3 ਮਾਰਚ 2025 Aj Di Awaaj
ਨਵੀਂ ਦਿੱਲੀ – ਭਾਰਤ ਨੇ ਚੈਂਪੀਅਨਸ ਟ੍ਰਾਫੀ 2025 ਵਿੱਚ ਆਪਣੀ ਅਜੇਤੂ ਲੜੀ ਨੂੰ ਬਰਕਰਾਰ ਰੱਖਦਿਆਂ ਐਤਵਾਰ ਨੂੰ ਨਿਊਜ਼ੀਲੈਂਡ ਨੂੰ 44 ਦੌੜਾਂ ਨਾਲ ਹਰਾ ਦਿੱਤਾ। ਦੁਬਈ ਇੰਟਰਨੈਸ਼ਨਲ ਸਟੇਡੀਅਮ ਵਿੱਚ ਭਾਰਤ ਨੇ ਪਹਿਲਾਂ ਬੱਲੇਬਾਜ਼ੀ ਕਰਦਿਆਂ 50 ਓਵਰਾਂ ਵਿੱਚ 8 ਵਿਕਟਾਂ ਦੇ ਨੁਕਸਾਨ ‘ਤੇ 249 ਦੌੜਾਂ ਬਣਾਈਆਂ। ਸ਼੍ਰੇਅਸ ਅਈਅਰ ਨੇ ਸਭ ਤੋਂ ਵੱਧ 79 ਦੌੜਾਂ ਜੋੜੀਆਂ। ਨਿਊਜ਼ੀਲੈਂਡ ਨੇ 250 ਦੌੜਾਂ ਦੇ ਟੀਚੇ ਦੀ ਪਲਟਵਾਰ ਸ਼ੁਰੂ ਕੀਤੀ ਪਰ ਭਾਰਤੀ ਗੇਂਦਬਾਜ਼ਾਂ ਨੇ ਉਨ੍ਹਾਂ ਦੇ ਇਰਾਦੇ ਨਾਕਾਮ ਕਰ ਦਿੱਤੇ। ਕੀਵੀ ਟੀਮ 45.3 ਓਵਰਾਂ ਵਿੱਚ 205 ਦੌੜਾਂ ‘ਤੇ ਆਲ ਆਊਟ ਹੋ ਗਈ। ਕੇਨ ਵਿਲੀਅਮਸਨ ਨੇ 81 ਦੌੜਾਂ ਬਣਾਈਆਂ, ਪਰ ਬਾਕੀ ਖਿਡਾਰੀ ਢਿੱਗ ਪੈ ਗਏ। ਮੈਟ ਹੈਨਰੀ 2, ਮਿਸ਼ੇਲ ਸੈਂਟਨਰ 28, ਮਾਈਕਲ ਬ੍ਰੇਸਵੈੱਲ 2, ਗਲੇਨ ਫਿਲਿਪਸ 12, ਟਾਮ ਲੈਥਮ 14, ਡੇਰਿਲ ਮਿਸ਼ੇਲ 17, ਵਿਲ ਯੰਗ 22 ਅਤੇ ਰਚਿਨ ਰਵਿੰਦਰ 6 ਦੌੜਾਂ ‘ਤੇ ਆਊਟ ਹੋਏ।
ਭਾਰਤ ਵਲੋਂ ਵਰੁਣ ਚੱਕਰਵਰਤੀ ਨੇ 5 ਵਿਕਟਾਂ ਹਾਸਲ ਕਰਕੇ ਨਿਊਜ਼ੀਲੈਂਡ ਦੀ ਪਾਰੀ ਨੂੰ ਢਾਹ ਦਿੱਤਾ। ਅਕਸ਼ਰ ਪਟੇਲ, ਰਵਿੰਦਰ ਜਡੇਜਾ, ਅਤੇ ਹਾਰਦਿਕ ਪੰਡਯਾ ਨੇ 1-1 ਵਿਕਟ ਲੀ, ਜਦਕਿ ਕੁਲਦੀਪ ਯਾਦਵ ਨੇ 2 ਵਿਕਟਾਂ ਲਈਆਂ। ਇਸ ਜਿੱਤ ਨਾਲ ਭਾਰਤ ਗਰੁੱਪ-ਏ ਵਿੱਚ ਚੋਟੀ ‘ਤੇ ਪਹੁੰਚ ਗਿਆ ਅਤੇ ਹੁਣ 4 ਮਾਰਚ ਨੂੰ ਆਸਟ੍ਰੇਲੀਆ ਵਿਰੁੱਧ ਸੈਮੀਫਾਈਨਲ ਖੇਡੇਗਾ। ਦੂਜੇ ਸੈਮੀਫਾਈਨਲ ਵਿੱਚ ਦੱਖਣੀ ਅਫਰੀਕਾ ਅਤੇ ਨਿਊਜ਼ੀਲੈਂਡ ਆਹਮੋ-ਸਾਹਮਣੇ ਹੋਣਗੀਆਂ।
