19 ਜਨਵਰੀ, 2026 ਅਜ ਦੀ ਆਵਾਜ਼
Health Desk: ਜੇ ਤੁਸੀਂ ਅਕਸਰ ਦੇਰ ਰਾਤ ਤੱਕ ਮੋਬਾਈਲ ਜਾਂ ਹੋਰ ਡਿਜੀਟਲ ਸਕ੍ਰੀਨਾਂ ਦੇਖਦੇ ਰਹਿੰਦੇ ਹੋ ਜਾਂ ਤੁਹਾਡਾ ਸੌਣ-ਜਾਗਣ ਦਾ ਸਮਾਂ ਨਿਯਮਤ ਨਹੀਂ ਹੈ, ਤਾਂ ਹੁਣ ਸੰਭਲ ਜਾਣ ਦਾ ਸਮਾਂ ਹੈ। ਆਲ ਇੰਡੀਆ ਇੰਸਟੀਚਿਊਟ ਆਫ ਮੈਡੀਕਲ ਸਾਇੰਸਜ਼ (AIIMS) ਭੋਪਾਲ ਦੀ ਇੱਕ ਮਹੱਤਵਪੂਰਨ ਖੋਜ ਵਿੱਚ ਖੁਲਾਸਾ ਹੋਇਆ ਹੈ ਕਿ ਨੀਂਦ ਦੀ ਗੜਬੜੀ ਕੈਂਸਰ ਵਰਗੀ ਗੰਭੀਰ ਅਤੇ ਜਾਨਲੇਵਾ ਬਿਮਾਰੀ ਦੇ ਖ਼ਤਰੇ ਨੂੰ ਵਧਾ ਸਕਦੀ ਹੈ।
ਐਮਸ ਭੋਪਾਲ ਦੇ ਬਾਇਓਕੈਮਿਸਟਰੀ ਵਿਭਾਗ ਦੇ ਪ੍ਰੋਫੈਸਰ ਡਾ. ਅਸ਼ੋਕ ਕੁਮਾਰ ਅਤੇ ਉਨ੍ਹਾਂ ਦੀ ਟੀਮ ਵੱਲੋਂ ਕੀਤੀ ਗਈ ਇਸ ਖੋਜ ਵਿੱਚ ਮਨੁੱਖੀ ਸਰੀਰ ਦੀ ਕੁਦਰਤੀ ਚੇਤਾਵਨੀ ਪ੍ਰਣਾਲੀ ‘ਸਰਕੇਡੀਅਨ ਰਿਦਮ’ (ਸਰੀਰਕ ਘੜੀ) ’ਤੇ ਖ਼ਾਸ ਧਿਆਨ ਦਿੱਤਾ ਗਿਆ ਹੈ। ਇਹ ਸਰੀਰਕ ਘੜੀ ਨੀਂਦ, ਹਾਰਮੋਨ ਸੰਤੁਲਨ, ਪਾਚਨ ਪ੍ਰਕਿਰਿਆ ਅਤੇ ਰੋਗ ਪ੍ਰਤੀਰੋਧਕ ਸ਼ਕਤੀ ਨੂੰ ਕੰਟਰੋਲ ਕਰਦੀ ਹੈ।
ਖੋਜ ਅਨੁਸਾਰ, ਦੇਰ ਰਾਤ ਤੱਕ ਜਾਗਣਾ, ਮੋਬਾਈਲ ਦੀ ਲਗਾਤਾਰ ਵਰਤੋਂ ਜਾਂ ਨਾਈਟ ਸ਼ਿਫਟ ਵਿੱਚ ਕੰਮ ਕਰਨ ਨਾਲ ਇਹ ਸਰੀਰਕ ਘੜੀ ਵਿਗੜ ਜਾਂਦੀ ਹੈ। ਇਸ ਕਾਰਨ ਸਰੀਰ ਦੀ ਰੱਖਿਆ ਕਰਨ ਵਾਲੀ ਇਮਿਊਨ ਸਿਸਟਮ ਕਮਜ਼ੋਰ ਪੈ ਸਕਦੀ ਹੈ ਅਤੇ ਕੈਂਸਰ ਸੈੱਲਾਂ ਨੂੰ ਵਧਣ ਦਾ ਮੌਕਾ ਮਿਲ ਜਾਂਦਾ ਹੈ।
ਇਹ ਅਧਿਐਨ ਅੰਤਰਰਾਸ਼ਟਰੀ ਪੱਧਰ ਦੇ ਪ੍ਰਸਿੱਧ ਜਰਨਲ ‘ਸਲੀਪ ਮੈਡੀਸਨ ਰਿਵਿਊਜ਼’ ਵਿੱਚ ਪ੍ਰਕਾਸ਼ਿਤ ਹੋਇਆ ਹੈ। ਇਸ ਮਹੱਤਵਪੂਰਨ ਖੋਜ ਲਈ ਡਾ. ਅਸ਼ੋਕ ਕੁਮਾਰ ਨੂੰ ‘ਬੈਸਟ ਪੇਪਰ ਅਵਾਰਡ’ ਨਾਲ ਵੀ ਸਨਮਾਨਿਤ ਕੀਤਾ ਗਿਆ ਹੈ। ਐਮਸ ਭੋਪਾਲ ਦੇ ਡਾਇਰੈਕਟਰ ਡਾ. ਮਾਧਵਾਨੰਦ ਕਰ ਨੇ ਇਸ ਖੋਜ ਨੂੰ ਸਮਾਜ ਲਈ ਇੱਕ ਵੱਡੀ ‘ਵੇਕ-ਅੱਪ ਕਾਲ’ ਕਰਾਰ ਦਿੱਤਾ ਹੈ।
ਆਮ ਲੋਕਾਂ ਲਈ ਜ਼ਰੂਰੀ ਸਲਾਹ:
-
ਹਰ ਰੋਜ਼ ਸੌਣ ਅਤੇ ਜਾਗਣ ਦਾ ਸਮਾਂ ਤੈਅ ਕਰੋ।
-
ਸੌਣ ਤੋਂ ਘੱਟੋ-ਘੱਟ ਇੱਕ ਘੰਟਾ ਪਹਿਲਾਂ ਮੋਬਾਈਲ, ਲੈਪਟਾਪ ਅਤੇ ਟੀਵੀ ਵਰਤਣਾ ਬੰਦ ਕਰੋ।
-
ਖਾਣ-ਪੀਣ ਦਾ ਸਮਾਂ ਨਿਯਮਤ ਰੱਖੋ ਤਾਂ ਜੋ ਸਰੀਰ ਦਾ ਮੈਟਾਬੋਲਿਜ਼ਮ ਠੀਕ ਰਹੇ।
ਮਾਹਿਰਾਂ ਦਾ ਕਹਿਣਾ ਹੈ ਕਿ ਸਹੀ ਨੀਂਦ ਅਤੇ ਸਿਹਤਮੰਦ ਰੁਟੀਨ ਅਪਣਾ ਕੇ ਕਈ ਗੰਭੀਰ ਬਿਮਾਰੀਆਂ ਤੋਂ ਬਚਾਅ ਕੀਤਾ ਜਾ ਸਕਦਾ ਹੈ।
