26 ਦਸੰਬਰ, 2025 ਅਜ ਦੀ ਆਵਾਜ਼
International Desk: ਦੱਖਣੀ ਚੀਨ ਦੇ ਸ਼ੇਨਜ਼ੇਨ ਸ਼ਹਿਰ ਵਿੱਚ ਇੱਕ ਸ਼ਾਪਿੰਗ ਮਾਲ ਵੱਲੋਂ ਟਾਇਲਟ ਵਿੱਚ ਧੂਮਰਪਾਨ ਨੂੰ ਰੋਕਣ ਲਈ ਅਨੋਖੀ ਅਤੇ ਸਖ਼ਤ ਤਕਨੀਕ ਅਪਣਾਈ ਗਈ ਹੈ। ਇੱਥੇ ਮਰਦਾਂ ਦੇ ਪਖਾਨਿਆਂ ਦੇ ਦਰਵਾਜ਼ਿਆਂ ’ਤੇ ਖ਼ਾਸ ਕਿਸਮ ਦਾ ਪਾਰਦਰਸ਼ੀ ਕੱਚ ਲਗਾਇਆ ਗਿਆ ਹੈ, ਜੋ ਸਿਗਰਟ ਦਾ ਧੂੰਆ ਮਹਿਸੂਸ ਹੋਣ ’ਤੇ ਆਪਣੇ ਆਪ ਸਾਫ਼ ਹੋ ਜਾਂਦਾ ਹੈ।
ਇਸ ਪ੍ਰਣਾਲੀ ਦਾ ਮਕਸਦ ਟਾਇਲਟਾਂ ਵਿੱਚ ਹੋ ਰਹੀ ਸਿਗਰਟਨੋਸ਼ੀ ਨੂੰ ਰੋਕਣਾ ਹੈ। ਸ਼ਾਪਿੰਗ ਸੈਂਟਰ ਨੇ ਲੋਕਾਂ ਨੂੰ ਪਹਿਲਾਂ ਹੀ ਸੁਚੇਤ ਕਰਨ ਲਈ ਬਾਥਰੂਮ ਦੇ ਬਾਹਰ ਨੋਟਿਸ ਲਗਾਏ ਹਨ, ਜਿਨ੍ਹਾਂ ’ਤੇ ਲਿਖਿਆ ਹੈ ਕਿ ਧੂਮਰਪਾਨ ਕਰਨ ਦੀ ਸਥਿਤੀ ਵਿੱਚ ਸ਼ੀਸ਼ਾ ਪਾਰਦਰਸ਼ੀ ਹੋ ਜਾਵੇਗਾ।
ਸੋਸ਼ਲ ਮੀਡੀਆ ’ਤੇ ਛਾਈ ਇਹ ਤਕਨੀਕ
‘ਸਾਊਥ ਚਾਈਨਾ ਮਾਰਨਿੰਗ ਪੋਸਟ’ ਦੀ ਰਿਪੋਰਟ ਮੁਤਾਬਕ, ਇਹ ਸਿਸਟਮ ਸ਼ੇਨਜ਼ੇਨ ਦੇ ਸ਼ੁਈਬੇਈ ਇੰਟਰਨੈਸ਼ਨਲ ਸੈਂਟਰ ਅਤੇ ਸ਼ੁਈਬੇਈ ਜਿਨਜ਼ੁਓ ਬਿਲਡਿੰਗ ਵਿੱਚ ਲਾਗੂ ਕੀਤਾ ਗਿਆ ਹੈ, ਜੋ ਗੁਆਂਗਡੋਂਗ ਸੂਬੇ ਦੇ ਪ੍ਰਸਿੱਧ ਗਹਿਣਾ ਮਾਲ ਹਨ। 16 ਦਸੰਬਰ ਤੋਂ ਇਹ ਪ੍ਰਣਾਲੀ ਸੋਸ਼ਲ ਮੀਡੀਆ ’ਤੇ ਕਾਫ਼ੀ ਚਰਚਾ ਵਿੱਚ ਹੈ ਅਤੇ ਕਈ ਯੂਜ਼ਰਾਂ ਨੇ ਇਸ ਦੀ ਸ਼ਲਾਘਾ ਕੀਤੀ ਹੈ। ਇੱਕ ਯੂਜ਼ਰ ਨੇ ਲਿਖਿਆ, “ਆਖ਼ਿਰਕਾਰ ਸਿਗਰਟਨੋਸ਼ੀ ਕਰਨ ਵਾਲਿਆਂ ਨਾਲ ਨਜਿੱਠਣ ਦਾ ਸਹੀ ਤਰੀਕਾ ਲੱਭ ਲਿਆ ਗਿਆ ਹੈ।”
ਕਿਵੇਂ ਕੰਮ ਕਰਦਾ ਹੈ ਇਹ ਸਮਾਰਟ ਸਿਸਟਮ?
ਟਾਇਲਟ ਦੇ ਦਰਵਾਜ਼ਿਆਂ ’ਚ ਲੱਗਿਆ ਇਹ ਸ਼ੀਸ਼ਾ ਆਮ ਤੌਰ ’ਤੇ ਧੁੰਦਲਾ ਰਹਿੰਦਾ ਹੈ। ਜਿਵੇਂ ਹੀ ਅੰਦਰ ਸਿਗਰਟ ਦਾ ਧੂੰਆ ਫੈਲਦਾ ਹੈ, ਕੁਝ ਸੈਕਿੰਡਾਂ ਵਿੱਚ ਸਿਸਟਮ ਐਕਟਿਵ ਹੋ ਜਾਂਦਾ ਹੈ ਅਤੇ ਬਿਜਲੀ ਸਪਲਾਈ ਬੰਦ ਹੋਣ ਨਾਲ ਸ਼ੀਸ਼ਾ ਪੂਰੀ ਤਰ੍ਹਾਂ ਪਾਰਦਰਸ਼ੀ ਹੋ ਜਾਂਦਾ ਹੈ। ਇਸ ਨਾਲ ਬਾਹਰ ਖੜ੍ਹੇ ਲੋਕ ਅੰਦਰ ਮੌਜੂਦ ਵਿਅਕਤੀ ਨੂੰ ਸਪਸ਼ਟ ਤੌਰ ’ਤੇ ਦੇਖ ਸਕਦੇ ਹਨ।
ਸ਼ਾਪਿੰਗ ਮਾਲ ਪ੍ਰਬੰਧਨ ਦਾ ਮੰਨਣਾ ਹੈ ਕਿ ਇਸ ਤਰ੍ਹਾਂ ਦੀ ਤਕਨੀਕ ਨਾਲ ਨਾ ਸਿਰਫ਼ ਨਿਯਮ ਤੋੜਨ ਵਾਲਿਆਂ ’ਤੇ ਰੋਕ ਲੱਗੇਗੀ, ਸਗੋਂ ਹੋਰ ਲੋਕਾਂ ਨੂੰ ਵੀ ਟਾਇਲਟ ਵਿੱਚ ਧੂਮਰਪਾਨ ਤੋਂ ਦੂਰ ਰਹਿਣ ਲਈ ਪ੍ਰੇਰਨਾ ਮਿਲੇਗੀ।
