07 ਫਰਵਰੀ 2026 ਅੱਜ ਦੀ ਆਵਾਜ਼
Business Desk: ਏਸ਼ੀਆ ਦੇ ਸਭ ਤੋਂ ਅਮੀਰ ਵਿਅਕਤੀ ਮੁਕੇਸ਼ ਅੰਬਾਨੀ ਨੇ ਹਾਲ ਹੀ ਵਿੱਚ ਖੁਲਾਸਾ ਕੀਤਾ ਕਿ ਕਿਵੇਂ ਸਿਰਫ਼ ਪੰਜ ਮਿੰਟ ਦੀ ਕਾਰ ਰਾਈਡ ਦੌਰਾਨ ਬਲੈਕਰੌਕ ਦੇ ਸੀਈਓ ਲੈਰੀ ਫਿੰਕ ਨਾਲ ਇੱਕ ਵੱਡੀ ਡੀਲ ਤੈਅ ਹੋ ਗਈ। ਇਸ ਛੋਟੀ ਜਿਹੀ ਗੱਲਬਾਤ ਦਾ ਨਤੀਜਾ ‘ਜੀਓ ਬਲੈਕਰੌਕ’ ਦੇ ਰੂਪ ਵਿੱਚ ਸਾਹਮਣੇ ਆਇਆ, ਜੋ ਲਗਭਗ 300 ਮਿਲੀਅਨ ਡਾਲਰ (ਕਰੀਬ 2700 ਕਰੋੜ ਰੁਪਏ) ਦਾ ਜੁਆਇੰਟ ਵੈਂਚਰ ਹੈ।
ਮੁੰਬਈ ਵਿੱਚ ਹੋਏ ‘Investing for a New Era’ ਸਮਾਗਮ ਦੌਰਾਨ ਮੁਕੇਸ਼ ਅੰਬਾਨੀ ਨੇ ਦੱਸਿਆ ਕਿ ਸਾਲ 2023 ਵਿੱਚ ਉਨ੍ਹਾਂ ਨੇ ਲੈਰੀ ਫਿੰਕ ਨੂੰ ਕਿਹਾ ਸੀ ਕਿ ਬਲੈਕਰੌਕ ਨੂੰ ਭਾਰਤ ਵਿੱਚ ਮੁੜ ਦਾਖ਼ਲ ਹੋਣਾ ਚਾਹੀਦਾ ਹੈ। ਇਸ ’ਤੇ ਫਿੰਕ ਨੇ ਤੁਰੰਤ ਸਾਂਝੇਦਾਰੀ ਦਾ ਪ੍ਰਸਤਾਵ ਰੱਖਿਆ ਅਤੇ ਕੁਝ ਹੀ ਮਿੰਟਾਂ ਵਿੱਚ ਸਹਿਮਤੀ ਬਣ ਗਈ। ਇਸ ਵੈਂਚਰ ਵਿੱਚ ਜੀਓ ਫਾਈਨੈਂਸ਼ੀਅਲ ਸਰਵਿਸਿਜ਼ ਅਤੇ ਬਲੈਕਰੌਕ ਬਰਾਬਰ ਦੇ ਭਾਗੀਦਾਰ ਹਨ।
ਬਲੈਕਰੌਕ ਦੁਨੀਆ ਦੀ ਸਭ ਤੋਂ ਵੱਡੀ ਐਸੇਟ ਮੈਨੇਜਮੈਂਟ ਕੰਪਨੀ ਹੈ, ਜੋ 2025 ਦੇ ਅੰਤ ਤੱਕ ਕਰੀਬ 14 ਟ੍ਰਿਲੀਅਨ ਡਾਲਰ ਦੇ ਨਿਵੇਸ਼ ਦਾ ਪ੍ਰਬੰਧ ਕਰ ਰਹੀ ਸੀ। ਲੈਰੀ ਫਿੰਕ ਨੇ ਵੀ ਮੰਨਿਆ ਕਿ ਇੱਕ ਛੋਟੀ ਕਾਰ ਯਾਤਰਾ ਦੌਰਾਨ ਹੀ ਇਹ ਵੱਡਾ ਫੈਸਲਾ ਲਿਆ ਗਿਆ।
ਮਾਹਿਰਾਂ ਅਨੁਸਾਰ, ਇੰਨੀ ਤੇਜ਼ੀ ਨਾਲ ਹੋਈ ਇਹ ਡੀਲ ਨਾ ਸਿਰਫ਼ ਮੁਕੇਸ਼ ਅੰਬਾਨੀ ਅਤੇ ਲੈਰੀ ਫਿੰਕ ਦੇ ਮਜ਼ਬੂਤ ਸਬੰਧਾਂ ਨੂੰ ਦਰਸਾਉਂਦੀ ਹੈ, ਸਗੋਂ ਭਾਰਤ ਦੀ ਫਾਈਨੈਂਸ਼ੀਅਲ ਸਰਵਿਸਿਜ਼ ਇੰਡਸਟਰੀ ਵਿੱਚ ਮੌਜੂਦ ਵੱਡੀਆਂ ਸੰਭਾਵਨਾਵਾਂ ਵੱਲ ਵੀ ਇਸ਼ਾਰਾ ਕਰਦੀ ਹੈ।
ਫੋਰਬਸ ਮੁਤਾਬਕ ਮੁਕੇਸ਼ ਅੰਬਾਨੀ ਦੀ ਕੁੱਲ ਦੌਲਤ ਲਗਭਗ 103.8 ਬਿਲੀਅਨ ਡਾਲਰ ਹੈ ਅਤੇ ਰਿਲਾਇੰਸ ਇੰਡਸਟਰੀਜ਼ ਕਈ ਖੇਤਰਾਂ ਵਿੱਚ ਸਰਗਰਮ 125 ਬਿਲੀਅਨ ਡਾਲਰ ਦੀ ਕੰਪਨੀ ਹੈ।
