ਸੰਗਰੂਰ ਪੁਲਿਸ ਨੇ ਗੁੰਝਲਦਾਰ ਕਤਲ ਦੀ ਗੁੱਥੀ ਸੁਲਝਾਈ

ਸੰਗਰੂਰ, 26 ਫਰਵਰੀ 2026 AJ DI Awaaj

Punjab Desk :  ਐਸ.ਐਸ.ਪੀ ਸੰਗਰੂਰ ਸਰਤਾਜ ਸਿੰਘ ਚਾਹਲ (ਆਈ.ਪੀ.ਐਸ) ਨੇ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ ਸੰਗਰੂਰ ਪੁਲਿਸ ਵੱਲੋਂ ਮਾੜੇ ਅਨਸਰਾਂ ਖਿਲਾਫ ਚਲਾਈ ਗਈ ਮੁਹਿੰਮ ਤਹਿਤ ਕਾਰਵਾਈ ਕਰਦੇ ਹੋਏ ਥਾਣਾ ਖਨੌਰੀ ਦੇ ਖ਼ੇਤਰ ਵਿੱਚ ਕਰੀਬ ਢਾਈ ਮਹੀਨੇ ਪਹਿਲਾਂ ਹੋਏ ਕਤਲ ਦੀ ਗੁੱਥੀ ਨੂੰ ਸੁਲਝਾਉਂਦੇ ਹੋਏ ਇਕ ਦੋਸ਼ੀ ਨੂੰ ਗ੍ਰਿਫਤਾਰ ਕੀਤਾ ਗਿਆ ਹੈ।

ਐਸ.ਐਸ.ਪੀ ਨੇ ਦੱਸਿਆ ਕਿ ਮਿਤੀ 25 ਨਵੰਬਰ 2025 ਨੂੰ ਕ੍ਰਿਸ਼ਨ ਸਿੰਘ ਪੁੱਤਰ ਪ੍ਰਿਥੀ ਸਿੰਘ ਵਾਸੀ ਰਾਮਗੜ ਗੁਜਰਾਂ, ਥਾਣਾ ਖਨੌਰੀ ਦੀ ਪਿੰਡ ਦੇ ਖੇਤ ਵਿੱਚ ਬਣੀ ਪਾਣੀ ਵਾਲੀ ਖੇਲ ਵਿੱਚੋਂ ਲਾਸ਼ ਮਿਲੀ ਸੀ, ਜਿਸਦੀ ਮੌਤ ਉਸ ਸਮੇਂ ਕੁਦਰਤੀ ਅਤੇ ਅਚਾਨਕ ਪਾਣੀ ਵਿਚ ਡੁੱਬਣ ਕਾਰਨ ਜਾਪਣ ਕਰਕੇ ਉਸਦਾ ਸੰਸਕਾਰ ਕਰ ਦਿੱਤਾ ਗਿਆ ਸੀ । ਫਿਰ ਕਰੀਬ ਡੇਢ ਮਹੀਨੇ ਬਾਅਦ ਟਾਟਾ ਏਆਈਏ ਲਾਈਫ ਇੰਸ਼ੋਰੈਂਸ ਕੰਪਨੀ ਵੱਲੋਂ ਇੱਕ ਬੀਮੇ ਦੀ ਪਾਲਿਸੀ ਡਾਕ ਰਾਹੀਂ ਮ੍ਰਿਤਕ ਦੇ ਘਰ ਦੇ ਪਤੇ ‘ਤੇ ਆਈ ਜੋ ਮ੍ਰਿਤਕ ਕ੍ਰਿਸ਼ਨ ਦੇ ਨਾਮ ‘ਤੇ ਸੀ ਤੇ ਮਿਤੀ 19 ਨਵੰਬਰ 2025 ਨੂੰ ਇਹ ਪਾਲਿਸੀ ਕਰਵਾਈ ਗਈ ਸੀ, ਜਿਸ ਵਿੱਚ ਨੋਮਿਨੀ ਸੋਨੂੰ ਲਿਖਿਆ ਹੋਇਆ ਸੀ ਤੇ ਉਸਦੀ ਪਹਿਲੀ ਕਿਸ਼ਤ ਵੀ ਭਰੀ ਹੋਈ ਸੀ। ਜਿਸ ਤੋਂ ਕੁਝ ਸਮੇਂ ਬਾਅਦ ਹੀਰੋ ਫਾਇਨਾਂਸ ਕੰਪਨੀ ਭਵਾਨੀਗੜ੍ਹ ਤੋਂ ਕੁਝ ਮੁਲਾਜਮ ਮ੍ਰਿਤਕ ਦੇ ਘਰ ਆਏ ਤੇ ਉਨਾਂ ਦੱਸਿਆ ਕਿ ਕ੍ਰਿਸ਼ਨ ਉਕਤ ਨੇ ਉਨਾਂ ਪਾਸੋਂ ਇੱਕ ਸਕਾਰਪੀਓ ਗੱਡੀ ‘ਤੇ ਲੋਨ ਕਰਵਾਇਆ ਹੈ, ਜਿਸਦੀ ਕ੍ਰਿਸ਼ਨ ਨੇ ਅਜੇ ਤੱਕ ਕਿਸ਼ਤ ਨਹੀ ਭਰੀ ਹੈ ਤੇ ਇਸ ਲੋਨ ‘ਤੇ ਵੀ ਇੱਕ ਬੀਮਾ ਕ੍ਰਿਸ਼ਨ ਉਕਤ ਦੇ ਨਾਮ ‘ਤੇ ਕਰਵਾਇਆ ਹੋਇਆ ਹੈ ਜਿਸ ਵਿੱਚ ਵੀ ਨੋਮਿਨੀ ਸੋਨੂੰ ਉਕਤ ਹੈ ਤੇ ਇਹ ਲੋਨ ਸੋਨੂੰ ਪੁੱਤਰ ਮਦਨ ਲਾਲ ਅਤੇ ਉਸਦੇ ਦੋਸਤ ਗੁਰਪ੍ਰੀਤ ਸਿੰਘ ਉਰਫ ਸੋਨੀ ਪੁੱਤਰ ਸਹੇਲਾ ਰਾਮ ਵਾਸੀ ਰਾਮਗੜ ਗੁੱਜਰਾਂ ਨੇ ਹਮਸਵਰਾ ਹੋ ਕੇ ਕਰਵਾਇਆ ਗਿਆ ਸੀ। ਜਿਸ ਕਰਕੇ ਮ੍ਰਿਤਕ ਕ੍ਰਿਸ਼ਨ ਉਕਤ ਦੀ ਮੌਤ ਸਬੰਧੀ ਸ਼ੱਕ ਹੋਣ ‘ਤੇ ਮੁਕੱਦਮਾ ਨੰਬਰ 18 ਮਿਤੀ 22.02.2026 ਅ/ਧ 103, 3(5) BNS ਥਾਣਾ ਖਨੌਰੀ ਬਰਖਿਲਾਫ ਸੋਨੂੰ ਅਤੇ ਗੁਰਪ੍ਰੀਤ ਸਿੰਘ ਉਰਫ ਸੋਨੀ ਉਕਤ ਵਾਸੀ ਰਾਮਗੜ ਗੁੱਜਰਾਂ, ਥਾਣਾ ਖਨੌਰੀ ਦਰਜ ਰਜਿਸਟਰ ਕਰਕੇ ਤਫਤੀਸ਼ ਅਮਲ ਵਿੱਚ ਲਿਆਂਦੀ ਗਈ।

ਮੁਕੱਦਮਾ ਦੀ ਡੂੰਘਾਈ ਨਾਲ ਤਫਤੀਸ਼ ਅਮਲ ਵਿੱਚ ਲਿਆਉਣ ਸਬੰਧੀ ਸ੍ਰੀ ਦਵਿੰਦਰ ਅੰਤਰੀ, ਕਪਤਾਨ ਪੁਲਿਸ (ਇੰਨਵੈਸਟੀਗੇਸ਼ਨ) ਸੰਗਰੂਰ ਦੀ ਯੋਗ ਅਗਵਾਈ ਹੇਠ ਸ੍ਰੀ ਦਲਜੀਤ ਸਿੰਘ ਵਿਰਕ ਉਪ ਕਪਤਾਨ ਪੁਲਿਸ (ਡਿਟੈਕਟਿਵ) ਸੰਗਰੂਰ ਅਤੇ ਸ੍ਰੀ ਜਸਕਰਨ ਸਿੰਘ, ਉਪ ਕਪਤਾਨ ਪੁਲਿਸ ਸਬ ਡਵੀਜਨ ਮੂਨਕ ਦੀ ਨਿਗਰਾਨੀ ਹੇਠ ਇੰਸਪੈਕਟਰ ਸੰਦੀਪ ਸਿੰਘ, ਇੰਚਾਰਜ ਸੀ.ਆਈ.ਏ ਸੰਗਰੂਰ ਅਤੇ ਥਾਣੇਦਾਰ ਬਾਬੂ ਸਿੰਘ, ਮੁੱਖ ਅਫਸਰ ਥਾਣਾ ਖਨੌਰੀ ਦੀਆਂ ਟੀਮਾਂ ਬਣਾ ਕੇ ਟੈਕਨੀਕਲ ਢੰਗ ਨਾਲ ਤਫਤੀਸ਼ ਅਮਲ ਵਿੱਚ ਲਿਆਂਦੀ ਗਈ।

ਤਫਤੀਸ਼ ਦੌਰਾਨ ਮਿਤੀ 22 ਫਰਵਰੀ 2026 ਨੂੰ ਦੋਸ਼ੀ ਸੋਨੂੰ ਉਕਤ ਨੂੰ ਗ੍ਰਿਫਤਾਰ ਕਰਕੇ ਪੁੱਛ-ਗਿੱਛ ਕੀਤੀ ਗਈ। ਪੁੱਛ-ਗਿੱਛ ਦੌਰਾਨ ਦੋਸ਼ੀ ਸੋਨੂੰ ਨੇ ਮੰਨਿਆ ਕਿ ਕ੍ਰਿਸ਼ਨ ਉਕਤ ਦਾ ਵਿਆਹ ਨਹੀ ਹੋਇਆ ਸੀ, ਜੋ ਸ਼ਰਾਬ ਪੀਣ ਦਾ ਆਦੀ ਸੀ। ਸੋਨੂੰ ਅਤੇ ਉਸਦੇ ਦੋਸਤ ਗੁਰਪ੍ਰੀਤ ਸਿੰਘ ਉਰਫ ਸੋਨੀ ਨੇ ਸ਼ਾਜਿਸ ਤਹਿਤ ਕ੍ਰਿਸ਼ਨ ਉਕਤ ਦੇ ਨਾਮ ‘ਤੇ ਮਿਤੀ 01.08.2025 ਨੂੰ ਯੈੱਸ ਬੈਂਕ ਟੋਹਾਣਾ ਵਿਖੇ ਖਾਤਾ ਖੁਲਵਾਇਆ ਸੀ, ਫਿਰ ਉਨ੍ਹਾਂ ਨੇ ਇੱਕ ਸਕਾਰਪੀਓ ਗੱਡੀ ਨੰਬਰ ਐਚ.ਆਰ 27-ਜੀ-8794 ਪੁਰਾਣੀ ਖਰੀਦ ਕੀਤੀ, ਜਿਸ ‘ਤੇ ਹੀਰੋ ਫਿੰਕਰੋਪ ਲਿਮ. ਤੋਂ ਕ੍ਰਿਸ਼ਨ ਉਕਤ ਦੇ ਨਾਮ ‘ਤੇ 8,12,538/- ਰੁਪਏ ਦਾ ਲੋਨ ਕਰਵਾਇਆ ਅਤੇ ਉਸ ਲੋਨ ‘ਤੇ ਐਚਡੀਐੱਫਸੀ ਲਾਈਫ ਇਨਸ਼ੋਰੈਂਸ ਕੰਪਨੀ ਲਿਮ. ਤੋਂ ਮ੍ਰਿਤਕ ਕ੍ਰਿਸ਼ਨ ਦੇ ਨਾਮ ‘ਤੇ ਬੀਮਾ ਕਰਾਇਆ, ਜਿਸਦਾ ਨੋਮਿਨੀ ਸੋਨੂੰ ਖੁੱਦ ਬਣ ਗਿਆ ਸੀ। ਫਿਰ ਉਨ੍ਹਾਂ ਨੇ ਕ੍ਰਿਸ਼ਨ ਉਕਤ ਦੇ ਨਾਮ ‘ਤੇ ਮਿਤੀ 19.11.2025 ਨੂੰ ਟਾਟਾ ਏਆਈਏ ਲਾਈਫ ਇੰਸ਼ੋਰੈਂਸ ਕੰਪਨੀ ਤੋਂ 15 ਲੱਖ ਰੁਪਏ ਦਾ ਬੀਮਾ ਕਰਵਾਇਆ ਅਤੇ ਬੀਮੇ ਦੀ ਸਲਾਨਾ ਕਿਸ਼ਤ 1,35,223/- ਰੁਪਏ ਉਸਨੇ ਖੁਦ ਭਰੀ ਸੀ ਅਤੇ ਉਸਦਾ ਵੀ ਉਹ ਖੁਦ ਨੋਮਿਨੀ ਬਣ ਗਿਆ ਸੀ। ਫਿਰ ਉਹ ਅਤੇ ਉਸਦਾ ਦੋਸਤ ਗੁਰਪ੍ਰੀਤ ਸਿੰਘ ਉਰਫ ਸੋਨੀ ਉਕਤ ਮਿਤੀ 24.11.2025 ਦੀ ਸ਼ਾਮ ਨੂੰ ਕ੍ਰਿਸ਼ਨ ਨਾਲ ਇੱਕ ਮੋਟਰ ਤੇ ਬੈਠ ਕੇ ਤਿੰਨਾਂ ਨੇ ਪਹਿਲਾਂ ਇਕੱਠੇ ਸ਼ਰਾਬ ਪੀਤੀ ਤੇ ਜਦੋਂ ਕ੍ਰਿਸ਼ਨ ਸ਼ਰਾਬੀ ਹੋ ਗਿਆ ਤਾਂ ਦੋਵਾਂ ਨੇ ਕ੍ਰਿਸ਼ਨ ਨੂੰ ਪਾਣੀ ਵਾਲੀ ਖੇਲ ਵਿੱਚ ਮੂੰਹ ਡਬੋ ਕੇ ਉਸਦਾ ਕਤਲ ਕਰ ਦਿੱਤਾ ਤੇ ਮੌਕੇ ਤੋਂ ਭੱਜ ਗਏ। ਦੋਸ਼ੀ ਸੋਨੂੰ ਉਕਤ ਦਾ ਰਿਮਾਂਡ ਹਾਸਲ ਕਰਕੇ ਪੁੱਛ-ਗਿੱਛ ਕੀਤੀ ਗਈ, ਹੋਰ ਅਹਿਮ ਖੁਲਾਸੇ ਹੋਣ ਦੀ ਸੰਭਾਵਨਾ ਹੈ।