01 ਜਨਵਰੀ, 2026 ਅਜ ਦੀ ਆਵਾਜ਼
ਐਂਟਰਟੇਨਮੈਂਟ ਡੈਸਕ: ਸਲਮਾਨ ਖਾਨ ਵੱਲੋਂ ਹੋਸਟ ਕੀਤੇ ਗਏ ਰਿਐਲਟੀ ਸ਼ੋਅ ‘ਬਿੱਗ ਬੌਸ ਸੀਜ਼ਨ 19’ ਦੀ ਟ੍ਰਾਫੀ ਟੈਲੀਵਿਜ਼ਨ ਅਦਾਕਾਰ ਗੌਰਵ ਖੰਨਾ ਨੇ ਆਪਣੇ ਨਾਮ ਕਰ ਲਈ। ਜਿੱਤ ਤੋਂ ਬਾਅਦ ਜਿੱਥੇ ਫੈਨਜ਼ ਨੇ ਉਨ੍ਹਾਂ ਦੀ ਖੇਡ ਦੀ ਖੂਬ ਤਾਰੀਫ਼ ਕੀਤੀ, ਉੱਥੇ ਕੁਝ ਲੋਕਾਂ ਨੇ ਇਸਨੂੰ ‘ਫਿਕਸਡ’ ਦੱਸਦੇ ਹੋਏ ਕਿਹਾ ਕਿ ਚੈਨਲ ਦਾ ਜਾਣਿਆ-ਪਛਾਣਿਆ ਚਿਹਰਾ ਹੋਣ ਕਰਕੇ ਉਨ੍ਹਾਂ ਨੂੰ ਜਿਤਾਇਆ ਗਿਆ। ਹੁਣ ਇਨ੍ਹਾਂ ਦੋਸ਼ਾਂ ’ਤੇ ਗੌਰਵ ਖੰਨਾ ਨੇ ਖੁੱਲ੍ਹ ਕੇ ਆਪਣੀ ਪ੍ਰਤੀਕਿਰਿਆ ਦਿੱਤੀ ਹੈ।
ਫਾਈਨਲ ’ਚ ਗੌਰਵ ਖੰਨਾ ਅਤੇ ਫਰਹਾਨਾ ਭੱਟ ਟੌਪ-2 ਵਿੱਚ ਰਹੇ। ਆਲੋਚਨਾ ’ਤੇ ਜਵਾਬ ਦਿੰਦਿਆਂ ਗੌਰਵ ਨੇ ਇੱਕ ਇੰਟਰਵਿਊ ਵਿੱਚ ਕਿਹਾ, “ਲੋਕ ਕਹਿੰਦੇ ਹਨ ਕਿ ਮੈਂ ਮਸ਼ਹੂਰ ਹਾਂ, ਇਸ ਲਈ ਜਿੱਤ ਗਿਆ। ਪਰ ਸੱਚ ਇਹ ਹੈ ਕਿ ਇਸ ਜਿੱਤ ਦੇ ਪਿੱਛੇ ਸਾਲਾਂ ਦੀ ਮਿਹਨਤ ਹੈ। ਵੀਹ ਸਾਲਾਂ ਦੀ ਲਗਾਤਾਰ ਮਿਹਨਤ ਨੂੰ ਨਜ਼ਰਅੰਦਾਜ਼ ਨਹੀਂ ਕੀਤਾ ਜਾ ਸਕਦਾ।”
ਉਨ੍ਹਾਂ ਨੇ ਸਪੱਸ਼ਟ ਕੀਤਾ ਕਿ ਉਹ ਪਿਛਲੇ 15 ਸਾਲਾਂ ਤੋਂ ਕਿਸੇ ਵੀ ਚੈਨਲ ਦੇ ‘ਫੇਵਰੇਟ’ ਨਹੀਂ ਹਨ। ਗੌਰਵ ਨੇ ਕਿਹਾ, “ਕਲਰਜ਼ ਟੀਵੀ ’ਤੇ ਮੇਰਾ ਆਖ਼ਰੀ ਸ਼ੋਅ 2010 ਵਿੱਚ ਆਇਆ ਸੀ। ਜੇ ਅੱਜ ਵੀ ਕਿਸੇ ਨੂੰ ਲੱਗਦਾ ਹੈ ਕਿ ਮੈਂ ਚੈਨਲ ਦਾ ਫੇਵਰੇਟ ਹਾਂ, ਤਾਂ ਇਹ ਹੈਰਾਨੀ ਵਾਲੀ ਗੱਲ ਹੈ। ਕੁਝ ਵੀ ਮੁਫ਼ਤ ਵਿੱਚ ਨਹੀਂ ਮਿਲਦਾ। ਸਿਰਫ਼ ਪਿਛੋਕੜ ਜਾਂ ਨਾਮ ਨਾਲ ਕੋਈ ਨਹੀਂ ਜਿੱਤਦਾ—ਉੱਥੇ ਵਧੀਆ ਪ੍ਰਦਰਸ਼ਨ ਕਰਨਾ ਪੈਂਦਾ ਹੈ।”
ਬਿੱਗ ਬੌਸ ਤੋਂ ਮਿਲੀ ਸਿੱਖ ਬਾਰੇ ਗੱਲ ਕਰਦਿਆਂ ਗੌਰਵ ਨੇ ਕਿਹਾ ਕਿ ਉਹ ਮੁਕਾਬਲੇ ਲਈ ਨਹੀਂ, ਸਗੋਂ ਆਪਣੇ ਆਪ ਨੂੰ ਬਿਹਤਰ ਬਣਾਉਣ ਲਈ ਘਰ ਵਿੱਚ ਗਏ ਸਨ। “ਇਸ ਸ਼ੋਅ ਵਿੱਚ ਲੋਕ ਤੁਹਾਨੂੰ ਨਿਸ਼ਾਨਾ ਬਣਾਉਂਦੇ ਹਨ, ਬਦਨਾਮ ਕਰਨ ਦੀ ਕੋਸ਼ਿਸ਼ ਕਰਦੇ ਹਨ। ਪਰ ਮੇਰਾ ਮਕਸਦ ਸਾਫ਼ ਸੀ—ਸਮਝਦਾਰੀ ਨਾਲ ਖੇਡਣਾ ਅਤੇ ਇੱਕ ਚੰਗਾ ਇਨਸਾਨ ਬਣਨਾ। ਮੈਂ ਕਿਸੇ ਨੂੰ ਖੁਸ਼ ਕਰਨ ਨਹੀਂ ਗਿਆ ਸੀ, ਸਗੋਂ ਆਪਣੇ ਫੈਸਲਿਆਂ ’ਤੇ ਕਾਇਮ ਰਹਿਣ ਲਈ ਗਿਆ ਸੀ,” ਉਨ੍ਹਾਂ ਨੇ ਕਿਹਾ।
ਗੌਰਵ ਖੰਨਾ ਦੀ ਇਸ ਸਪਸ਼ਟ ਬਿਆਨਬਾਜ਼ੀ ਨਾਲ ‘ਫਿਕਸਡ’ ਜਿੱਤ ਦੇ ਦੋਸ਼ਾਂ ’ਤੇ ਹੁਣ ਕਾਫ਼ੀ ਹੱਦ ਤੱਕ ਵਿਰਾਮ ਲੱਗਦਾ ਦਿਖਾਈ ਦੇ ਰਿਹਾ ਹੈ।
