09 ਜਨਵਰੀ, 2026 ਅਜ ਦੀ ਆਵਾਜ਼
Haryana Desk: ਹਰਿਆਣਾ ਜੀ.ਆਰ.ਪੀ. ਨੇ ਚਾਰ ਮਹੀਨੇ ਤੱਕ ਚੱਲੀ ਲਗਾਤਾਰ ਅਤੇ ਗੰਭੀਰ ਜਾਂਚ ਤੋਂ ਬਾਅਦ ਬਾਲ ਮਜ਼ਦੂਰੀ ਕਰਵਾਉਣ ਦੇ ਮਾਮਲੇ ਵਿੱਚ ਮੁੱਖ ਆਰੋਪੀ ਅਨਿਲ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ। ਇਹ ਮਾਮਲਾ ਉਸ ਵੇਲੇ ਸਾਹਮਣੇ ਆਇਆ ਸੀ ਜਦੋਂ ਬਹਾਦੁਰਗੜ੍ਹ ਦੇ ਇੱਕ ਨਾਬਾਲਗ ਬੱਚੇ ਦਾ ਹੱਥ ਚਾਰਾ ਕੱਟਣ ਵਾਲੀ ਮਸ਼ੀਨ ਵਿੱਚ ਆ ਕੇ ਗੰਭੀਰ ਤੌਰ ’ਤੇ ਜ਼ਖ਼ਮੀ ਹੋ ਗਿਆ ਸੀ। ਅਗਸਤ ਮਹੀਨੇ ਵਿੱਚ ਘਟਨਾ ਦੀ ਜਾਣਕਾਰੀ ਮਿਲਣ ’ਤੇ ਪੁਲਿਸ ਨੇ ਬਾਲ ਮਜ਼ਦੂਰੀ ਕਾਨੂੰਨ ਅਤੇ ਹੋਰ ਸੰਬੰਧਤ ਧਾਰਾਵਾਂ ਹੇਠ ਕੇਸ ਦਰਜ ਕੀਤਾ ਸੀ।
ਘਟਨਾ ਦੇ ਸਮੇਂ ਬੱਚਾ ਗਹਿਰੇ ਮਾਨਸਿਕ ਸਦਮੇ ਵਿੱਚ ਸੀ ਅਤੇ ਨਾ ਤਾਂ ਆਪਣੇ ਬਾਰੇ ਅਤੇ ਨਾ ਹੀ ਆਰੋਪੀ ਬਾਰੇ ਸਹੀ ਜਾਣਕਾਰੀ ਦੇ ਸਕਦਾ ਸੀ, ਜਿਸ ਕਾਰਨ ਜਾਂਚ ਕਾਫ਼ੀ ਮੁਸ਼ਕਲ ਬਣ ਗਈ। ਮਾਮਲੇ ਦੀ ਗੰਭੀਰਤਾ ਨੂੰ ਦੇਖਦੇ ਹੋਏ ਹਰਿਆਣਾ ਰੇਲਵੇ ਪੁਲਿਸ ਦੀ ਐੱਸ.ਪੀ. ਨਿਕਿਤਾ ਗਹਿਲੋਤ ਨੇ ਇੱਕ ਵਿਸ਼ੇਸ਼ ਜਾਂਚ ਟੀਮ ਦਾ ਗਠਨ ਕੀਤਾ, ਜਿਸ ਵਿੱਚ ਸਾਇਬਰ ਮਾਹਿਰਾਂ ਅਤੇ ਵੱਖ-ਵੱਖ ਜ਼ਿਲ੍ਹਿਆਂ ਦੇ ਅਨੁਭਵੀ ਪੁਲਿਸ ਅਧਿਕਾਰੀਆਂ ਨੂੰ ਸ਼ਾਮਲ ਕੀਤਾ ਗਿਆ।
ਜਾਂਚ ਟੀਮ ਨੇ 200 ਕਿਲੋਮੀਟਰ ਤੋਂ ਵੱਧ ਖੇਤਰ ਵਿੱਚ ਫੈਲੀ ਤਲਾਸ਼ੀ ਦੌਰਾਨ ਕੈਥਲ, ਜੀੰਦ, ਰੋਹਤਕ, ਝੱਜਰ, ਬਹਾਦੁਰਗੜ੍ਹ, ਸੋਨੀਪਤ, ਪਾਣੀਪਤ, ਨੂਹ, ਪਲਵਲ ਸਮੇਤ ਦਿੱਲੀ ਦੇ ਨਰੇਲਾ, ਨਾਂਗਲੋਈ, ਸ਼ਾਹਦਰਾ ਅਤੇ ਉੱਤਰ ਪ੍ਰਦੇਸ਼ ਦੇ ਸਾਹਿਬਾਬਾਦ, ਗਾਜ਼ੀਆਬਾਦ, ਅਲੀਗੜ੍ਹ, ਬਾਗਪਤ ਆਦਿ ਖੇਤਰਾਂ ਦੇ 200 ਤੋਂ ਵੱਧ ਪਿੰਡਾਂ ਵਿੱਚ ਛਾਣਬੀਣ ਕੀਤੀ।
ਮਾਨਵ ਅਧਿਕਾਰ ਆਯੋਗ ਦੇ ਹੁਕਮਾਂ ਅਨੁਸਾਰ ਬੱਚੇ ਦਾ ਬਿਆਨ ਮਾਹਿਰ ਟੀਮ ਦੀ ਨਿਗਰਾਨੀ ਹੇਠ ਮੁੜ ਦਰਜ ਕੀਤਾ ਗਿਆ। ਮਿਲੀ ਜਾਣਕਾਰੀ ਦੇ ਆਧਾਰ ’ਤੇ ਹਰਿਆਣਾ ਸਿੱਖਿਆ ਬੋਰਡ, ਉੱਤਰ ਪ੍ਰਦੇਸ਼ ਸਿੱਖਿਆ ਬੋਰਡ ਅਤੇ ਗ੍ਰਾਮ ਪੰਚਾਇਤ ਦੇ ਰਿਕਾਰਡ ਰਾਹੀਂ ਆਰੋਪੀ ਅਨਿਲ ਦੀ ਪਹਿਚਾਣ ਪੱਕੀ ਕੀਤੀ ਗਈ।
ਲਗਾਤਾਰ ਕੋਸ਼ਿਸ਼ਾਂ ਤੋਂ ਬਾਅਦ ਪੁਲਿਸ ਨੂੰ ਆਖ਼ਿਰਕਾਰ ਸਫਲਤਾ ਮਿਲੀ। ਗ੍ਰਿਫ਼ਤਾਰੀ ਤੋਂ ਬਚਣ ਲਈ ਲਗਾਤਾਰ ਥਾਂ ਬਦਲਦਾ ਰਹਿੰਦਾ ਅਨਿਲ ਤਕਨੀਕੀ ਨਿਗਰਾਨੀ ਅਤੇ ਜਮੀਨੀ ਇਨਪੁੱਟ ਦੇ ਆਧਾਰ ’ਤੇ ਉੱਤਰ ਪ੍ਰਦੇਸ਼ ਦੇ ਗੌਤਮਬੁੱਧ ਨਗਰ ਖੇਤਰ ਤੋਂ ਗ੍ਰਿਫ਼ਤਾਰ ਕੀਤਾ ਗਿਆ। ਉਹ ਉੱਥੇ ਇੱਕ ਡੈਅਰੀ ਵਿੱਚ ਕੰਮ ਕਰ ਰਿਹਾ ਸੀ। ਗ੍ਰਿਫ਼ਤਾਰੀ ਤੋਂ ਬਾਅਦ ਆਰੋਪੀ ਨੂੰ ਅਦਾਲਤ ਵਿੱਚ ਪੇਸ਼ ਕਰਕੇ ਜ਼ਿਲ੍ਹਾ ਜੇਲ੍ਹ ਝੱਜਰ ਭੇਜ ਦਿੱਤਾ ਗਿਆ ਹੈ।
ਇਸ ਜਟਿਲ ਮਾਮਲੇ ਨੂੰ ਸਫਲਤਾਪੂਰਵਕ ਸੁਲਝਾਉਣ ਲਈ ਜੀ.ਆਰ.ਪੀ. ਵੱਲੋਂ ਬਣਾਈ ਗਈ ਵਿਸ਼ੇਸ਼ ਜਾਂਚ ਟੀਮ ਨੂੰ ਪ੍ਰਸ਼ੰਸਾ ਪੱਤਰ ਦੇ ਕੇ ਸਨਮਾਨਿਤ ਕੀਤਾ ਗਿਆ। ਪੁਲਿਸ ਅਧਿਕਾਰੀਆਂ ਨੇ ਕਿਹਾ ਕਿ ਇਹ ਕਾਰਵਾਈ ਬਾਲ ਮਜ਼ਦੂਰੀ ਅਤੇ ਬਾਲ ਸ਼ੋਸ਼ਣ ਦੇ ਖ਼ਿਲਾਫ਼ ਇੱਕ ਸਖ਼ਤ ਸੰਦੇਸ਼ ਹੈ ਕਿ ਹਰਿਆਣਾ ਪੁਲਿਸ ਕਿਸੇ ਵੀ ਬੱਚੇ ਨਾਲ ਜ਼ੁਲਮ ਕਰਨ ਵਾਲੇ ਅਪਰਾਧੀ ਨੂੰ ਕਾਨੂੰਨ ਤੋਂ ਬਚਣ ਨਹੀਂ ਦੇਵੇਗੀ।
