ਨਵੀਂ ਦਿੱਲੀ:07 Mar 2026 AJ DI Awaaj
National Desk : ਜੇਕਰ ਬੈਂਕ ਵੱਲੋਂ ਤੁਹਾਡੀ ਲੋਨ ਅਰਜ਼ੀ ਵਾਰ-ਵਾਰ ਰੱਦ ਕੀਤੀ ਜਾ ਰਹੀ ਹੈ ਤਾਂ ਇਸ ਦਾ ਸਭ ਤੋਂ ਵੱਡਾ ਕਾਰਨ ਕਮਜ਼ੋਰ CIBIL ਜਾਂ ਕ੍ਰੈਡਿਟ ਸਕੋਰ ਹੋ ਸਕਦਾ ਹੈ। ਆਮ ਤੌਰ ’ਤੇ ਬੈਂਕ 750 ਜਾਂ ਇਸ ਤੋਂ ਵੱਧ ਕ੍ਰੈਡਿਟ ਸਕੋਰ ਵਾਲੇ ਗਾਹਕਾਂ ਨੂੰ ਹੀ ਲੋਨ ਦੇਣ ਨੂੰ ਤਰਜੀਹ ਦਿੰਦੇ ਹਨ। ਕਈ ਲੋਕ ਆਪਣਾ ਸਕੋਰ ਵਧਾਉਣ ਲਈ ਏਜੰਟਾਂ ਜਾਂ ਕੰਪਨੀਆਂ ਨੂੰ ਪੈਸੇ ਦੇਂਦੇ ਹਨ, ਪਰ ਅਸਲ ਵਿੱਚ ਕੁਝ ਸਧਾਰਨ ਤਰੀਕਿਆਂ ਨਾਲ ਤੁਸੀਂ ਖੁਦ ਵੀ ਆਪਣਾ ਸਕੋਰ ਸੁਧਾਰ ਸਕਦੇ ਹੋ।
1. EMI ਅਤੇ ਬਿੱਲ ਸਮੇਂ ਸਿਰ ਭਰੋ
ਕ੍ਰੈਡਿਟ ਸਕੋਰ ਸੁਧਾਰਣ ਦਾ ਸਭ ਤੋਂ ਆਸਾਨ ਤਰੀਕਾ ਹੈ ਕਿ ਤੁਸੀਂ ਆਪਣੀਆਂ ਸਾਰੀਆਂ EMI ਅਤੇ ਕ੍ਰੈਡਿਟ ਕਾਰਡ ਬਿੱਲ ਸਮੇਂ ’ਤੇ ਭਰੋ। ਇੱਕ ਵੀ ਪੇਮੈਂਟ ਲੇਟ ਹੋਣ ਨਾਲ ਸਕੋਰ ’ਤੇ ਨਕਾਰਾਤਮਕ ਅਸਰ ਪੈਂਦਾ ਹੈ। ਇਸ ਲਈ ਆਟੋ-ਡੈਬਿਟ ਜਾਂ ਰਿਮਾਈਂਡਰ ਸੈਟ ਕਰਨਾ ਫਾਇਦੇਮੰਦ ਰਹਿੰਦਾ ਹੈ।
2. ਕ੍ਰੈਡਿਟ ਕਾਰਡ ਦੀ ਲਿਮਿਟ ਘੱਟ ਵਰਤੋਂ ਕਰੋ
ਮਾਹਿਰਾਂ ਦੇ ਮੁਤਾਬਕ ਕ੍ਰੈਡਿਟ ਕਾਰਡ ਦੀ ਕੁੱਲ ਲਿਮਿਟ ਦਾ 30–40 ਫੀਸਦੀ ਤੋਂ ਵੱਧ ਇਸਤੇਮਾਲ ਨਹੀਂ ਕਰਨਾ ਚਾਹੀਦਾ। ਜ਼ਿਆਦਾ ਲਿਮਿਟ ਵਰਤਣ ਨਾਲ ਬੈਂਕ ਨੂੰ ਲੱਗਦਾ ਹੈ ਕਿ ਤੁਸੀਂ ਵੱਧ ਕਰਜ਼ੇ ਹੇਠ ਹੋ।
3. ਛੋਟਾ ਲੋਨ ਜਾਂ ਕ੍ਰੈਡਿਟ ਕਾਰਡ ਚਲਾਉਂਦੇ ਰਹੋ
ਜੇਕਰ ਤੁਹਾਡੀ ਕ੍ਰੈਡਿਟ ਹਿਸਟਰੀ ਛੋਟੀ ਹੈ ਤਾਂ ਇੱਕ ਛੋਟਾ ਪਰਸਨਲ ਲੋਨ ਜਾਂ ਕ੍ਰੈਡਿਟ ਕਾਰਡ ਲੈ ਕੇ ਉਸਦੀ ਨਿਯਮਿਤ ਵਰਤੋਂ ਕਰੋ ਅਤੇ ਸਮੇਂ ਸਿਰ ਭੁਗਤਾਨ ਕਰੋ। ਇਸ ਨਾਲ ਹੌਲੀ-ਹੌਲੀ ਤੁਹਾਡਾ ਸਕੋਰ ਬਿਹਤਰ ਹੋ ਸਕਦਾ ਹੈ।
4. ਇੱਕੋ ਸਮੇਂ ਕਈ ਲੋਨ ਲਈ ਅਪਲਾਈ ਨਾ ਕਰੋ
ਇੱਕੋ ਸਮੇਂ ਕਈ ਬੈਂਕਾਂ ਵਿੱਚ ਲੋਨ ਲਈ ਅਰਜ਼ੀ ਦੇਣ ਨਾਲ ਵਾਰ-ਵਾਰ ਸਖ਼ਤ ਇਨਕੁਆਰੀ ਹੁੰਦੀ ਹੈ, ਜਿਸ ਨਾਲ ਕ੍ਰੈਡਿਟ ਸਕੋਰ ਘਟ ਸਕਦਾ ਹੈ। ਇਸ ਲਈ ਲੋੜ ਹੋਣ ’ਤੇ ਹੀ ਲੋਨ ਲਈ ਅਪਲਾਈ ਕਰੋ।
5. ਆਪਣੀ ਕ੍ਰੈਡਿਟ ਰਿਪੋਰਟ ਚੈੱਕ ਕਰਦੇ ਰਹੋ
ਕਈ ਵਾਰ ਕ੍ਰੈਡਿਟ ਰਿਪੋਰਟ ਵਿੱਚ ਗਲਤ ਜਾਣਕਾਰੀ ਵੀ ਦਰਜ ਹੋ ਸਕਦੀ ਹੈ, ਜਿਵੇਂ ਕਿ ਪੁਰਾਣਾ ਲੋਨ ਹਾਲੇ ਵੀ ਐਕਟਿਵ ਦਿਖਾਈ ਦੇਣਾ। ਇਸ ਲਈ ਸਮੇਂ-ਸਮੇਂ ’ਤੇ ਆਪਣੀ ਰਿਪੋਰਟ ਦੀ ਜਾਂਚ ਕਰੋ ਅਤੇ ਗਲਤੀ ਮਿਲਣ ’ਤੇ ਤੁਰੰਤ ਉਸਨੂੰ ਠੀਕ ਕਰਵਾਓ।
ਮਾਹਿਰਾਂ ਦਾ ਕਹਿਣਾ ਹੈ ਕਿ CIBIL ਸਕੋਰ ਇੱਕਦਮ ਨਹੀਂ ਸੁਧਰਦਾ, ਪਰ ਜੇਕਰ ਤੁਸੀਂ ਇਹ ਨਿਯਮ ਲਗਾਤਾਰ ਮੰਨਦੇ ਹੋ ਤਾਂ ਕੁਝ ਮਹੀਨਿਆਂ ਵਿੱਚ ਚੰਗਾ ਨਤੀਜਾ ਵੇਖਣ ਨੂੰ ਮਿਲ ਸਕਦਾ ਹੈ। ਸਹੀ ਵਿੱਤੀ ਅਨੁਸ਼ਾਸਨ ਹੀ ਵਧੀਆ ਕ੍ਰੈਡਿਟ ਸਕੋਰ ਦੀ ਕੁੰਜੀ ਹੈ।
