ਗੁਰਦਾਸਪੁਰ ਪਾਦਰੀ ‘ਤੇ ਬਲਾ*ਤਕਾਰ ਅਤੇ ਗੈਰਕਾਨੂੰਨੀ ਗਰਭਪਾਤ ਕਾਰਨ ਮੌ*ਤ ਦੇ ਦੋਸ਼

05 ਅਪ੍ਰੈਲ 2025 ਅੱਜ ਦੀ ਆਵਾਜ਼

ਚਰਚ ਨਾਲ ਜੁੜੇ ਕੇਸ ਨੇ ਮਚਾਇਆ ਹੜਕੰਪ: ਪੀੜਤ ਪਿਤਾ ਨੇ ਪੁਕਾਰਿਆ ਨਿਆਂ, ਸੀਬੀਆਈ ਜਾਂਚ ਦੀ ਮੰਗ

ਪੰਜਾਬ ਦੇ ਗੁਰਦਾਸਪੁਰ ਜ਼ਿਲ੍ਹੇ ਵਿੱਚ ਇੱਕ ਚਰਚ ਨਾਲ ਜੁੜੇ ਗੰਭੀਰ ਮਾਮਲੇ ਨੇ ਹੜਕੰਪ ਮਚਾ ਦਿੱਤਾ ਹੈ। ਮਾਮਲੇ ਵਿੱਚ ਇੱਕ ਸਵੈ-ਘੋਸ਼ਿਤ ਪਾਦਰੀ ਜਸ਼ਨ ਗਿੱਲ ‘ਤੇ 22 ਸਾਲਾ ਲੜਕੀ ਨਾਲ ਕਈ ਵਾਰ ਬਲਾ*ਤਕਾਰ ਕਰਨ ਦੇ ਦੋਸ਼ ਲਗਾਏ ਗਏ ਹਨ। ਮ੍ਰਿਤਕ ਲੜਕੀ ਦੇ ਪਿਤਾ ਨੇ ਮੀਡੀਆ ਨਾਲ ਗੱਲਬਾਤ ਕਰਦੇ ਹੋਏ ਪੂਰੀ ਘਟਨਾ ਦੀ ਜਾਣਕਾਰੀ ਦਿੱਤੀ।

ਭਰਮਾ ਕੇ ਕੀਤਾ ਸ਼ੋਸ਼ਣ, ਗੈਰਕਾਨੂੰਨੀ ਗਰਭਪਾਤ ਕਾਰਨ ਹੋਈ ਮੌਤ

ਪੀੜਤ ਪਿਤਾ ਮੁਤਾਬਕ, ਉਸ ਦੀ ਧੀ ਬੀ.ਸੀ.ਏ. ਦੀ ਵਿਦਿਆਰਥਣ ਸੀ ਅਤੇ ਪਰਿਵਾਰ ਸਮੇਤ ਇੱਕ ਚਰਚ ਵਿਚ ਜਾਇਆ ਕਰਦੀ ਸੀ। ਜਸ਼ਨ ਗਿੱਲ ਨੇ ਧੀ ਨੂੰ ਭਰਮਾ ਕੇ ਉਸ ਨਾਲ ਸ਼ਾਰੀਰਕ ਸ਼ੋਸ਼ਣ ਕੀਤਾ। ਜਦੋਂ ਉਹ ਗਰਭਵਤੀ ਹੋਈ, ਤਾਂ ਉਸ ਦਾ ਗਰਭਪਾਤ ਖੱਖਹਰ ਪਿੰਡ ਦੇ ਇੱਕ ਗੈਰਕਾਨੂੰਨੀ ਕੇਂਦਰ ਵਿੱਚ ਕਰਵਾਇਆ ਗਿਆ।

ਗਰਭਪਾਤ ਲਾਪਰਵਾਹੀ ਨਾਲ ਕੀਤਾ ਗਿਆ, ਜਿਸ ਕਾਰਨ ਲੜਕੀ ਨੂੰ ਇਨਫੈਕਸ਼ਨ ਹੋ ਗਿਆ। ਪੇਟ ਦਰਦ ਕਾਰਨ ਜਦੋਂ ਉਸ ਨੂੰ ਹਸਪਤਾਲ ਲਿਜਾਇਆ ਗਿਆ, ਤਾਂ ਅਲਟਰਾਸਾਉਂਡ ਰਾਹੀਂ ਪਤਾ ਲੱਗਾ ਕਿ ਗਰਭਪਾਤ ਹੋ ਚੁੱਕਾ ਹੈ। ਹਾਲਤ ਵਿਗੜਣ ਕਾਰਨ ਉਸ ਨੂੰ ਅੰਮ੍ਰਿਤਸਰ ਲਿਜਾਇਆ ਗਿਆ, ਜਿੱਥੇ ਇਲਾਜ ਦੌਰਾਨ ਉਸ ਦੀ ਮੌਤ ਹੋ ਗਈ।

ਪੁਲਿਸ ਦੀ ਲਾਪਰਵਾਹੀ ਤੇ ਭ੍ਰਿਸ਼ਟਾਚਾਰ ਦੇ ਦੋਸ਼

ਪੀੜਤ ਪਿਤਾ ਨੇ ਦਾਅਵਾ ਕੀਤਾ ਕਿ ਪਾਦਰੀ ਜਸ਼ਨ ਗਿੱਲ ਨੇ ਪੁਲਿਸ ਅਧਿਕਾਰੀਆਂ ਉੱਤੇ ਦਬਾਅ ਬਣਾਇਆ ਹੋਇਆ ਹੈ, ਜਿਸ ਕਾਰਨ ਅੱਜ ਤੱਕ ਉਸ ਦੀ ਗ੍ਰਿਫਤਾਰੀ ਨਹੀਂ ਹੋਈ। ਮਾਮਲਾ 2023 ਦਾ ਹੋਣ ਦੇ ਬਾਵਜੂਦ ਪੁਲਿਸ ਵੱਲੋਂ ਕੋਈ ਢੰਗ ਦੀ ਕਾਰਵਾਈ ਨਹੀਂ ਕੀਤੀ ਗਈ। ਪੀੜਤ ਦੇ ਅਨੁਸਾਰ, ਪਾਦਰੀ ਅਜੇ ਵੀ ਖੁੱਲ੍ਹਾ ਘੁੰਮ ਰਿਹਾ ਹੈ ਅਤੇ ਪੁਲਿਸ ਉਸ ਤੋਂ ਪੈਸਾ ਲੈ ਰਹੀ ਹੈ।

ਸੀਬੀਆਈ ਜਾਂਚ ਦੀ ਮੰਗ, ਹਾਈ ਕੋਰਟ ‘ਚ ਗੂੰਜਿਆ ਮਾਮਲਾ

ਲੜਕੀ ਦੇ ਪਿਤਾ ਨੇ ਦੱਸਿਆ ਕਿ ਉਸ ਨੂੰ ਲਗਾਤਾਰ ਧਮਕੀਆਂ ਮਿਲ ਰਹੀਆਂ ਹਨ, ਜਿਸ ਕਾਰਨ ਉਹ ਪਿੰਡ ਛੱਡਣ ‘ਤੇ ਮਜਬੂਰ ਹੋ ਗਿਆ। ਉਸਨੇ ਸੀਬੀਆਈ ਜਾਂਚ ਦੀ ਮੰਗ ਕੀਤੀ ਹੈ ਅਤੇ ਮਾਮਲਾ ਹੁਣ ਪੰਜਾਬ ਹਾਈ ਕੋਰਟ ਤਕ ਪਹੁੰਚ ਗਿਆ ਹੈ। ਪੀੜਤ ਪਿਤਾ ਕਹਿੰਦਾ ਹੈ ਕਿ ਉਸ ਦੀ ਧੀ ਲਈ ਨਿਆਂ ਲਈ ਲੜਾਈ ਅਜੇ ਸ਼ੁਰੂ ਹੋਈ ਹੈ।

ਚਰਚਾਂ ਨਾਲ ਜੁੜੇ ਹੋਰ ਕੇਸ ਵੀ ਚਲ ਰਹੇ ਹਨ

ਇਹ ਪਹਿਲਾ ਮਾਮਲਾ ਨਹੀਂ ਹੈ। ਕੁਝ ਦਿਨ ਪਹਿਲਾਂ ਮੁਹਾਲੀ ਦੀ ਇੱਕ ਅਦਾਲਤ ਨੇ ਪਾਦਰੀ ਬਾਜਿੰਦਰ ਸਿੰਘ ਨੂੰ 2018 ਦੇ ਮਾਮਲੇ ਵਿੱਚ ਇੱਕ ਔਰਤ ਨਾਲ ਜਿਨਸੀ ਦੁਰਵਿਵਹਾਰ ਦੇ ਦੋਸ਼ ਹੇਠ ਉਮਰ ਕੈਦ ਦੀ ਸਜ਼ਾ ਸੁਣਾਈ। ਉਹ ਕੇਸ ਵੀ ਪ੍ਰਾਰਥਨਾ ਸੈਸ਼ਨ ਤੋਂ ਬਾਅਦ ਜਿਨਸੀ ਹਮਲੇ ਨਾਲ ਜੁੜਿਆ ਹੋਇਆ ਸੀ। ਇਸਦੇ ਨਾਲ, ਜਲੰਧਰ ਦੇ ਹੋਰ ਇੱਕ ਪਾਦਰੀ ਖਿਲਾਫ ਵੀ ਜਿਨਸੀ ਦੁਰਵਿਵਹਾਰ ਦਾ ਕੇਸ ਚੱਲ ਰਿਹਾ ਹੈ।