24 ਮਾਰਚ 2026 Aj Di Awaaj
Lifestyle Desk: ਚੇਤ ਨਰਾਤਿਆਂ ਦੀ ਅਸ਼ਟਮੀ ਅਤੇ ਨੌਮੀ ਤਿਥੀ ਨੂੰ ਹਿੰਦੂ ਧਰਮ ਵਿੱਚ ਬਹੁਤ ਮਹੱਤਵਪੂਰਨ ਮੰਨਿਆ ਜਾਂਦਾ ਹੈ। ਇਨ੍ਹਾਂ ਦਿਨਾਂ ‘ਤੇ ਨਰਾਤਿਆਂ ਦੇ ਵਰਤ ਦਾ ਸਮਾਪਨ ਕੀਤਾ ਜਾਂਦਾ ਹੈ ਅਤੇ ਮਾਤਾ ਦੁਰਗਾ ਦੀ ਵਿਸ਼ੇਸ਼ ਪੂਜਾ ਅਰਚਨਾ ਕੀਤੀ ਜਾਂਦੀ ਹੈ। ਮੰਨਿਆ ਜਾਂਦਾ ਹੈ ਕਿ ਜੇਕਰ ਇਸ ਦਿਨ ਵਿਧੀ-ਵਿਧਾਨ ਨਾਲ ਪੂਜਾ ਕੀਤੀ ਜਾਵੇ ਤਾਂ ਮਾਤਾ ਰਾਣੀ ਦੀ ਕਿਰਪਾ ਪ੍ਰਾਪਤ ਹੁੰਦੀ ਹੈ ਅਤੇ ਘਰ ਵਿੱਚ ਸੁੱਖ-ਸਮ੍ਰਿਧੀ ਬਣੀ ਰਹਿੰਦੀ ਹੈ।
ਅਸ਼ਟਮੀ-ਨੌਮੀ ‘ਤੇ ਜ਼ਰੂਰ ਕਰੋ ਇਹ ਕੰਮ
ਨਰਾਤਿਆਂ ਦੇ ਆਖਰੀ ਦਿਨ ਸਵੇਰੇ ਜਲਦੀ ਉੱਠ ਕੇ ਇਸ਼ਨਾਨ ਕਰਨ ਤੋਂ ਬਾਅਦ ਮਾਤਾ ਦੁਰਗਾ ਦੀ ਵਿਧੀ-ਵਿਧਾਨ ਨਾਲ ਪੂਜਾ ਕਰੋ। ਪਰਿਵਾਰ ਸਮੇਤ ਮਾਤਾ ਰਾਣੀ ਅੱਗੇ ਅਰਦਾਸ ਕਰੋ ਅਤੇ ਹਲਵਾ-ਪੂਰੀ ਦਾ ਭੋਗ ਲਗਾਓ। ਇਸ ਦਿਨ ਹਵਨ ਕਰਨਾ ਵੀ ਸ਼ੁਭ ਮੰਨਿਆ ਜਾਂਦਾ ਹੈ। ਮੰਨਿਆ ਜਾਂਦਾ ਹੈ ਕਿ ਇਹ ਸਾਰੇ ਕਰਮ ਕਰਨ ਨਾਲ ਨਰਾਤਿਆਂ ਦੇ ਵਰਤ ਦਾ ਪੂਰਾ ਫਲ ਮਿਲਦਾ ਹੈ।
ਇਸ ਤਰ੍ਹਾਂ ਕਰੋ ਕੰਨਿਆ ਪੂਜਨ
ਅਸ਼ਟਮੀ ਜਾਂ ਨੌਮੀ ਦੇ ਦਿਨ ਕੰਨਿਆ ਪੂਜਨ ਕਰਨਾ ਬਹੁਤ ਜ਼ਰੂਰੀ ਮੰਨਿਆ ਜਾਂਦਾ ਹੈ। ਆਪਣੀ ਸ਼ਰਧਾ ਅਨੁਸਾਰ 2 ਤੋਂ 10 ਸਾਲ ਦੀਆਂ 7, 9 ਜਾਂ 11 ਕੰਨਿਆ ਨੂੰ ਘਰ ਬੁਲਾਇਆ ਜਾਂਦਾ ਹੈ। ਸਭ ਤੋਂ ਪਹਿਲਾਂ ਉਨ੍ਹਾਂ ਦੇ ਪੈਰ ਗੰਗਾਜਲ ਜਾਂ ਸਾਫ਼ ਪਾਣੀ ਨਾਲ ਧੋਏ ਜਾਂਦੇ ਹਨ ਅਤੇ ਆਦਰ ਨਾਲ ਆਸਣ ‘ਤੇ ਬਿਠਾਇਆ ਜਾਂਦਾ ਹੈ।
ਇਸ ਤੋਂ ਬਾਅਦ ਉਨ੍ਹਾਂ ਦੇ ਮੱਥੇ ‘ਤੇ ਰੋਲੀ ਜਾਂ ਕੁੰਕੁਮ ਦਾ ਤਿਲਕ ਲਗਾ ਕੇ ਅਕਸ਼ਤ (ਚਾਵਲ) ਲਗਾਏ ਜਾਂਦੇ ਹਨ। ਕੰਨਿਆ ਨੂੰ ਚੁੰਨੀ ਓਢਾਈ ਜਾਂਦੀ ਹੈ ਅਤੇ ਕਲਾਈ ‘ਤੇ ਮੌਲੀ ਬੰਨੀ ਜਾਂਦੀ ਹੈ। ਫਿਰ ਉਨ੍ਹਾਂ ਨੂੰ ਹਲਵਾ-ਪੂਰੀ ਅਤੇ ਚਣੇ ਦਾ ਪ੍ਰਸਾਦ ਖਿਲਾਇਆ ਜਾਂਦਾ ਹੈ। ਅੰਤ ਵਿੱਚ ਕੰਨਿਆ ਦੇ ਚਰਨ ਛੂਹ ਕੇ ਅਸ਼ੀਰਵਾਦ ਲਿਆ ਜਾਂਦਾ ਹੈ ਅਤੇ ਦਾਨ-ਦੱਖਣਾ ਦੇ ਕੇ ਸਨਮਾਨ ਨਾਲ ਵਿਦਾ ਕੀਤਾ ਜਾਂਦਾ ਹੈ। ਇਸ ਤੋਂ ਬਾਅਦ ਹੀ ਵਰਤ ਖੋਲ੍ਹਿਆ ਜਾਂਦਾ ਹੈ।
ਵਰਤ ਖੋਲ੍ਹਦੇ ਸਮੇਂ ਰੱਖੋ ਇਹ ਗੱਲਾਂ ਦਾ ਧਿਆਨ
- ਵਰਤ ਖੋਲ੍ਹਣ ਤੋਂ ਬਾਅਦ ਵੀ ਪੂਰਾ ਦਿਨ ਸਾਤਵਿਕ ਭੋਜਨ ਹੀ ਕਰੋ।
- ਤਾਮਸਿਕ ਜਾਂ ਬਹੁਤ ਭਾਰੀ ਭੋਜਨ ਤੋਂ ਪਰਹੇਜ਼ ਕਰੋ।
- ਭੋਜਨ ਵਿੱਚ ਆਮ ਨਮਕ ਦੀ ਥਾਂ ਸੇਂਧਾ ਨਮਕ ਵਰਤਣਾ ਚਾਹੀਦਾ ਹੈ।
- ਮਨ ਨੂੰ ਸ਼ਾਂਤ ਰੱਖ ਕੇ ਮਾਤਾ ਰਾਣੀ ਦਾ ਸਿਮਰਨ ਕਰੋ।
- ਅੰਤ ਵਿੱਚ ਮਾਤਾ ਰਾਣੀ ਤੋਂ ਭੁੱਲਾਂ-ਚੁੱਕਾਂ ਲਈ ਮਾਫ਼ੀ ਮੰਗੋ ਅਤੇ ਘਰ ਦੀ ਖੁਸ਼ਹਾਲੀ ਲਈ ਅਰਦਾਸ ਕਰੋ।
