28October 2025 Aj Di Awaaj
Punjab Desk ਜ਼ੀਰਕਪੁਰ ਦੇ ਰਮਾਡਾ ਹੋਟਲ ਵਿੱਚ ਐਤਵਾਰ ਰਾਤ ਪਤੀ-ਪਤਨੀ ਵੱਲੋਂ ਹੈਰੋਇਨ ਸੇਵਨ ਕਰਨ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਹੋਟਲ ਪ੍ਰਬੰਧਕਾਂ ਦੀ ਸੂਚਨਾ ਮਿਲਣ ‘ਤੇ ਪੁਲਿਸ ਜਦੋਂ ਮੌਕੇ ‘ਤੇ ਪਹੁੰਚੀ ਤੇ ਕਮਰਾ ਨੰਬਰ 112 ਖੋਲ੍ਹਿਆ ਗਿਆ, ਤਾਂ ਔਰਤ ਬੇਹੋਸ਼ ਹਾਲਤ ਵਿੱਚ ਮਿਲੀ। ਪਹਿਲਾਂ ਪੀਸੀਆਰ ਟੀਮ ਦੇ ਏਐੱਸਆਈ ਰਜਿੰਦਰ ਸਿੰਘ ਮੌਕੇ ‘ਤੇ ਪਹੁੰਚੇ, ਜਦਕਿ ਬਾਅਦ ਵਿੱਚ ਡਿਊਟੀ ਅਫਸਰ ਏਐੱਸਆਈ ਸੁਲੱਖਣ ਸਿੰਘ ਨੇ ਹੋਟਲ ਪਹੁੰਚ ਕੇ ਕਾਰਵਾਈ ਕੀਤੀ।
ਪੁਲਿਸ ਮੁਤਾਬਕ, ਕਮਰੇ ਵਿੱਚ ਰਹਿ ਰਹੇ ਵਿਅਕਤੀ ਨੇ ਆਪਣਾ ਨਾਮ ਅਦਿਤਿਆ ਪ੍ਰਾਪਸ ਪੁੱਤਰ ਪ੍ਰਾਤੀਕ ਮੁਖਰਜੀ (ਉਮਰ 27 ਸਾਲ), ਵਾਸੀ ਬਾਦਸ਼ਾਹ ਰੋਡ ਸੋਹਣਾ, ਗੁਰੁਗ੍ਰਾਮ, ਹਾਲ ਮਕਾਨ ਨੰਬਰ 4-ਡੀ, ਹਾਈਲੈਂਡ ਪਾਰਕ, ਜੀਰਕਪੁਰ ਦੱਸਿਆ। ਉਸਦੀ ਪਤਨੀ ਨੇ ਆਪਣਾ ਨਾਮ ਭਾਵਨਾ ਪਤਨੀ ਅਦਿਤਿਆ ਪ੍ਰਾਪਸ ਮੁਖਰਜੀ (ਉਮਰ 28 ਸਾਲ) ਦੱਸਿਆ।
ਕਮਰੇ ਦੀ ਤਲਾਸ਼ੀ ਦੌਰਾਨ ਪੁਲਿਸ ਨੂੰ ਲਾਈਟਰ, ਵਰਤੇ ਹੋਏ ਫੌਇਲ ਪੇਪਰ ਤੇ ਸਿਗਰਟਾਂ ਦੀਆਂ ਡੱਬੀਆਂ ਮਿਲੀਆਂ। ਦੋਵੇਂ ਨੇ ਕਬੂਲਿਆ ਕਿ ਉਹ ਹੈਰੋਇਨ ਦਾ ਸੇਵਨ ਕਰ ਚੁੱਕੇ ਹਨ। ਇਸ ਤੋਂ ਬਾਅਦ ਦੋਵੇਂ ਖ਼ਿਲਾਫ਼ ਮੁਕੱਦਮਾ ਨੰਬਰ 515 ਮਿਤੀ 26-10-2025 ਤਹਿਤ ਧਾਰਾ 27, 61/85 NDPS ਐਕਟ ਅਧੀਨ ਥਾਣਾ ਜੀਰਕਪੁਰ ਵਿੱਚ ਦਰਜ ਕੀਤਾ ਗਿਆ।
ਪੁੱਛਗਿੱਛ ਦੌਰਾਨ ਅਦਿਤਿਆ ਨੇ ਦੱਸਿਆ ਕਿ ਉਹ ਕਲਕੱਤਾ ਦਾ ਰਹਿਣ ਵਾਲਾ ਹੈ ਅਤੇ ਗੁਰੁਗ੍ਰਾਮ ਵਿੱਚ ਰੀਅਲ ਅਸਟੇਟ ਕੰਪਨੀ ਵਿੱਚ ਨੌਕਰੀ ਕਰਦਾ ਹੈ। ਉਸਦੀ ਪਤਨੀ ਭਾਵਨਾ ਭਿਵਾਨੀ (ਹਰਿਆਣਾ) ਦੀ ਰਹਿਣ ਵਾਲੀ ਹੈ, ਜਿਸਨੇ MSc Chemistry ਕੀਤੀ ਹੋਈ ਹੈ ਤੇ ਇਸ ਵੇਲੇ ਪੀਐਚਡੀ ਕਰ ਰਹੀ ਹੈ। ਦੋਵੇਂ ਨੇ ਲਗਭਗ ਡੇਢ ਸਾਲ ਪਹਿਲਾਂ ਪ੍ਰੇਮ-ਵਿਵਾਹ ਕੀਤਾ ਸੀ।
ਜਾਣਕਾਰੀ ਅਨੁਸਾਰ, ਅਦਿਤਿਆ ਦਾ ਪਿਤਾ ਪ੍ਰਾਤੀਕ ਮੁਖਰਜੀ ਹਾਈਲੈਂਡ ਪਾਰਕ, ਜੀਰਕਪੁਰ ਵਿੱਚ ਰਹਿੰਦਾ ਹੈ ਤੇ ਉਸਦਾ ਇਲਾਜ ਜੇਪੀ ਹਸਪਤਾਲ, ਜੀਰਕਪੁਰ ਵਿੱਚ ਚੱਲ ਰਿਹਾ ਹੈ। ਦੋਵੇਂ ਪਿਤਾ ਦੀ ਤਬੀਅਤ ਬਾਰੇ ਜਾਣਕਾਰੀ ਲੈਣ ਆਏ ਸਨ ਅਤੇ ਹੋਟਲ ਵਿੱਚ ਟਿਕੇ ਹੋਏ ਸਨ। ਪੁਲਿਸ ਇਹ ਵੀ ਜਾਂਚ ਰਹੀ ਹੈ ਕਿ ਹੈਰੋਇਨ ਉਹਨਾਂ ਕੋਲ ਪਹਿਲਾਂ ਤੋਂ ਸੀ ਜਾਂ ਕਿਸੇ ਨੇ ਹੋਟਲ ਦੇ ਅੰਦਰ ਜਾਂ ਬਾਹਰ ਸਪਲਾਈ ਕੀਤੀ। ਇਸ ਲਈ ਹੋਟਲ ਦੇ CCTV ਫੁਟੇਜ ਖੰਗਾਲੇ ਜਾ ਰਹੇ ਹਨ।
