ਬਠਿੰਡਾ ‘ਚ ਧਮਾਕਿਆਂ ਨਾਲ ਹੜਕੰਪ, ਪਿਓ-ਪੁੱਤ ਗੰਭੀਰ ਜ਼ਖ਼ਮੀ

ਬਠਿੰਡਾ 12 Sep 2025 AJ DI Awaaj

Punjab Desk : ਪਿੰਡ ਜੀਦਾ ਵਿੱਚ ਇਕ ਤੋਂ ਬਾਅਦ ਇਕ ਹੋਏ ਧਮਾਕਿਆਂ ਨੇ ਇਲਾਕੇ ‘ਚ ਦਹਿਸ਼ਤ ਦਾ ਮਾਹੌਲ ਪੈਦਾ ਕਰ ਦਿੱਤਾ। ਇਹ ਵਿੱਢਕ ਬਲਾਸਟ ਗੁਰਪ੍ਰੀਤ ਸਿੰਘ ਨਾਮਕ 20 ਸਾਲਾ ਨੌਜਵਾਨ ਦੇ ਘਰ ‘ਚ ਹੋਏ, ਜੋ ਕਿ +2 ਪਾਸ ਕਰ ਚੁੱਕਿਆ ਹੈ ਅਤੇ ਲਾਅ ਦੀ ਪੜ੍ਹਾਈ ਕਰ ਰਿਹਾ ਸੀ।

ਪਹਿਲਾ ਧਮਾਕਾ — 10 ਸਤੰਬਰ:
ਜਾਣਕਾਰੀ ਅਨੁਸਾਰ, ਗੁਰਪ੍ਰੀਤ ਨੇ 10 ਸਤੰਬਰ ਨੂੰ ਆਪਣੇ ਘਰ ‘ਚ ਇਕੱਠੀ ਕੀਤੀ ਵਿਸਫੋਟਕ ਸਮੱਗਰੀ ਨਾਲ ਤਜਰਬਾ ਕਰਦਿਆਂ ਧਮਾਕਾ ਕਰ ਦਿੱਤਾ, ਜਿਸ ਕਾਰਨ ਉਹ ਖੁਦ ਜ਼ਖ਼ਮੀ ਹੋ ਗਿਆ। ਉਸ ਨੂੰ ਇਕ ਨਿੱਜੀ ਹਸਪਤਾਲ ‘ਚ ਦਾਖਲ ਕਰਵਾਇਆ ਗਿਆ, ਪਰ ਹਸਪਤਾਲ ਪ੍ਰਬੰਧਨ ਵੱਲੋਂ ਪੁਲਿਸ ਨੂੰ ਕੋਈ ਜਾਣਕਾਰੀ ਨਹੀਂ ਦਿੱਤੀ ਗਈ।

ਦੂਜਾ ਧਮਾਕਾ — 11 ਸਤੰਬਰ:
ਅਗਲੇ ਦਿਨ, 11 ਸਤੰਬਰ ਨੂੰ, ਗੁਰਪ੍ਰੀਤ ਦਾ ਪਿਤਾ ਜਗਤਾਰ ਸਿੰਘ ਘਰ ਵਿੱਚ ਧਮਾਕੇ ਤੋਂ ਬਚੀ ਹੋਈ ਸਮੱਗਰੀ ਸਾਫ ਕਰ ਰਿਹਾ ਸੀ ਕਿ ਅਚਾਨਕ ਹੋਰ ਇਕ ਧਮਾਕਾ ਹੋ ਗਿਆ। ਇਸ ਵਿਚ ਉਹ ਵੀ ਗੰਭੀਰ ਜ਼ਖ਼ਮੀ ਹੋ ਗਿਆ। ਦੋਵੇਂ ਮਰੀਜ਼ ਹਾਲੇ ਤੱਕ ਬਠਿੰਡਾ ਦੇ ਐਮਜ਼ ਹਸਪਤਾਲ ‘ਚ ਇਲਾਜ ਅਧੀਨ ਹਨ।

ਜਾਂਚ ਦੀ ਦਿਸ਼ਾ — ਆਰਮੀ ਵੀ ਮੈਦਾਨ ‘ਚ:
ਜਦੋਂ ਹਸਪਤਾਲ ਪ੍ਰਬੰਧਕਾਂ ਨੂੰ ਮਾਮਲਾ ਸ਼ੱਕੀ ਲੱਗਾ, ਤਾਂ ਉਨ੍ਹਾਂ ਨੇ ਤੁਰੰਤ ਪੁਲਿਸ ਨੂੰ ਜਾਣਕਾਰੀ ਦਿੱਤੀ। ਬਠਿੰਡਾ ਪੁਲਿਸ ਨੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ, ਜਦਕਿ ਆਰਮੀ ਨੇ ਵੀ ਇਹ ਮਾਮਲਾ ਆਪਣੇ ਹੱਥ ਵਿੱਚ ਲੈ ਲਿਆ ਹੈ, ਕਿਉਂਕਿ ਇਹ ਦੇਸ਼ ਦੀ ਸੁਰੱਖਿਆ ਨਾਲ ਸਬੰਧਤ ਹੋ ਸਕਦਾ ਹੈ।

ਸ਼ੱਕ ਦੇ ਆਧਾਰ:
ਪੁਲਿਸ ਸਰੋਤਾਂ ਮੁਤਾਬਕ, ਗੁਰਪ੍ਰੀਤ ਨੇ ਆਨਲਾਈਨ ਰਾਹੀਂ ਵਿਸਫੋਟਕ ਕੈਮੀਕਲ ਮੰਗਵਾਏ ਸਨ ਅਤੇ 11 ਸਤੰਬਰ ਲਈ ਜੰਮੂ ਦੀ ਟਿਕਟ ਵੀ ਬੁੱਕ ਕਰਵਾਈ ਸੀ, ਜਿਸ ਨਾਲ ਮਾਮਲੇ ‘ਚ ਹੋਰ ਗੰਭੀਰਤਾ ਆ ਗਈ। ਉਨ੍ਹਾਂ ਦੇ ਮੋਬਾਈਲ ਤੋਂ ਪਾਕਿਸਤਾਨ ਨਾਲ ਸੰਭਾਵਿਤ ਸੰਪਰਕਾਂ ਅਤੇ ਭਾਰਤ ਵਿਰੋਧੀ ਵੀਡੀਓਜ਼ ਦੇਖਣ ਦੀ ਵੀ ਪੁਸ਼ਟੀ ਹੋਈ ਹੈ।

ਕਾਨੂੰਨੀ ਕਾਰਵਾਈ:
ਥਾਣਾ ਨੇਹੀਆਂ ਵਾਲਾ ਵਿਖੇ ਗੁਰਪ੍ਰੀਤ (ਅਤੇ ਸੰਭਾਵਤ ਦੋਸ਼ੀ ਦਵਿੰਦਰ) ਦੇ ਖ਼ਿਲਾਫ ਐਫਆਈਆਰ ਨੰਬਰ 198 ਹੇਠ Explosive Substances Act 1908 ਦੀ ਧਾਰਾ 3, 4, 5 ਅਤੇ BNS ਦੀਆਂ ਧਾਰਾਵਾਂ 287, 288, 326(f) ਤਹਿਤ ਕੇਸ ਦਰਜ ਕਰ ਲਿਆ ਗਿਆ ਹੈ।

ਮਾਮਲਾ ਫਿਲਹਾਲ ਜਾਂਚ ਅਧੀਨ ਹੈ ਅਤੇ ਸੁਰੱਖਿਆ ਏਜੰਸੀਆਂ ਹਰ ਪੱਖ ਤੋਂ ਜਾਂਚ ਕਰ ਰਹੀਆਂ ਹਨ।