ਅੱਜ ਦੀ ਆਵਾਜ਼ | 16 ਅਪ੍ਰੈਲ 2025
ਸੁਖਨਾ ਝੀਲ ਦੇ ਨੇੜੇ ਯਾਤਰੀਆਂ ਦੀ ਰੌਣਕ – ਚੰਡੀਗੜ੍ਹ ਵਿਚ ਸੈਰ-ਸਪਾਟੇ ਲਈ ਨਵੀਆਂ ਤਿਆਰੀਆਂ
ਸੁਖਨਾ ਝੀਲ ਦੇ ਕਿਨਾਰੇ ਘੁੰਮ ਰਹੇ ਸੈਲਾਨੀਆਂ ਦੀ ਗਤੀਵਿਧੀ ਨੂੰ ਵੇਖਦਿਆਂ, ਯੂ.ਟੀ. ਪ੍ਰਸ਼ਾਸਨ ਨੇ ਚੰਡੀਗੜ੍ਹ ਨੂੰ ਦੇਸ਼ ਦੀਆਂ ਪ੍ਰਮੁੱਖ ਸੈਰ-ਸਪਾਟਾ ਥਾਵਾਂ ਵਿੱਚ ਸ਼ਾਮਲ ਕਰ ਲਿਆ ਹੈ। ਇਸ ਯੋਜਨਾ ਰਾਹੀਂ ਦੇਸੀ ਤੇ ਵਿਦੇਸ਼ੀ ਯਾਤਰੀਆਂ ਲਈ ਆਧੁਨਿਕ ਤੇ ਸੁਵਿਧਾਜਨਕ ਸਹੂਲਤਾਂ ਉਪਲਬਧ ਕਰਵਾਈਆਂ ਜਾਣਗੀਆਂ।
ਹੋਟਲਾਂ ਦੀ ਜਾਣਕਾਰੀ ਹੁਣ ਲਾਈਵ ਸਿਸਟਮ ਰਾਹੀਂ
ਟੂਰਿਜ਼ਮ ਵਿਭਾਗ ਵੱਲੋਂ ਇਕ ਨਵਾਂ ਤੰਤਰ ਲਾਂਚ ਕੀਤਾ ਜਾ ਰਿਹਾ ਹੈ, ਜਿਸ ਰਾਹੀਂ ਚੰਡੀਗੜ੍ਹ ਦੇ ਸਾਰੇ ਹੋਟਲਾਂ ਨੂੰ ਵਿਲੱਖਣ ਪਛਾਣ ਨੰਬਰ (ID) ਅਤੇ ਪਾਸਵਰਡ ਦਿੱਤੇ ਜਾਣਗੇ। ਇਹ ਤੰਤਰ ਹੋਟਲਾਂ ਦੀ ਲਾਈਵ ਜਾਣਕਾਰੀ, ਜਿਵੇਂ ਕਿ ਸੈਲਾਨੀਆਂ ਦੀ ਰਿਹਾਇਸ਼, ਸਿੱਧਾ ਵਿਭਾਗ ਨਾਲ ਸਾਂਝੀ ਕਰੇਗਾ, ਜਿਸ ਨਾਲ ਡਾਟਾ ਸੰਭਾਲਣਾ ਤੇ ਵਿਵਸਥਾ ਕਰਨੀ ਹੋਰ ਆਸਾਨ ਹੋ ਜਾਏਗੀ।
ਮਾਡਲ ਸੂਬਿਆਂ ਤੋਂ ਸਿੱਖਿਆ ਲੈ ਕੇ ਤਿਆਰੀਆਂ
ਚੰਡੀਗੜ੍ਹ ਪ੍ਰਸ਼ਾਸਨ ਨੇ ਆਪਣੀ ਯੋਜਨਾ ਨੂੰ ਪ੍ਰਭਾਵਸ਼ਾਲੀ ਬਣਾਉਣ ਲਈ ਦਿੱਲੀ, ਹਿਮਾਚਲ ਪ੍ਰਦੇਸ਼, ਕੇਰਲਾ, ਹਰਿਆਣਾ ਆਦਿ ਸੂਬਿਆਂ ਦੇ ਟੂਰਿਜ਼ਮ ਮਾਡਲਾਂ ਦਾ ਅਧਿਐਨ ਕੀਤਾ ਹੈ। ਇਸ ਯੋਜਨਾ ਹੇਠ ਨਲਾਈਨ ਟਿਕਟਿੰਗ, ਇਕ-ਝਰੋਖਾ ਨਿਪਟਾਰਾ ਪ੍ਰਣਾਲੀ, ਕੇਂਦਰੀਕ੍ਰਿਤ ਸੈਰ-ਸਪਾਟਾ ਪੋਰਟਲ ਅਤੇ ਟੋਲ-ਮੁਫ਼ਤ ਮਦਦ ਨੰਬਰ ਸ਼ਾਮਲ ਕੀਤੇ ਜਾਣਗੇ। ਸਮੱਗਰੀ ਨੂੰ ਹੋਰ ਪ੍ਰਭਾਵਸ਼ਾਲੀ ਬਣਾਉਣ ਲਈ ਹੋਟਲ ਮਾਲਕਾਂ, ਪਰਾਹੁਣਚਾਰੀ ਉਦਯੋਗ ਅਤੇ ਸੈਰ-ਸਪਾਟਾ ਸੰਸਥਾਵਾਂ ਨਾਲ ਵੀ ਵਿਚਾਰ-ਵਟਾਂਦਰਾ ਕੀਤਾ ਗਿਆ ਹੈ।
ਸਾਲਾਨਾ ਲੱਖਾਂ ਯਾਤਰੀ ਚੰਡੀਗੜ੍ਹ ਆਉਂਦੇ ਨੇ
ਚੰਡੀਗੜ੍ਹ ਵਿੱਚ ਹਰੇਕ ਸਾਲ ਲਗਭਗ 12 ਲੱਖ ਦੇਸੀ ਅਤੇ 30 ਹਜ਼ਾਰ ਵਿਦੇਸ਼ੀ ਯਾਤਰੀ ਆਉਂਦੇ ਹਨ। ਰਾਕ ਗਾਰਡਨ, ਸੁਖਨਾ ਝੀਲ, ਰਾਜਧਾਨੀ ਕੰਪਲੈਕਸ, ਬਰਡ ਪਾਰਕ, ਏਅਰ ਫੋਰਸ ਵਿਰਾਸਤੀ ਕੇਂਦਰ ਅਤੇ ਸਰਕਾਰੀ ਅਜਾਇਬ ਘਰ ਵਰਗੇ ਨਜ਼ਾਰੇ ਇਨ੍ਹਾਂ ਦੀ ਖਾਸ ਪਸੰਦ ਬਣੇ ਹੋਏ ਹਨ। ਪ੍ਰਸ਼ਾਸਨ ਉਮੀਦ ਕਰ ਰਿਹਾ ਹੈ ਕਿ ਨਵੀਆਂ ਯੋਜਨਾਵਾਂ ਰਾਹੀਂ ਇਹ ਅੰਕੜੇ ਹੋਰ ਵਧਣਗੇ।
ਟੂਰਿਜ਼ਮ ਪੁਲਿਸ ਦੀ ਨਵੀਂ ਟੀਮ
30 ਵਿਸ਼ੇਸ਼ ਤੌਰ ‘ਤੇ ਤਿਆਰ ਕੀਤੇ ਟੂਰਿਜ਼ਮ ਪੁਲਿਸ ਮੁਲਾਜ਼ਮ ਨਿਯੁਕਤ ਕੀਤੇ ਜਾਣਗੇ, ਜਿਨ੍ਹਾਂ ਨੂੰ ਹੋਟਲ ਮੈਨੇਜਮੈਂਟ ਇੰਸਟੀਚਿਊਟ ਵਲੋਂ ਵਿਸ਼ੇਸ਼ ਤਰਬੀਅਤ ਦਿੱਤੀ ਜਾਵੇਗੀ। ਇਹ ਕਰਮਚਾਰੀ ਚਿੱਟੇ ਪਹਿਰਾਵੇ ‘ਚ ਹੋਣਗੇ ਅਤੇ ਸੈਲਾਨੀਆਂ ਨੂੰ ਸਹਾਇਤਾ ਤੇ ਸੁਰੱਖਿਆ ਪ੍ਰਦਾਨ ਕਰਨਗੇ।
ਫਿਲਮਾਂ ਦੀ ਸ਼ੂਟਿੰਗ ਹੁਣ ਹੋਏਗੀ ਆਸਾਨ
ਸ਼ਹਿਰ ਵਿੱਚ ਫਿਲਮਾਂ ਦੀ ਸ਼ੂਟਿੰਗ ਲਈ ਇਕ-ਝਰੋਖਾ ਆਗਿਆ ਪ੍ਰਣਾਲੀ ਲਾਗੂ ਕੀਤੀ ਜਾਵੇਗੀ, ਜਿਸ ਨਾਲ ਸ਼ੂਟਿੰਗ ਦੀ ਮਨਜ਼ੂਰੀ ਹੋਰ ਤੇਜ਼ੀ ਨਾਲ ਮਿਲੇਗੀ। ਨਾਲ ਹੀ, ਸਰਟੀਫਾਈਡ ਟੂਰ ਗਾਈਡਾਂ ਦੀ ਗਿਣਤੀ ਵਧਾਈ ਜਾਵੇਗੀ ਅਤੇ ਉਨ੍ਹਾਂ ਦੀਆਂ ਫੀਸਾਂ ਸਰਕਾਰੀ ਵੈਬਸਾਈਟ ‘ਤੇ ਪ੍ਰਕਾਸ਼ਿਤ ਕੀਤੀਆਂ ਜਾਣਗੀਆਂ ਤਾਂ ਜੋ ਯਾਤਰੀਆਂ ਨੂੰ ਪੂਰੀ ਜਾਣਕਾਰੀ ਮਿਲ ਸਕੇ।
