28 ਜਨਵਰੀ, 2026 ਅਜ ਦੀ ਆਵਾਜ਼
International Desk: ਰੂਸ ਅਤੇ ਯੂਕਰੇਨ ਵਿਚਾਲੇ ਚੱਲ ਰਹੀ ਜੰਗ ਨੂੰ ਲਗਭਗ ਚਾਰ ਸਾਲ ਹੋਣ ਵਾਲੇ ਹਨ ਅਤੇ ਹੁਣ ਇਸ ਦੀ ਭਿਆਨਕਤਾ ਬਾਰੇ ਇੱਕ ਹੈਰਾਨ ਕਰਨ ਵਾਲੀ ਰਿਪੋਰਟ ਸਾਹਮਣੇ ਆਈ ਹੈ। ਅਮਰੀਕਾ ਦੇ ਪ੍ਰਸਿੱਧ ਥਿੰਕ ਟੈਂਕ ਸੈਂਟਰ ਫ਼ਾਰ ਸਟ੍ਰੈਟਜਿਕ ਐਂਡ ਇੰਟਰਨੈਸ਼ਨਲ ਸਟੱਡੀਜ਼ (CSIS) ਮੁਤਾਬਕ, ਫਰਵਰੀ 2022 ਤੋਂ ਲੈ ਕੇ ਹੁਣ ਤੱਕ ਦੋਵੇਂ ਦੇਸ਼ਾਂ ਦੇ ਮਿਲਾ ਕੇ ਕਰੀਬ 20 ਲੱਖ ਸੈਨਿਕ ਹਤਾਹਤ ਹੋ ਚੁੱਕੇ ਹਨ। ਇਨ੍ਹਾਂ ਵਿੱਚ ਮਾਰੇ ਗਏ, ਜ਼ਖ਼ਮੀ ਅਤੇ ਲਾਪਤਾ ਸੈਨਿਕ ਸ਼ਾਮਲ ਹਨ।
ਰਿਪੋਰਟ ਅਨੁਸਾਰ, ਇਸ ਜੰਗ ਵਿੱਚ ਸਭ ਤੋਂ ਵੱਧ ਨੁਕਸਾਨ ਰੂਸ ਨੂੰ ਝੱਲਣਾ ਪਿਆ ਹੈ। ਅਨੁਮਾਨ ਹੈ ਕਿ ਰੂਸ ਦੇ ਕਰੀਬ 12 ਲੱਖ ਸੈਨਿਕ ਹਤਾਹਤ ਹੋਏ ਹਨ, ਜਿਨ੍ਹਾਂ ਵਿੱਚੋਂ ਲਗਭਗ 3.25 ਲੱਖ ਸੈਨਿਕ ਮਾਰੇ ਗਏ। CSIS ਨੇ ਕਿਹਾ ਹੈ ਕਿ ਦੂਜੇ ਵਿਸ਼ਵ ਯੁੱਧ ਤੋਂ ਬਾਅਦ ਕਿਸੇ ਵੀ ਵੱਡੀ ਤਾਕਤ ਨੂੰ ਇੰਨਾ ਵੱਡਾ ਨੁਕਸਾਨ ਨਹੀਂ ਹੋਇਆ। ਇੰਨੇ ਨੁਕਸਾਨਾਂ ਦੇ ਬਾਵਜੂਦ ਵੀ ਰੂਸ ਦੀ ਫੌਜੀ ਤਰੱਕੀ ਕਾਫ਼ੀ ਹੌਲੀ ਰਹੀ ਹੈ।
ਉੱਥੇ ਹੀ ਯੂਕਰੇਨ ਨੂੰ ਵੀ ਭਾਰੀ ਕ਼ੀਮਤ ਚੁਕਾਣੀ ਪਈ ਹੈ। ਫਰਵਰੀ 2022 ਤੋਂ ਦਸੰਬਰ 2025 ਤੱਕ ਯੂਕਰੇਨ ਦੇ ਲਗਭਗ 5 ਤੋਂ 6 ਲੱਖ ਸੈਨਿਕ ਹਤਾਹਤ ਹੋਏ ਹਨ, ਜਿਨ੍ਹਾਂ ਵਿੱਚ ਇੱਕ ਲੱਖ ਤੋਂ 1.4 ਲੱਖ ਤੱਕ ਮੌਤਾਂ ਸ਼ਾਮਲ ਹਨ। CSIS ਦਾ ਅੰਦਾਜ਼ਾ ਹੈ ਕਿ 2026 ਦੀ ਬਹਾਰ ਤੱਕ ਕੁੱਲ ਹਤਾਹਤਾਂ ਦੀ ਗਿਣਤੀ 20 ਲੱਖ ਤੱਕ ਪਹੁੰਚ ਸਕਦੀ ਹੈ।
