ਅੱਜ ਦੀ ਆਵਾਜ਼ | 10 ਅਪ੍ਰੈਲ 2025
ਪੰਚਕੂਲਾ – ਭਾਰਤ ਦੇ ਚੰਪੀਅਨ ਜੈਵਲਿਨ ਥ੍ਰੋਅਰ ਨੀਰਜ ਚੋਪੜਾ ਇਕ ਵਾਰ ਫਿਰ ਦੇਸ਼ੀ ਮੈਦਾਨ ਵਿੱਚ ਨਜ਼ਰ ਆਉਣਗੇ, ਜਦੋਂ 24 ਮਈ ਨੂੰ ਤਾਈ ਦੇਵੀ ਲਾਲ ਸਟੇਡੀਅਮ, ਪੰਚਕੂਲਾ ਵਿੱਚ ਵਿਸ਼ੇਸ਼ ਜੈਵਲਿਨ ਥ੍ਰੋ ਮੁਕਾਬਲਾ ਕਰਵਾਇਆ ਜਾਵੇਗਾ। ਇਹ ਸਟੇਡੀਅਮ ਉਹੀ ਹੈ ਜਿੱਥੋਂ ਨੀਰਜ ਨੇ ਆਪਣੇ ਕਰੀਅਰ ਦੀ ਸ਼ੁਰੂਆਤ ਕੀਤੀ ਸੀ। ਇਹ ਟੂਰਨਾਮੈਂਟ ਵਰਲਡ ਐਥਲੈਟਿਕਸ ਦੁਆਰਾ ਮਨਜ਼ੂਰ ਕੀਤਾ ਗਿਆ ਹੈ ਅਤੇ ਇਸ ਨੂੰ ‘ਏ’ ਸ਼੍ਰੇਣੀ ਦੀ ਮਾਨਤਾ ਮਿਲੀ ਹੈ, ਜੋ ਕਿ ਕੌਂਟੀਨੈਂਟਲ ਟੂਰ ਗੋਲਡ ਪੱਧਰ ਦੀ ਸਮਾਨਤਾ ਰੱਖਦੀ ਹੈ। ਇਹ ਮੁਕਾਬਲਾ ਵਿਸ਼ਵ ਐਥਲੈਟਿਕਸ ਚੈਂਪੀਅਨਸ਼ਿਪ 2025 (ਟੋਕੀਓ, 13-21 ਸਤੰਬਰ) ਲਈ ਯੋਗਤਾ ਪ੍ਰਾਪਤ ਕਰਨ ਵਾਲਾ ਸਮਾਰੋਹ ਵੀ ਹੋਵੇਗਾ। ਦੁਨੀਆ ਦੇ ਚੋਟੀ ਦੇ 10 ਜੈਵਲਿਨ ਥ੍ਰੋਅ ਖਿਡਾਰੀ, ਜਿਨ੍ਹਾਂ ਵਿੱਚ ਮਰਦ ਅਤੇ ਮਹਿਲਾ ਦੋਵੇਂ ਸ਼ਾਮਲ ਹਨ, ਇਸ ਟੂਰਨਾਮੈਂਟ ਵਿੱਚ ਹਿੱਸਾ ਲੈਣਗੇ। ਤਿਆਰੀਆਂ ਜ਼ੋਰ ਸ਼ੋਰ ਨਾਲ ਚੱਲ ਰਹੀਆਂ ਹਨ ਅਤੇ ਟਕਨੀਕੀ ਟੀਮਾਂ ਅਪ੍ਰੈਲ ਦੇ ਆਖਰੀ ਹਫ਼ਤੇ ਤੱਕ ਪੰਚਕੂਲਾ ਪਹੁੰਚ ਜਾਣਗੀਆਂ। ਇਹ ਮੁਕਾਬਲਾ ਨਾ ਸਿਰਫ ਨੀਰਜ ਚੋਪੜਾ ਦੀ ਭਾਰਤ ‘ਚ ਵਾਪਸੀ ਹੋਵੇਗੀ, ਸਗੋਂ ਉਸਦੇ ਸਾਬਕਾ ਕੋਚਾਂ ਅਤੇ ਸਹਿਯੋਗੀ ਕਰਮਚਾਰੀਆਂ ਲਈ ਵੀ ਇੱਕ ਭਾਵਨਾਤਮਕ ਪਲ ਹੋਵੇਗਾ। ਇਸ ਸਮਾਗਮ ਨੂੰ ਅਥਲੈਟਿਕਸ ਫੈਡਰੇਸ਼ਨ ਆਫ ਇੰਡੀਆ (AFI) ਅਤੇ ਵਿਸ਼ਵ ਐਥਲੈਟਿਕਸ ਦੀ ਸਾਂਝਦਾਰੀ ਨਾਲ ਆਯੋਜਿਤ ਕੀਤਾ ਜਾ ਰਿਹਾ ਹੈ। ਉਮੀਦ ਕੀਤੀ ਜਾ ਰਹੀ ਹੈ ਕਿ ਇਹ ਮੁਕਾਬਲਾ ਭਾਰਤ ਵਿੱਚ ਵਿਸ਼ਵ ਪੱਧਰੀ ਜੈਵਲਿਨ ਥ੍ਰੋ ਮੁਕਾਬਲਿਆਂ ਦੀ ਇੱਕ ਨਵੀਂ ਰੀਤ ਸ਼ੁਰੂ ਕਰੇਗਾ, ਜਿਸ ਨਾਲ ਭਵਿੱਖ ਵਿੱਚ ਹੋਰ ਅੰਤਰਰਾਸ਼ਟਰੀ ਟਰੈਕ ਅਤੇ ਫੀਲਡ ਸਮਾਗਮਾਂ ਦਾ ਰਾਹ ਖੁੱਲੇਗਾ।
