26 ਨਵੰਬਰ, 2025 ਅਜ ਦੀ ਆਵਾਜ਼
Sports Desk: ਭਾਰਤ ਨੂੰ ਦੱਖਣੀ ਅਫਰੀਕਾ ਤੋਂ 0-2 ਨਾਲ ਟੈਸਟ ਸੀਰੀਜ਼ ਹਾਰ ਮਿਲਣ ਤੋਂ ਬਾਅਦ ਮੁੱਖ ਕੋਚ ਗੌਤਮ ਗੰਭੀਰ ‘ਤੇ ਦਬਾਅ ਤੇਜ਼ ਹੋ ਗਿਆ ਹੈ। ਉਹ ਪਹਿਲੇ ਭਾਰਤੀ ਕੋਚ ਬਣ ਗਏ ਹਨ, ਜਿਨ੍ਹਾਂ ਨੇ ਘਰੇਲੂ ਮੈਦਾਨ ‘ਤੇ ਲਗਾਤਾਰ ਦੋ ਕਲੀਨ ਸਵੀਪ ਝੱਲੇ—ਨਿਊਜ਼ੀਲੈਂਡ ਤੋਂ 0-3 ਅਤੇ ਹੁਣ ਦੱਖਣੀ ਅਫਰੀਕਾ ਤੋਂ 0-2।
ਗੁਹਾਟੀ ਵਾਲੇ ਦੂਜੇ ਟੈਸਟ ਵਿੱਚ 408 ਦੌੜਾਂ ਨਾਲ ਹਾਰ ਤੋਂ ਬਾਅਦ ਜਦ ਗੰਭੀਰ ਪ੍ਰੈੱਸ ਕਾਨਫਰੰਸ ਵਿੱਚ ਆਏ, ਉਨ੍ਹਾਂ ਤੋਂ ਉਨ੍ਹਾਂ ਦੇ ਭਵਿੱਖ ਬਾਰੇ ਸਵਾਲ ਪੁੱਛਿਆ ਗਿਆ। ਗੰਭੀਰ ਨੇ ਸ਼ਾਂਤ ਰਹਿੰਦੇ ਹੋਏ ਕਿਹਾ:
“ਇਹ ਫੈਸਲਾ BCCI ਦਾ ਹੋਵੇਗਾ। ਜਦੋਂ ਮੈਂ ਇਹ ਅਹੁਦਾ ਸੰਭਾਲਿਆ ਸੀ, ਉਦੋਂ ਵੀ ਕਿਹਾ ਸੀ—ਭਾਰਤੀ ਕ੍ਰਿਕਟ ਮਹੱਤਵਪੂਰਨ ਹੈ, ਮੈਂ ਨਹੀਂ।”
ਉਨ੍ਹਾਂ ਨੇ ਆਲੋਚਨਾਵਾਂ ‘ਤੇ ਨਾਰਾਜ਼ਗੀ ਵੀ ਜਤਾਈ ਤੇ ਕਿਹਾ ਕਿ ਮੀਡੀਆ ਸਿਰਫ਼ ਹਾਰਾਂ ਦੀ ਗੱਲ ਕਰਦਾ ਹੈ, ਜਿੱਤਾਂ ਨੂੰ ਭੁੱਲ ਜਾਂਦਾ ਹੈ। ਗੰਭੀਰ ਨੇ ਯਾਦ ਕਰਵਾਇਆ ਕਿ ਉਨ੍ਹਾਂ ਦੀ ਕੋਚਿੰਗ ਵਿੱਚ ਭਾਰਤ ਨੇ ਇੰਗਲੈਂਡ ਵਿੱਚ ਯੰਗ ਟੀਮ ਨਾਲ ਵੱਡੇ ਨਤੀਜੇ ਹਾਸਲ ਕੀਤੇ, ਨਾਲ ਹੀ ਚੈਂਪੀਅਨਜ਼ ਟਰਾਫੀ ਅਤੇ ਏਸ਼ੀਆ ਕੱਪ ਵੀ ਜਿੱਤਿਆ।
ਗੰਭੀਰ ਦੇ ਕਾਰਜਕਾਲ ਦੌਰਾਨ ਭਾਰਤ ਨੇ 19 ਵਿੱਚੋਂ 10 ਮੈਚ ਹਾਰੇ ਅਤੇ ਪਿਛਲੇ 7 ਵਿੱਚੋਂ 5 ਘਰੇਲੂ ਟੈਸਟ ਵੀ ਗੁਆਏ ਹਨ। ਇਸ ਕਰਕੇ ਉਨ੍ਹਾਂ ਨੂੰ ਅਹੁਦੇ ਤੋਂ ਹਟਾਉਣ ਦੀ ਮੰਗ ਵੀ ਵਧ ਰਹੀ ਹੈ।
ਟੀਮ ਦੇ ਨੌਜਵਾਨ ਹੋਣ ਅਤੇ ਅਨੁਭਵ ਦੀ ਘਾਟ ਦਾ ਹਵਾਲਾ ਦੇ ਕੇ ਗੰਭੀਰ ਨੇ ਕਿਹਾ ਕਿ ਖਿਡਾਰੀ ਸਿੱਖ ਰਹੇ ਹਨ ਤੇ ਸਮਾਂ ਲੱਗੇਗਾ, ਪਰ ਯਤਨ ਜਾਰੀ ਹੈ।
