06 ਫਰਵਰੀ 2026 ਅੱਜ ਦੀ ਆਵਾਜ਼
Business Desk: ਚਾਂਦੀ ਦੀਆਂ ਕੀਮਤਾਂ ਵਿੱਚ ਲਗਾਤਾਰ ਗਿਰਾਵਟ ਜਾਰੀ ਹੈ। ਪਿਛਲੇ ਸਿਰਫ਼ 7 ਦਿਨਾਂ ਦੌਰਾਨ ਚਾਂਦੀ ਆਪਣੇ ਉੱਚੇ ਪੱਧਰ ਤੋਂ ਲਗਭਗ ₹1.90 ਲੱਖ ਪ੍ਰਤੀ ਕਿਲੋਗ੍ਰਾਮ ਤੱਕ ਸਸਤੀ ਹੋ ਚੁੱਕੀ ਹੈ। ਇਸ ਤੇਜ਼ ਡਿੱਗਾਵਟ ਕਾਰਨ ਨਿਵੇਸ਼ਕਾਂ, ਜਵੈਲਰਾਂ ਅਤੇ ਥੋਕ ਵਪਾਰੀਆਂ ਵਿੱਚ ਚਿੰਤਾ ਦਾ ਮਾਹੌਲ ਹੈ।
ਮਲਟੀ ਕਮੋਡਿਟੀ ਐਕਸਚੇਂਜ (MCX) ਦੇ ਅੰਕੜਿਆਂ ਮੁਤਾਬਕ, 29 ਜਨਵਰੀ ਨੂੰ ਚਾਂਦੀ ਨੇ ₹4,20,000 ਪ੍ਰਤੀ ਕਿਲੋਗ੍ਰਾਮ ਦਾ ਇਤਿਹਾਸਕ ਉੱਚਾ ਪੱਧਰ ਛੂਹਿਆ ਸੀ। ਪਰ ਅਗਲੇ ਹੀ ਦਿਨ ਤੋਂ ਕੀਮਤਾਂ ਵਿੱਚ ਭਾਰੀ ਗਿਰਾਵਟ ਆਉਣੀ ਸ਼ੁਰੂ ਹੋ ਗਈ। ਵਿਚਕਾਰ ਦੋ ਦਿਨਾਂ ਲਈ ਹਲਕੀ ਤੇਜ਼ੀ ਵੇਖੀ ਗਈ, ਪਰ 5 ਫਰਵਰੀ ਤੋਂ ਚਾਂਦੀ ਮੁੜ ਡਿੱਗਣ ਲੱਗੀ, ਜੋ 6 ਫਰਵਰੀ ਤੱਕ ਵੀ ਜਾਰੀ ਰਹੀ।
MCX ‘ਤੇ ਅੱਜ ਚਾਂਦੀ ਦਾ ਹਾਲ
ਸ਼ੁੱਕਰਵਾਰ, 6 ਫਰਵਰੀ ਨੂੰ ਦੁਪਹਿਰ 2 ਵਜੇ ਤੱਕ MCX ‘ਤੇ ਚਾਂਦੀ 7 ਦਿਨਾਂ ਦੇ ਸਭ ਤੋਂ ਹੇਠਲੇ ਪੱਧਰ ₹2,29,187 ਪ੍ਰਤੀ ਕਿਲੋਗ੍ਰਾਮ ‘ਤੇ ਆ ਗਈ। ਇਸ ਤਰ੍ਹਾਂ, ਚਾਂਦੀ ਆਪਣੇ ਆਲ-ਟਾਈਮ ਹਾਈ ਤੋਂ ਲਗਭਗ ₹1.90 ਲੱਖ ਤੱਕ ਡਿੱਗ ਚੁੱਕੀ ਹੈ। ਖ਼ਬਰ ਲਿਖੇ ਜਾਣ ਸਮੇਂ ਚਾਂਦੀ 3% ਦੀ ਗਿਰਾਵਟ ਨਾਲ ₹2,36,500 ਪ੍ਰਤੀ ਕਿਲੋਗ੍ਰਾਮ ‘ਤੇ ਕਾਰੋਬਾਰ ਕਰ ਰਹੀ ਸੀ, ਜਦਕਿ ਦਿਨ ਦਾ ਉੱਚਾ ਪੱਧਰ ₹2,43,277 ਰਿਹਾ।
IBJA ਰੇਟਾਂ ‘ਚ ਵੀ ਕਮੀ
ਇੰਡੀਆ ਬੁਲੀਅਨ ਐਂਡ ਜਵੈਲਰਜ਼ ਐਸੋਸੀਏਸ਼ਨ (IBJA) ਮੁਤਾਬਕ, ਅੱਜ ਦੁਪਹਿਰ 12 ਵਜੇ ਤੱਕ ਚਾਂਦੀ ਦਾ ਭਾਅ ₹2,41,184 ਪ੍ਰਤੀ ਕਿਲੋਗ੍ਰਾਮ ਰਿਹਾ। ਇਸ ਤੋਂ ਇੱਕ ਦਿਨ ਪਹਿਲਾਂ ਇਹ ਦਰ ₹2,52,232 ਸੀ, ਯਾਨੀ ਸਿਰਫ਼ ਇੱਕ ਦਿਨ ਵਿੱਚ ₹11,048 ਦੀ ਗਿਰਾਵਟ ਦਰਜ ਕੀਤੀ ਗਈ। 29 ਜਨਵਰੀ ਤੋਂ ਲੈ ਕੇ ਹੁਣ ਤੱਕ ਚਾਂਦੀ ਲਗਭਗ ₹1.38 ਲੱਖ ਤੱਕ ਸਸਤੀ ਹੋ ਚੁੱਕੀ ਹੈ।
ਕੀ 25 ਫਰਵਰੀ ਤੱਕ ਹੋਰ ਡਿੱਗੇਗੀ ਚਾਂਦੀ?
ਕੇਡੀਆ ਐਡਵਾਈਜ਼ਰੀ ਦੇ ਡਾਇਰੈਕਟਰ ਅਜੇ ਕੇਡੀਆ ਦਾ ਕਹਿਣਾ ਹੈ ਕਿ ਚਾਂਦੀ ਦੀ ਗਿਰਾਵਟ ਅਜੇ ਰੁਕਣ ਵਾਲੀ ਨਹੀਂ ਹੈ। ਉਨ੍ਹਾਂ ਮੁਤਾਬਕ, ਚੀਨ ਵਿੱਚ ਲੂਨਰ ਨਿਊ ਇਅਰ ਦੇ ਤਿਉਹਾਰ 17 ਤੋਂ 25 ਫਰਵਰੀ ਤੱਕ ਮਨਾਏ ਜਾਣਗੇ, ਜਿਸ ਦੌਰਾਨ ਉਥੇ ਬਾਜ਼ਾਰ ਅਤੇ ਫੈਕਟਰੀਆਂ ਬੰਦ ਰਹਿੰਦੀਆਂ ਹਨ। ਇਸ ਨਾਲ ਚਾਂਦੀ ਦੀ ਮੰਗ ਵਿੱਚ ਵੱਡੀ ਕਮੀ ਆਉਂਦੀ ਹੈ, ਜੋ ਕੀਮਤਾਂ ‘ਤੇ ਹੋਰ ਦਬਾਅ ਪਾ ਸਕਦੀ ਹੈ। ਮਾਹਿਰਾਂ ਦਾ ਅੰਦਾਜ਼ਾ ਹੈ ਕਿ ਚਾਂਦੀ ₹2 ਲੱਖ ਪ੍ਰਤੀ ਕਿਲੋਗ੍ਰਾਮ ਤੋਂ ਵੀ ਹੇਠਾਂ ਜਾ ਸਕਦੀ ਹੈ।
ਚਾਂਦੀ ਦੀਆਂ ਕੀਮਤਾਂ ਵਿੱਚ ਆ ਰਹੀ ਇਸ ਤੇਜ਼ ਗਿਰਾਵਟ ਨੇ ਗਹਿਣਿਆਂ ਦੀ ਖਰੀਦਦਾਰੀ ਅਤੇ ਬੁਲੀਅਨ ਟ੍ਰੇਡਿੰਗ ਦੋਵਾਂ ‘ਤੇ ਅਸਰ ਪਾਉਣਾ ਸ਼ੁਰੂ ਕਰ ਦਿੱਤਾ ਹੈ। ਨਿਵੇਸ਼ਕ ਇਸ ਸਮੇਂ ਕਾਫੀ ਸਤਰਕ ਰਵੱਈਆ ਅਪਣਾ ਰਹੇ ਹਨ।
