27 ਫਰਵਰੀ 2026 ਅੱਜ ਦੀ ਆਵਾਜ਼
ਐਂਟਰਟੇਨਮੈਂਟ ਡੈਸਕ: ਫਿਲਮ ‘ਗੀਤਾ ਗੋਵਿੰਦਮ’ ਦੀ ਹਿੱਟ ਜੋੜੀ ਹੁਣ ਅਸਲ ਜ਼ਿੰਦਗੀ ਵਿੱਚ ਵੀ ਪਤੀ-ਪਤਨੀ ਬਣ ਗਈ ਹੈ। 26 ਫਰਵਰੀ 2026 ਨੂੰ ਉਦੈਪੁਰ ਵਿੱਚ ਰਵਾਇਤੀ ਰਸਮਾਂ ਨਾਲ ਰਸ਼ਮਿਕਾ ਮੰਦਾਨਾ ਅਤੇ ਵਿਜੇ ਦੇਵਰਕੋਂਡਾ ਨੇ ਵਿਆਹ ਰਚਾਇਆ। ਦੋਵਾਂ ਨੇ ਆਪਣੇ ਵਿਆਹ ਨੂੰ ਨਿੱਜੀ ਸਮਾਰੋਹ ਰੱਖਿਆ, ਜਿਸ ਕਰਕੇ ਫੈਨਜ਼ ਵਿੱਚ ਉਤਸ਼ਾਹ ਹੋਰ ਵਧ ਗਿਆ ਸੀ।
ਵਿਆਹ ਤੋਂ ਬਾਅਦ ਜਿਵੇਂ ਹੀ ਜੋੜੇ ਨੇ ਆਪਣੀਆਂ ਤਸਵੀਰਾਂ ਸੋਸ਼ਲ ਮੀਡੀਆ ‘ਤੇ ਸਾਂਝੀਆਂ ਕੀਤੀਆਂ, ਉਹ ਮਿੰਟਾਂ ਵਿੱਚ ਵਾਇਰਲ ਹੋ ਗਈਆਂ। 24 ਘੰਟਿਆਂ ਦੇ ਅੰਦਰ ਵਿਜੇ ਦੀ ਪੋਸਟ ਨੂੰ ਕਰੀਬ 15 ਮਿਲੀਅਨ ਲਾਈਕਸ ਮਿਲੇ, ਜਦਕਿ ਰਸ਼ਮਿਕਾ ਦੀ ਪੋਸਟ ‘ਤੇ 18.2 ਮਿਲੀਅਨ ਤੋਂ ਵੱਧ ਲਾਈਕਸ ਆਏ। ਇਸ ਨਾਲ ਇਸ ਜੋੜੇ ਨੇ ਪਿਛਲੇ ਕਈ ਸਟਾਰ ਕਪਲਸ ਦੇ ਰਿਕਾਰਡ ਤੋੜ ਦਿੱਤੇ।
ਇਸ ਤੋਂ ਪਹਿਲਾਂ 2017 ਵਿੱਚ ਅਨੁਸ਼ਕਾ ਸ਼ਰਮਾ ਅਤੇ ਵਿਰਾਟ ਕੋਹਲੀ ਦੇ ਵਿਆਹ ਦੀਆਂ ਤਸਵੀਰਾਂ ਨੂੰ ਲਗਭਗ 3.4 ਮਿਲੀਅਨ ਲਾਈਕਸ ਮਿਲੇ ਸਨ। 2022 ਵਿੱਚ ਆਲੀਆ ਭੱਟ ਅਤੇ ਰਣਬੀਰ ਕਪੂਰ ਦੀਆਂ ਤਸਵੀਰਾਂ ਨੂੰ ਕਰੀਬ 12 ਮਿਲੀਅਨ ਲਾਈਕਸ ਮਿਲੇ ਸਨ। ਇਸੇ ਤਰ੍ਹਾਂ 2023 ਵਿੱਚ ਕਿਆਰਾ ਅਡਵਾਨੀ ਅਤੇ ਸਿਧਾਰਥ ਮਲਹੋਤਰਾ ਦੇ ਵਿਆਹ ਦੀਆਂ ਫੋਟੋਆਂ ਨੂੰ ਤਕਰੀਬਨ 15 ਮਿਲੀਅਨ ਲਾਈਕਸ ਮਿਲੇ ਸਨ।
ਇਸ ਵਾਰ ਇੰਟਰਨੈੱਟ ‘ਤੇ ਰਸ਼ਮਿਕਾ ਅਤੇ ਵਿਜੇ ਦਾ ਹੀ ਜ਼ੋਰ ਹੈ। ਨਵੇਂ ਵਿਆਹੇ ਜੋੜੇ ਲਈ ਫੈਨਜ਼ ਦੀ ਦੀਵਾਨਗੀ ਦੇਖ ਕੇ ਸਾਫ਼ ਹੈ ਕਿ ਇਹ ਜੋੜੀ ਸਿਰਫ਼ ਪਰਦੇ ‘ਤੇ ਹੀ ਨਹੀਂ, ਅਸਲ ਜ਼ਿੰਦਗੀ ਵਿੱਚ ਵੀ ਸੁਪਰਹਿੱਟ ਸਾਬਤ ਹੋ ਰਹੀ ਹੈ।
