India 31 Oct 2025 AJ DI Awaaj
Sports Desk : ਮਹਿਲਾ ਵਨ ਡੇ ਇੰਟਰਨੈਸ਼ਨਲ ਕ੍ਰਿਕਟ ਵਿੱਚ ਭਾਰਤ ਨੇ ਇਤਿਹਾਸ ਰਚ ਦਿੱਤਾ ਹੈ। ਵਿਸ਼ਵ ਕੱਪ 2025 ਦੇ ਰੋਮਾਂਚਕ ਸੈਮੀਫਾਈਨਲ ‘ਚ ਭਾਰਤ ਨੇ ਆਸਟ੍ਰੇਲੀਆ ਨੂੰ 5 ਵਿਕਟਾਂ ਨਾਲ ਹਰਾਕੇ ਨਾ ਸਿਰਫ਼ ਫਾਈਨਲ ਵਿੱਚ ਜਗ੍ਹਾ ਬਣਾਈ, ਸਗੋਂ ਵਨ ਡੇ ਕ੍ਰਿਕਟ ਇਤਿਹਾਸ ਵਿੱਚ ਸਭ ਤੋਂ ਵੱਡਾ ਟੀਚਾ ਪਿੱਛਾ ਕਰਨ ਦਾ ਨਵਾਂ ਵਿਸ਼ਵ ਰਿਕਾਰਡ ਵੀ ਬਣਾਇਆ।
ਆਸਟ੍ਰੇਲੀਆ ਨੇ ਟਾਸ ਜਿੱਤ ਕੇ ਪਹਿਲਾਂ ਬੱਲੇਬਾਜ਼ੀ ਕੀਤੀ ਅਤੇ 50 ਓਵਰਾਂ ਵਿੱਚ 338 ਦੌੜਾਂ ਬਣਾਈਆਂ। ਫੋਬੀ ਲਿਚਫੀਲਡ ਨੇ ਸ਼ਾਨਦਾਰ 119 ਦੌੜਾਂ, ਐਲਿਸ ਪੈਰੀ ਨੇ 77 ਦੌੜਾਂ, ਅਤੇ ਐਸ਼ਲੇ ਗਾਰਡਨਰ ਨੇ 63 ਦੌੜਾਂ ਦਾ ਯੋਗਦਾਨ ਦਿੱਤਾ। ਭਾਰਤ ਲਈ ਸ਼੍ਰੀ ਚਰਨੀ ਅਤੇ ਦੀਪਤੀ ਸ਼ਰਮਾ ਨੇ 2-2 ਵਿਕਟਾਂ ਹਾਸਲ ਕੀਤੀਆਂ।
ਜਦੋਂ ਭਾਰਤ 339 ਦੌੜਾਂ ਦੇ ਵਿਸ਼ਾਲ ਟੀਚੇ ਦਾ ਪਿੱਛਾ ਕਰਨ ਉਤਰੀ, ਟੀਮ ਦੀ ਸ਼ੁਰੂਆਤ ਚੰਗੀ ਨਹੀਂ ਸੀ — ਪਹਿਲੀ ਵਿਕਟ 13 ‘ਤੇ ਅਤੇ ਦੂਜੀ 59 ਦੌੜਾਂ ‘ਤੇ ਡਿੱਗੀ। ਪਰ ਇਸ ਤੋਂ ਬਾਅਦ ਕਪਤਾਨ ਹਰਮਨਪ੍ਰੀਤ ਕੌਰ (89) ਅਤੇ ਜੇਮੀਮਾ ਰੌਡਰਿਗਜ਼ (127 ਨਾਟ ਆਉਟ) ਨੇ ਮਿਲ ਕੇ 150 ਤੋਂ ਵੱਧ ਦੌੜਾਂ ਦੀ ਸ਼ਾਨਦਾਰ ਸਾਂਝੇਦਾਰੀ ਕਰਕੇ ਮੈਚ ਦਾ ਰੁਖ ਬਦਲ ਦਿੱਤਾ।
ਅਖ਼ੀਰ ਵਿੱਚ ਦੀਪਤੀ ਸ਼ਰਮਾ (17 ਗੇਂਦਾਂ ‘ਤੇ 24 ਦੌੜਾਂ), ਰਿਚਾ ਘੋਸ਼ (16 ਗੇਂਦਾਂ ‘ਤੇ 26 ਦੌੜਾਂ) ਅਤੇ ਅਮਨਜੋਤ ਕੌਰ (8 ਗੇਂਦਾਂ ‘ਤੇ 15 ਨਾਟ ਆਉਟ) ਨੇ ਤੇਜ਼ ਪਾਰੀ ਖੇਡ ਕੇ ਟੀਮ ਨੂੰ 49ਵੇਂ ਓਵਰ ਦੀ ਤੀਜੀ ਗੇਂਦ ‘ਤੇ ਟੀਚਾ ਪੂਰਾ ਕਰਵਾ ਦਿੱਤਾ।
ਇਸ ਜਿੱਤ ਨਾਲ ਭਾਰਤ ਨੇ ਨਾ ਕੇਵਲ ਫਾਈਨਲ ਵਿੱਚ ਆਪਣੀ ਜਗ੍ਹਾ ਪੱਕੀ ਕੀਤੀ ਹੈ, ਸਗੋਂ ਮਹਿਲਾ ਵਨ ਡੇ ਕ੍ਰਿਕਟ ਵਿੱਚ ਸਭ ਤੋਂ ਵੱਡਾ (339 ਦੌੜਾਂ ਦਾ) ਟੀਚਾ ਪਿੱਛਾ ਕਰਨ ਦਾ ਨਵਾਂ ਵਰਲਡ ਰਿਕਾਰਡ ਵੀ ਆਪਣੇ ਨਾਮ ਕਰ ਲਿਆ ਹੈ। ਇਸ ਤੋਂ ਪਹਿਲਾਂ ਇਹ ਰਿਕਾਰਡ ਆਸਟ੍ਰੇਲੀਆ ਦੇ ਨਾਮ ਸੀ, ਜਿਸਨੇ 331 ਦੌੜਾਂ ਦਾ ਟੀਚਾ ਭਾਰਤ ਵਿਰੁੱਧ ਪੂਰਾ ਕੀਤਾ ਸੀ।ਹੁਣ ਭਾਰਤ ਦੀਆਂ ਨਿਗਾਹਾਂ ਵਿਸ਼ਵ ਕੱਪ ਟ੍ਰਾਫੀ ‘ਤੇ ਟਿਕੀਆਂ ਹਨ।
 ਟੀਚਾ ਪਿੱਛਾ ਕਰਨ ਦਾ ਨਵਾਂ ਵਰਲਡ ਰਿਕਾਰਡ){kind=link}