਹਨ। ਇਸ ਤੋਂ ਇਲਾਵਾ 3 ਤੋਂ 4 ਲੱਖ ਟਨ ਖੰਡ ਭਾਰਤੀ ਬੰਦਰਗਾਹਾਂ ’ਤੇ ਮੌਜੂਦ ਹੈ, ਜਿਸ ਦੀ ਰਿਫਾਈਨਿੰਗ ਤੇਜ਼ ਕੀਤੀ ਜਾ ਰਹੀ ਹੈ।
ਸਰਕਾਰ ਨੇ ਅਗਸਤ ਦਾ ਬਾਕੀ ਖੰਡ ਕੋਟਾ ਵੀ ਜਾਰੀ ਕਰਨ ਦੇ ਨਿਰਦੇਸ਼ ਦਿੱਤੇ ਹਨ। ਖੰਡ ਡੀਲਰਾਂ ਲਈ 30 ਨਵੰਬਰ ਤੱਕ ਵੱਧ ਤੋਂ ਵੱਧ 400 ਟਨ ਸਟਾਕ ਰੱਖਣ ਦੀ ਹੱਦ ਤੈਅ ਕੀਤੀ ਗਈ ਹੈ।
ਜਮ੍ਹਾਂਖੋਰੀ ’ਤੇ ਵੀ ਕਾਰਵਾਈ
1 ਸਤੰਬਰ ਤੋਂ ਵੱਡੇ ਥੋਕ ਖਪਤਕਾਰਾਂ ਲਈ 15 ਦਿਨਾਂ ਤੋਂ ਵੱਧ ਦੀ ਲੋੜ ਮੁਤਾਬਕ ਖੰਡ ਸਟੋਰ ਕਰਨ ’ਤੇ ਵੀ ਰੋਕ ਲਗਾਈ ਜਾ ਰਹੀ ਹੈ। ਕੇਂਦਰ ਅਤੇ ਸੂਬਾ ਸਰਕਾਰਾਂ ਦੀਆਂ ਸਾਂਝੀਆਂ ਟੀਮਾਂ ਵੱਲੋਂ ਸਟਾਕ ਦੀ ਜਾਂਚ ਲਈ 1,000 ਤੋਂ ਵੱਧ ਥਾਵਾਂ ’ਤੇ ਕਾਰਵਾਈ ਕੀਤੀ ਗਈ ਹੈ।
ਸਰਕਾਰ ਦਾ ਮੰਨਣਾ ਹੈ ਕਿ ਘੱਟ ਪੈਦਾਵਾਰ ਦੀਆਂ ਅਟਕਲਾਂ ਅਤੇ ਜਮ੍ਹਾਂਖੋਰੀ ਕਾਰਨ ਬਾਜ਼ਾਰ ਵਿੱਚ ਨਕਲੀ ਘਾਟ ਪੈਦਾ ਹੋਈ, ਜਿਸ ਨਾਲ ਕੀਮਤਾਂ ਵਧੀਆਂ। ਕਾਰਵਾਈ ਤੋਂ ਬਾਅਦ ਸਟਾਕ ਦੀ ਵਿਕਰੀ ਵਧਣ ਨਾਲ ਕੀਮਤਾਂ ’ਤੇ ਦਬਾਅ ਘਟਿਆ ਹੈ।
ਇਸ ਦੌਰਾਨ ਪਿਆਜ਼ ਦੀਆਂ ਕੀਮਤਾਂ ਵਿੱਚ ਵੀ ਕਮੀ ਦੇਖਣ ਨੂੰ ਮਿਲੀ ਹੈ। ਨਾਸਿਕ ਮੰਡੀ ਵਿੱਚ ਕੀਮਤ ਸੋਮਵਾਰ ਨੂੰ ₹50 ਪ੍ਰਤੀ ਕਿਲੋਗ੍ਰਾਮ ਤੋਂ ਘਟ ਕੇ ਬੁੱਧਵਾਰ ਤੱਕ ਲਗਭਗ ₹42 ਰਹਿ ਗਈ।
