ਰੁੜਕੀ (ਉਤਰਾਖੰਡ): 25 Oct 2025 AJ DI Awaaj
National Desk : ਉਤਰਾਖੰਡ ਦੇ ਰੁੜਕੀ ਤੋਂ ਇੱਕ ਹੈਰਾਨੀਜਨਕ ਮਾਮਲਾ ਸਾਹਮਣੇ ਆਇਆ ਹੈ, ਜਿਥੇ ਇੱਕ ਭਿਖਾਰਨ ਦੇ ਝੋਲੇ ਵਿਚੋਂ ਲੱਖਾਂ ਰੁਪਏ ਮਿਲੇ। ਇਹ ਘਟਨਾ ਦੇਖ ਕੇ ਲੋਕਾਂ ਦੇ ਹੋਸ਼ ਉੱਡ ਗਏ। ਲੋਕਾਂ ਨੇ ਨੋਟ ਤੇ ਸਿੱਕੇ ਗਿਣਦੇ-ਗਿਣਦੇ ਹਾਰ ਮੰਨ ਲਈ, ਕਿਉਂਕਿ ਰਕਮ ਗਿਣਨਾ ਹੀ ਮੁਸ਼ਕਿਲ ਹੋ ਗਿਆ।
ਮਾਮਲਾ ਮੰਗਲੌਰ ਥਾਣਾ ਖੇਤਰ ਦੇ ਪਠਾਨਪੁਰਾ ਮੁਹੱਲੇ ਦਾ ਹੈ, ਜਿਥੇ ਇਹ ਔਰਤ ਪਿਛਲੇ 12 ਸਾਲਾਂ ਤੋਂ ਇੱਕ ਘਰ ਦੇ ਬਾਹਰ ਭੀਖ ਮੰਗਦੀ ਸੀ। ਹਾਲ ਹੀ ਵਿੱਚ ਸਥਾਨਕ ਲੋਕਾਂ ਨੇ ਉਸਨੂੰ ਉਥੋਂ ਹਟਾਉਣ ਦੀ ਕੋਸ਼ਿਸ਼ ਕੀਤੀ, ਪਰ ਜਦੋਂ ਉਸ ਦੇ ਬੈਗਾਂ ਦੀ ਜਾਂਚ ਕੀਤੀ ਗਈ, ਤਾੰ ਅੰਦਰੋਂ ਲੱਖਾਂ ਰੁਪਏ ਨਿਕਲੇ।
ਪੈਸਿਆਂ ਵਿੱਚ 10 ਅਤੇ 20 ਰੁਪਏ ਦੇ ਨੋਟਾਂ ਨਾਲ ਸਿੱਕਿਆਂ ਦੇ ਢੇਰ ਵੀ ਮਿਲੇ। ਲੋਕਾਂ ਨੇ ਕਈ ਘੰਟਿਆਂ ਤੱਕ ਪੈਸੇ ਗਿਣੇ — ਹੁਣ ਤੱਕ ਲਗਭਗ ਇੱਕ ਲੱਖ ਰੁਪਏ ਤੋਂ ਵੱਧ ਗਿਣੇ ਜਾ ਚੁੱਕੇ ਹਨ, ਪਰ ਅਜੇ ਵੀ ਕਈ ਬੈਗਾਂ ਵਿੱਚ ਪੈਸੇ ਬਾਕੀ ਹਨ।
ਸਥਾਨਕ ਲੋਕਾਂ ਦੀ ਸੂਚਨਾ ‘ਤੇ ਪੁਲਿਸ ਮੌਕੇ ‘ਤੇ ਪਹੁੰਚੀ। ਪੁਲਿਸ ਅਨੁਸਾਰ, ਭਿਖਾਰਨ ਮਾਨਸਿਕ ਤੌਰ ‘ਤੇ ਪ੍ਰੇਸ਼ਾਨ ਦੱਸੀ ਜਾ ਰਹੀ ਹੈ। ਉਸ ਕੋਲੋਂ ਮਿਲੇ ਪੈਸੇ ਸੁਰੱਖਿਅਤ ਰੱਖੇ ਜਾਣਗੇ, ਅਤੇ ਉਸ ਦਾ ਹਸਪਤਾਲ ਵਿੱਚ ਇਲਾਜ ਕਰਵਾਉਣ ਦੀ ਪ੍ਰਕਿਰਿਆ ਜਾਰੀ ਹੈ।
ਪੁਲਿਸ ਨੇ ਕਿਹਾ ਹੈ ਕਿ ਔਰਤ ਦੀ ਪਛਾਣ ਅਤੇ ਪੈਸਿਆਂ ਦੇ ਸਰੋਤ ਦੀ ਜਾਂਚ ਕੀਤੀ ਜਾ ਰਹੀ ਹੈ।
