Mumbai 08 Dec 2025 AJ DI Awaaj
Bollywood Desk : ਮਸ਼ਹੂਰ ਫਿਲਮਮੇਕਰ ਵਿਕਰਮ ਭੱਟ ਨੂੰ ਮੁੰਬਈ ਅਤੇ ਰਾਜਸਥਾਨ ਪੁਲਿਸ ਨੇ ਮਿਲ ਕੇ ਗ੍ਰਿ*ਫ਼ਤਾਰ ਕਰ ਲਿਆ ਹੈ। ਉਨ੍ਹਾਂ ‘ਤੇ ਉਦੇਪੁਰ ਦੇ ਇੱਕ ਵਪਾਰੀ ਤੋਂ ਫਿਲਮ ਬਣਾਉਣ ਦੇ ਨਾਂ ‘ਤੇ 30 ਕਰੋੜ ਰੁਪਏ ਦੀ ਠੱਗੀ ਕਰਨ ਦੇ ਗੰਭੀਰ ਦੋਸ਼ ਹਨ। ਪੁਲਿਸ ਨੇ ਉਨ੍ਹਾਂ ਨੂੰ ਯਾਰੀ ਰੋਡ ਖੇਤਰ ਦੇ ਗੰਗਾ ਭਵਨ ਅਪਾਰਟਮੈਂਟ ਤੋਂ ਗ੍ਰਿਫ਼ਤਾਰ ਕੀਤਾ, ਜੋ ਉਨ੍ਹਾਂ ਦੀ ਸਾਲੀ ਦਾ ਘਰ ਹੈ। ਹੁਣ ਰਾਜਸਥਾਨ ਪੁਲਿਸ ਬਾਂਦ੍ਰਾ ਕੋਰਟ ਤੋਂ ਟ੍ਰਾਂਜ਼ਿਟ ਰਿਮਾਂਡ ਲੈ ਕੇ ਉਨ੍ਹਾਂ ਨੂੰ ਉਦੇਪੁਰ ਲਿਜਾਣ ਦੀ ਤਿਆਰੀ ਕਰ ਰਹੀ ਹੈ।
ਵਪਾਰੀ ਨੇ 30 ਕਰੋੜ ਦੀ ਠੱਗੀ ਦੀ FIR ਦਰਜ ਕਰਾਈ
ਰਾਜਸਥਾਨ ਦੀ ਇੰਦਰਾ ਗਰੁੱਪ ਆਫ਼ ਕੰਪਨੀਜ਼ ਦੇ ਮਾਲਕ ਡਾ. ਅਜੇ ਮੁਰਡੀਆ ਨੇ 17 ਨਵੰਬਰ ਨੂੰ ਵਿਕਰਮ ਭੱਟ ਸਮੇਤ 8 ਲੋਕਾਂ ਖ਼ਿਲਾਫ਼ ਧੋਖਾਧੜੀ ਦੀ FIR ਦਰਜ ਕਰਵਾਈ ਸੀ। ਵਪਾਰੀ ਨੇ ਦਾਅਵਾ ਕੀਤਾ ਕਿ ਇੱਕ ਇਵੈਂਟ ‘ਚ ਉਨ੍ਹਾਂ ਦੀ ਮੁਲਾਕਾਤ ਦਿਨੇਸ਼ ਕਟਾਰੀਆ ਨਾਲ ਹੋਈ, ਜਿਸਨੇ ਉਨ੍ਹਾਂ ਦੀ ਪਤਨੀ ਦੀ ਬਾਇਓਪਿਕ ਬਣਾਉਣ ਦਾ ਪ੍ਰਸਤਾਵ ਦਿੱਤਾ।
ਦਿਨੇਸ਼ ਕਟਾਰੀਆ ਨੇ ਅਪ੍ਰੈਲ 2024 ਵਿੱਚ ਅਜੇ ਮੁਰਡੀਆ ਨੂੰ ਮੁੰਬਈ ਦੇ ਵ੍ਰਿੰਦਾਵਨ ਸਟੂਡੀਓ ਬੁਲਾਇਆ, ਜਿੱਥੇ ਉਨ੍ਹਾਂ ਦੀ ਮਿਲਾਪ ਵਿਕਰਮ ਭੱਟ ਨਾਲ ਕਰਵਾਈ ਗਈ। ਫਿਲਮ ਬਣਾਉਣ ਨੂੰ ਲੈ ਕੇ ਗਹਿਰਾਈ ਨਾਲ ਚਰਚਾ ਹੋਈ ਅਤੇ ਤੈਅ ਹੋਇਆ ਕਿ ਭੱਟ ਪੂਰੀ ਜ਼ਿੰਮੇਵਾਰੀ ਲੈਣਗੇ, ਜਦੋਂ ਕਿ ਮੁਰਡੀਆ ਨੂੰ ਪੈਸੇ ਭੇਜਣੇ ਹੋਣਗੇ।
40 ਕਰੋੜ ਦਾ ਕਾਂਟ੍ਰੈਕਟ ਅਤੇ ਲਗਾਤਾਰ ਪੇਮੈਂਟਾਂ
ਵਿਕਰਮ ਭੱਟ ਨੇ ਆਪਣੀ ਪਤਨੀ ਸ਼ਵੈਤਾਂਬਰੀ ਅਤੇ ਧੀ ਕ੍ਰਿਸ਼ਣਾ ਨੂੰ ਵੀ ਪ੍ਰੋਜੈਕਟ ਨਾਲ ਜੁੜਿਆ ਦੱਸਿਆ। ਦੋ ਫਿਲਮਾਂ — ‘ਬਾਇਓਨਿਕ’ ਅਤੇ ‘ਮਹਾਰਾਣਾ’ — ਲਈ 40 ਕਰੋੜ ਦਾ ਕਾਂਟ੍ਰੈਕਟ ਕੀਤਾ ਗਿਆ।
31 ਮਈ 2024 ਨੂੰ ਮੁਰਡੀਆ ਨੇ ਭੱਟ ਨੂੰ 2.5 ਕਰੋੜ RTGS ਰਾਹੀਂ ਭੇਜੇ। ਕੁਝ ਹੀ ਦਿਨਾਂ ਬਾਅਦ, 7 ਕਰੋੜ ਦੀ ਹੋਰ ਮੰਗ ਕੀਤੀ ਗਈ ਅਤੇ ਕਿਹਾ ਗਿਆ ਕਿ 47 ਕਰੋੜ ਵਿੱਚ 4 ਫਿਲਮਾਂ ਬਣਨਗੀਆਂ, ਜਿਨ੍ਹਾਂ ਤੋਂ 100–200 ਕਰੋੜ ਤੱਕ ਮੁਨਾਫ਼ਾ ਹੋਵੇਗਾ।
ਵਿਕਰਮ ਭੱਟ ਅਤੇ ਉਨ੍ਹਾਂ ਦੀ ਪਤਨੀ ਦੇ ਕਹਿਣ ‘ਤੇ ਮੁਰਡੀਆ ਨੇ ਵੱਖ-ਵੱਖ ਵੈਂਡਰਾਂ ਨੂੰ ਭੁਗਤਾਨ ਕੀਤਾ।
ਜਾਂਚ ਵਿੱਚ ਵੱਡਾ ਖੁਲਾਸਾ — ਵੈਂਡਰ ਨਿਕਲੇ ਫਰਜ਼ੀ
ਸ਼ੁਰੂਆਤੀ ਜਾਂਚ ਵਿੱਚ ਹੈਰਾਨ ਕਰਨ ਵਾਲੀ ਗੱਲ ਸਾਹਮਣੇ ਆਈ ਕਿ ਜਿਨ੍ਹਾਂ ਵੈਂਡਰਾਂ ਨੂੰ ਪੇਸਾ ਭੇਜਿਆ ਗਿਆ ਸੀ, ਉਹ ਸਭ ਫਰਜ਼ੀ ਨਿਕਲੇ — ਕੋਈ ਪੁਤਾਈ ਕਰਨ ਵਾਲਾ ਸੀ, ਤਾਂ ਕੋਈ ਆਟੋ ਚਲਾਉਂਦਾ ਸੀ। ਭੁਗਤਾਨ ਹੋਣ ਤੋਂ ਬਾਅਦ ਵੱਡੀ ਰਕਮ ਵਿਕਰਮ ਭੱਟ ਦੀ ਪਤਨੀ ਦੇ ਖਾਤੇ ਵਿੱਚ ਟ੍ਰਾਂਸਫਰ ਹੋ ਜਾਂਦੀ ਸੀ।
ਪੁਲਿਸ ਵੱਲੋਂ ਅਗਲੀ ਕਾਰਵਾਈ ਜਾਰੀ
ਪੁਲਿਸ ਨੇ ਮਾਮਲੇ ਵਿੱਚ ਅਗਲੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ ਅਤੇ ਵਿਕਰਮ ਭੱਟ ਨੂੰ ਰਾਜਸਥਾਨ ਲਿਜਾ ਕੇ ਹੋਰ ਪੁੱਛਗਿੱਛ ਕੀਤੀ ਜਾਵੇਗੀ।
ਮਾਮਲਾ ਫਿਲਮ ਇੰਡਸਟਰੀ ਅਤੇ ਵਪਾਰਕ ਜਗਤ ਦੋਹਾਂ ਨੂੰ ਹਿਲਾ ਦੇਣ ਵਾਲਾ ਬਣ ਗਿਆ ਹੈ।
