ਸੁਲਤਾਨਪੁਰ ਲੋਧੀ 14 Nov 2025 AJ DI Awaaj
Punjab Desk : ਸੁਲਤਾਨਪੁਰ ਲੋਧੀ ਦੇ ਰਹਿਣ ਵਾਲੇ ਪੁਨੀਤ ਨੇ ਹਿੰਮਤ, ਜਜ਼ਬੇ ਅਤੇ ਜੁਨੂਨ ਦਾ ਬੇਮਿਸਾਲ ਉਦਾਹਰਨ ਪੇਸ਼ ਕਰਦਿਆਂ ਸਕੇਟਿੰਗ ਰਾਹੀਂ 10,000 ਕਿਲੋਮੀਟਰ ਦਾ ਸਫ਼ਰ ਤੈਅ ਕਰਕੇ ਪੰਜ ਤਖ਼ਤਾਂ ਦੀ ਯਾਤਰਾ ਪੂਰੀ ਕੀਤੀ ਹੈ। ਇਹ ਪਹਿਲੀ ਵਾਰ ਹੈ ਕਿ ਕਿਸੇ ਨੇ ਸਕੇਟ ‘ਤੇ ਇਸਤਰਾ ਲੰਬੀ ਯਾਤਰਾ ਕਰਕੇ ਐਤਿਹਾਸਿਕ ਰਿਕਾਰਡ ਬਣਾਇਆ ਹੈ। ਯਾਤਰਾ ਦੀ ਵਿਸ਼ੇਸ਼ਤਾ ਇਹ ਰਹੀ ਕਿ ਪੁਨੀਤ ਨੇ ਇਸਨੂੰ ਸਿੱਖ ਪਹਿਰਾਵੇ ਵਿੱਚ ਪੂਰਾ ਕੀਤਾ, ਜਿਸਦਾ ਮਕਸਦ ਨੌਜਵਾਨ ਪੀੜ੍ਹੀ ਨੂੰ ਆਪਣੇ ਧਰਮ ਅਤੇ ਸੱਭਿਆਚਾਰ ਨਾਲ ਜੋੜਨਾ ਸੀ।
ਪੁਨੀਤ ਦੀ ਜ਼ਿੰਦਗੀ ਸੰਘਰਸ਼ਾਂ ਨਾਲ ਭਰੀ ਰਹੀ। ਬਚਪਨ ਵਿੱਚ ਮਾਤਾ ਦੇ ਦਿਹਾਂਤ ਅਤੇ ਪਿਤਾ ਦੇ ਦੁਬਾਰਾ ਵਿਆਹ ਤੋਂ ਬਾਅਦ ਉਹ ਦਾਦਾ–ਦਾਦੀ ਨਾਲ ਪਲਿਆ। ਛੇਵੀਂ ਜਮਾਤ ਵਿੱਚ ਉਸਨੂੰ ਸਕੇਟਿੰਗ ਦਾ ਸ਼ੌਕ ਤਾਂ ਪੈਦਾ ਹੋਇਆ, ਪਰ ਨਾ ਸਕੇਟ ਮੌਜੂਦ ਸਨ ਅਤੇ ਨਾ ਹੀ ਸਿਖਾਉਣ ਵਾਲਾ ਕੋਈ। ਘਰੇਲੂ ਹਾਲਾਤ ਵੀ ਮਾਮੂਲੀ ਸਨ। ਫਿਰ ਵੀ ਉਸਨੇ ਸੇਵਿੰਗ ਕਰਕੇ ਸਕੇਟ ਖਰੀਦੇ ਅਤੇ ਖੁਦ ਹੀ ਸਿੱਖਣਾ ਸ਼ੁਰੂ ਕੀਤਾ। ਕਈ ਵਾਰ ਡਿੱਗਿਆ, ਖੂਨ ਵਗਿਆ, ਪਰ ਹਾਰ ਨਹੀਂ ਮੰਨੀ।
ਸਕੇਟਿੰਗ ਵਿੱਚ ਮਾਹਰ ਹੋਣ ਮਗਰੋਂ ਉਸਨੇ ਮਾਰਚ ਮਹੀਨੇ ਵਿੱਚ ਪੰਜ ਤਖ਼ਤਾਂ ਦੀ ਯਾਤਰਾ ਦਾ ਨਿਸਚਾ ਕੀਤਾ ਅਤੇ ਇਕੱਲਾ ਬੈਕਪੈਕ ਲੈ ਕੇ ਰਵਾਨਾ ਹੋ ਗਿਆ। ਸਫ਼ਰ ਦੌਰਾਨ ਉਹ ਜਿੱਥੇ ਰਾਤ ਪੈਂਦੀ ਸੀ, ਤੰਬੂ ਲਗਾ ਕੇ ਰਹਿੰਦਾ। ਲੋਕਾਂ ਨੇ ਉਸਦਾ ਸਵਾਗਤ ਕੀਤਾ ਅਤੇ ਹੌਸਲਾ ਵਧਾਇਆ। ਕਈ ਵਾਰ ਖਾਣਾ ਨਹੀਂ ਮਿਲਦਾ ਸੀ, ਪਰ ਫਿਰ ਵੀ ਉਸਦਾ ਜਜ਼ਬਾ ਨਹੀਂ ਟੁੱਟਿਆ।
ਯਾਤਰਾ ਪੂਰੀ ਹੋਣ ਤੇ ਪੁਨੀਤ ਨੇ ਕਿਹਾ ਕਿ ਇਹ ਰਿਕਾਰਡ ਉਸ ਲਈ ਹੀ ਨਹੀਂ, ਸਗੋਂ ਹਰ ਉਸ ਨੌਜਵਾਨ ਲਈ ਪ੍ਰੇਰਣਾ ਹੈ ਜੋ ਹੌਸਲਾ ਅਤੇ ਹਿੰਮਤ ਨਾਲ ਅਸੰਭਵ ਨੂੰ ਸੰਭਵ ਬਣਾ ਸਕਦਾ ਹੈ। ਹੁਣ ਉਸਦੇ ਦੋ ਸੁਪਨੇ ਹਨ—ਓਲੰਪਿਕ ਵਿੱਚ ਸਕੇਟਿੰਗ ਕਰਨੀ ਅਤੇ ਸਕੇਟ ‘ਤੇ ਗੁਰਦੁਆਰਾ ਪੱਥਰ ਸਾਹਿਬ (ਲੇਹ ਲੱਦਾਖ) ਪਹੁੰਚਣਾ। ਇਸ ਲਈ ਉਹ ਉੱਚ ਗੁਣਵੱਤਾ ਦੇ 90,000 ਰੁਪਏ ਵਾਲੇ ਸਕੇਟ ਖਰੀਦਣ ਦੀ ਤਿਆਰੀ ਕਰ ਰਿਹਾ ਹੈ।
ਪੁਨੀਤ ਨੇ ਕਿਹਾ ਕਿ ਆਪਣੇ ਰਿਕਾਰਡ ਨੂੰ ਅਧਿਕਾਰਿਕ ਤੌਰ ‘ਤੇ ਦਰਜ ਕਰਨ ਦੀ ਪ੍ਰਕਿਰਿਆ ਵੀ ਸ਼ੁਰੂ ਕਰ ਦਿੱਤੀ ਹੈ ਅਤੇ ਭਵਿੱਖ ‘ਚ ਜੋ ਵੀ ਪ੍ਰਾਪਤੀਆਂ ਹੋਣਗੀਆਂ, ਉਹ ਉਹਨਾਂ ਨੂੰ ਦਰਜ ਕਰੇਗਾ।
