ਕਮਿਸ਼ਨ ਦਾ ਦਾਅਵਾ: 2009 ਦੇ ਬੰਗਲਾਦੇਸ਼ ਕਤਲੇਆਮ ਦਾ ਹੁਕਮ ਸ਼ੇਖ ਹਸੀਨਾ ਨੇ ਹੀ ਦਿੱਤਾ ਸੀ

1 ਦਸੰਬਰ, 2025 ਅਜ ਦੀ ਆਵਾਜ਼

International Desk:  ਢਾਕਾ (ਏਐਫਪੀ): ਬੰਗਲਾਦੇਸ਼ ਵਿੱਚ 16 ਸਾਲ ਪਹਿਲਾਂ ਹੋਏ ਖੂਨੀ ਵਿਦਰੋਹ ਦੀ ਜਾਂਚ ਲਈ ਬਣੇ ਕਮਿਸ਼ਨ ਨੇ ਐਤਵਾਰ ਨੂੰ ਆਪਣੀ ਰਿਪੋਰਟ ਜਾਰੀ ਕਰਦਿਆਂ ਸੰਸਨੀਖੇਜ਼ ਦਾਅਵਾ ਕੀਤਾ ਹੈ ਕਿ ਸਾਬਕਾ ਪ੍ਰਧਾਨ ਮੰਤਰੀ ਸ਼ੇਖ ਹਸੀਨਾ ਨੇ 2009 ਦੇ ਇਸ ਕਤਲੇਆਮ ਦਾ ਹੁਕਮ ਖ਼ੁਦ ਦਿੱਤਾ ਸੀ। ਇਸ ਹਾਦਸੇ ਵਿੱਚ ਦਰਜਨਾਂ ਉੱਚ ਫੌਜੀ ਅਫ਼ਸਰ ਮਾਰੇ ਗਏ ਸਨ।

ਰਿਪੋਰਟ ਅਨੁਸਾਰ, ਬੰਗਲਾਦੇਸ਼ ਰਾਈਫਲਜ਼ (ਬੀਡੀਆਰ) ਦੇ ਗੁੱਸੇ ਵਿੱਚ ਆਏ ਸਿਪਾਹੀਆਂ ਨੇ ਦੋ ਦਿਨ ਚੱਲੇ ਵਿਦਰੋਹ ਦੌਰਾਨ ਫੌਜੀ ਅਧਿਕਾਰੀਆਂ ਸਮੇਤ 74 ਲੋਕਾਂ ਦੀ ਹੱਤਿਆ ਕਰ ਦਿੱਤੀ ਸੀ। ਇਹ ਖੂਨੀ ਬਗਾਵਤ 2009 ਵਿੱਚ ਢਾਕਾ ਤੋਂ ਸ਼ੁਰੂ ਹੋ ਕੇ ਪੂਰੇ ਦੇਸ਼ ਵਿੱਚ ਫੈਲ ਗਈ ਸੀ, ਜਿਸ ਨਾਲ ਸ਼ੇਖ ਹਸੀਨਾ ਦੀ ਨਵੀਂ ਬਣੀ ਸਰਕਾਰ ਕੁਝ ਹਫ਼ਤਿਆਂ ਵਿੱਚ ਹੀ ਹਿਲ ਗਈ ਸੀ।

ਕਮਿਸ਼ਨ ਦੀ ਰਿਪੋਰਟ ਮੁਤਾਬਕ, ਤਤਕਾਲੀ ਅਵਾਮੀ ਲੀਗ ਸਰਕਾਰ ਇਸ ਸਾਜ਼ਿਸ਼ ਵਿੱਚ ਸਿੱਧੇ ਤੌਰ ‘ਤੇ ਸ਼ਾਮਲ ਸੀ। ਸਰਕਾਰੀ ਬਿਆਨ ਵਿੱਚ ਕਿਹਾ ਗਿਆ ਹੈ ਕਿ ਸਾਬਕਾ ਸੰਸਦ ਮੈਂਬਰ ਫ਼ਜ਼ਲੇ ਨੂਰ ਤਪੋਸ਼ ਨੇ “ਮੁੱਖ ਤਾਲਮੇਲਕਾਰ” ਵਜੋਂ ਭੂਮਿਕਾ ਨਿਭਾਈ ਅਤੇ ਹਸੀਨਾ ਦੇ ਇਸ਼ਾਰੇ ‘ਤੇ ਹੱਤਿਆਵਾਂ ਲਈ ਹਰੀ ਝੰਡੀ ਦਿੱਤੀ। ਜਾਂਚ ਦੌਰਾਨ ਵਿਦੇਸ਼ੀ ਤਾਕਤਾਂ ਦੀ ਸ਼ਮੂਲੀਅਤ ਦਾ ਇਸ਼ਾਰਾ ਵੀ ਮਿਲਿਆ ਹੈ।
ਪਿਛਲੇ ਸਾਲ ਵਿਦਿਆਰਥੀ ਆੰਦੋਲਨ ਤੋਂ ਬਾਅਦ ਹਸੀਨਾ ਨੂੰ ਸੱਤਾ ਤੋਂ ਬਰਖ਼ਾਸਤ ਕਰ ਦਿੱਤਾ ਗਿਆ ਸੀ, ਜਿਸ ਤੋਂ ਬਾਦ ਮੁਹੰਮਦ ਯੂਨੂਸ ਦੀ ਅਗਵਾਈ ਵਾਲੀ ਅੰਤਰਿਮ ਸਰਕਾਰ ਨੇ ਇਸ ਘਟਨਾ ਦੀ ਫਿਰ ਤੋਂ ਜਾਂਚ ਕਰਵਾਉਣ ਲਈ ਕਮਿਸ਼ਨ ਬਣਾਇਆ ਸੀ। 78 ਸਾਲਾ ਹਸੀਨਾ ਅਦਾਲਤੀ ਹੁਕਮ ਦੇ ਬਾਵਜੂਦ ਬੰਗਲਾਦੇਸ਼ ਵਾਪਸ ਨਹੀਂ ਆਈ ਅਤੇ ਭਾਰਤ ਵਿੱਚ ਸ਼ਰਨ ਲੈ ਲਈ।

ਰਿਪੋਰਟ ਵਿੱਚ ਭਾਰਤ ‘ਤੇ ਵੀ ਗੰਭੀਰ ਦੋਸ਼
ਕਮਿਸ਼ਨ ਮੁਖੀ ਏਐਲਐਮ ਫ਼ਜ਼ਲੁਰ ਰਹਿਮਾਨ ਨੇ ਦੋਸ਼ ਲਾਇਆ ਕਿ ਭਾਰਤ ਨੇ 2009 ਦੀਆਂ ਹੱਤਿਆਵਾਂ ਤੋਂ ਬਾਅਦ ਬੰਗਲਾਦੇਸ਼ ਨੂੰ ਅਸਥਿਰ ਕਰਨ ਅਤੇ ਫੌਜ ਨੂੰ ਕਮਜ਼ੋਰ ਕਰਨ ਦੀ ਕੋਸ਼ਿਸ਼ ਕੀਤੀ। ਉਨ੍ਹਾਂ ਕਿਹਾ, “ਫੌਜ ਨੂੰ ਕਮਜ਼ੋਰ ਕਰਨ ਲਈ ਲੰਬੇ ਸਮੇਂ ਤੋਂ ਸਾਜ਼ਿਸ਼ ਚੱਲ ਰਹੀ ਸੀ।” ਭਾਰਤ ਵੱਲੋਂ ਇਸ ਦਾਅਵੇ ‘ਤੇ ਹਾਲੇ ਤੱਕ ਕੋਈ ਅਧਿਕਾਰਿਕ ਪ੍ਰਤੀਕਿਰਿਆ ਨਹੀਂ ਮਿਲੀ।

16 ਸਾਲ ਬਾਅਦ ਸੱਚਾਈ ਸਾਹਮਣੇ
ਹਸੀਨਾ ਨੂੰ ਮਿਲਦੇ ਭਾਰਤੀ ਸਮਰਥਨ ਕਾਰਨ ਦੋਹਾਂ ਦੇਸ਼ਾਂ ਦੇ ਸੰਬੰਧ ਪਿਛਲੇ ਕੁਝ ਵਰਹਿਆਂ ਵਿੱਚ ਖਰਾਬ ਹੋ ਚੁੱਕੇ ਹਨ। ਅੰਤਰਿਮ ਪ੍ਰਧਾਨ ਮੰਤਰੀ ਮੁਹੰਮਦ ਯੂਨੂਸ ਨੇ ਕਮਿਸ਼ਨ ਦੀ ਰਿਪੋਰਟ ਦਾ ਸਵਾਗਤ ਕਰਦਿਆਂ ਕਿਹਾ ਕਿ ਰਾਸ਼ਟਰ 2009 ਦੀਆਂ ਹੱਤਿਆਵਾਂ ਦੇ ਅਸਲ ਕਾਰਨਾਂ ਬਾਰੇ ਲੰਬੇ ਸਮੇਂ ਤੋਂ ਹਨੇਰੇ ਵਿੱਚ ਰਿਹਾ ਹੈ। “ਹੁਣ ਸੱਚ ਸਾਹਮਣੇ ਆ ਗਿਆ ਹੈ,” ਉਨ੍ਹਾਂ ਕਿਹਾ।