17 ਦਸੰਬਰ, 2025 Aj Di Awaaj
ਬਿਜ਼ਨਸ ਡੈਸਕ : ਹਫ਼ਤੇ ਦੇ ਤੀਜੇ ਕਾਰੋਬਾਰੀ ਦਿਨ ਬੁੱਧਵਾਰ ਨੂੰ ਘਰੇਲੂ ਸ਼ੇਅਰ ਬਾਜ਼ਾਰ ਨੇ ਲਗਭਗ ਸੁਸਤ ਸ਼ੁਰੂਆਤ ਕੀਤੀ। ਪਿਛਲੇ ਦੋ ਸੈਸ਼ਨਾਂ ਦੀ ਗਿਰਾਵਟ ਤੋਂ ਬਾਅਦ ਸ਼ੁਰੂਆਤੀ ਕਾਰੋਬਾਰ ਵਿੱਚ ਸੈਂਸੈਕਸ ਅਤੇ ਨਿਫਟੀ ਵਿੱਚ ਹਲਕੀ ਰਿਕਵਰੀ ਨਜ਼ਰ ਆਈ, ਹਾਲਾਂਕਿ ਨਿਵੇਸ਼ਕ ਅਜੇ ਵੀ ਸਾਵਧਾਨ ਰਹੇ।
ਵਿਸ਼ਵ ਬਾਜ਼ਾਰਾਂ ਤੋਂ ਮਿਲੇ ਮਿਲੇ-ਜੁਲੇ ਸੰਕੇਤਾਂ ਅਤੇ ਅਮਰੀਕਾ ਦੇ ਰੋਜ਼ਗਾਰ ਅੰਕੜਿਆਂ ਕਾਰਨ ਬਿਆਜ ਦਰਾਂ ਦੇ ਰੁਖ ‘ਤੇ ਸਪਸ਼ਟਤਾ ਨਾ ਹੋਣ ਨਾਲ ਬਾਜ਼ਾਰ ਦੀ ਭਾਵਨਾ ਸੀਮਿਤ ਦਾਇਰੇ ਵਿੱਚ ਰਹੀ। ਸ਼ੁਰੂਆਤੀ ਕਾਰੋਬਾਰ ਵਿੱਚ 30 ਸ਼ੇਅਰਾਂ ਵਾਲਾ ਬੀਐਸਈ ਸੈਂਸੈਕਸ 175.80 ਅੰਕ ਜਾਂ 0.21 ਫ਼ੀਸਦੀ ਚੜ੍ਹ ਕੇ 84,855.66 ਅੰਕ ‘ਤੇ ਪਹੁੰਚ ਗਿਆ। ਉੱਥੇ ਹੀ ਐਨਐਸਈ ਨਿਫਟੀ 64.00 ਅੰਕ ਜਾਂ 0.25 ਫ਼ੀਸਦੀ ਵੱਧ ਕੇ 25,924.10 ਅੰਕ ‘ਤੇ ਕਾਰੋਬਾਰ ਕਰਦਾ ਦਿੱਸਿਆ।
ਮੁਦਰਾ ਬਾਜ਼ਾਰ ਦੀ ਗੱਲ ਕਰੀਏ ਤਾਂ ਸ਼ੁਰੂਆਤੀ ਸੈਸ਼ਨ ਵਿੱਚ ਰੁਪਏ ਵਿੱਚ ਤੇਜ਼ ਉਤਾਰ-ਚੜ੍ਹਾਅ ਵੇਖਣ ਨੂੰ ਮਿਲਿਆ। ਕੱਚੇ ਤੇਲ ਦੀਆਂ ਕੀਮਤਾਂ ਵਿੱਚ ਨਰਮੀ ਨਾਲ ਰੁਪਏ ਨੂੰ ਕੁਝ ਸਹਾਰਾ ਮਿਲਿਆ, ਪਰ ਭਾਰਤ-ਅਮਰੀਕਾ ਵਪਾਰ ਸਮਝੌਤੇ ਨੂੰ ਲੈ ਕੇ ਅਣਸ਼ਚਿਤਤਾ ਅਤੇ ਵਿਦੇਸ਼ੀ ਸੰਸਥਾਗਤ ਨਿਵੇਸ਼ਕਾਂ (FII) ਵੱਲੋਂ ਲਗਾਤਾਰ ਵਿਕਰੀ ਨੇ ਇਸ ਵਾਧੇ ਨੂੰ ਸੀਮਿਤ ਕਰ ਦਿੱਤਾ।
ਗੌਰਤਲਬ ਹੈ ਕਿ ਮੰਗਲਵਾਰ ਨੂੰ ਬਾਜ਼ਾਰ ਵਿੱਚ ਭਾਰੀ ਗਿਰਾਵਟ ਦਰਜ ਕੀਤੀ ਗਈ ਸੀ। ਬੀਐਸਈ ਸੈਂਸੈਕਸ 533.50 ਅੰਕ ਡਿੱਗ ਕੇ 84,679.86 ‘ਤੇ ਬੰਦ ਹੋਇਆ ਸੀ, ਜਦਕਿ ਨਿਫਟੀ 167.20 ਅੰਕ ਘਟ ਕੇ 25,860.10 ਦੇ ਪੱਧਰ ‘ਤੇ ਆ ਗਿਆ ਸੀ। ਹੁਣ ਨਿਵੇਸ਼ਕਾਂ ਦੀ ਨਜ਼ਰ ਵਿਸ਼ਵ ਪੱਧਰੀ ਸੰਕੇਤਾਂ ਅਤੇ ਆਉਣ ਵਾਲੇ ਆਰਥਿਕ ਅੰਕੜਿਆਂ ‘ਤੇ ਟਿਕੀ ਹੋਈ ਹੈ, ਜੋ ਅੱਗੇ ਬਾਜ਼ਾਰ ਦੀ ਦਿਸ਼ਾ ਤੈਅ ਕਰ ਸਕਦੇ ਹਨ।
