6 June 2026 Aj Di Awaaj
National Desk: ਪੱਛਮੀ ਏਸ਼ੀਆ ਵਿੱਚ ਜਾਰੀ ਤਣਾਅ ਕਾਰਨ ਵਧ ਰਹੀਆਂ ਇੰਧਨ ਕੀਮਤਾਂ ਦੇ ਦਰਮਿਆਨ ਦਿੱਲੀ ਵਿੱਚ 85 ਫੀਸਦੀ ਐਥੇਨੋਲ ਮਿਸ਼ਰਤ ਵਿਸ਼ੇਸ਼ ਈਂਧਨ E-85 ਪੈਟਰੋਲ ਲਾਂਚ ਕੀਤਾ ਗਿਆ ਹੈ। ਇਹ ਕਦਮ ਨਾ ਸਿਰਫ਼ ਵਾਤਾਵਰਣ ਸੁਰੱਖਿਆ ਲਈ ਮਹੱਤਵਪੂਰਨ ਮੰਨਿਆ ਜਾ ਰਿਹਾ ਹੈ, ਸਗੋਂ ਕਿਸਾਨਾਂ ਦੀ ਆਮਦਨ ਵਧਾਉਣ ਵਿੱਚ ਵੀ ਮਦਦਗਾਰ ਸਾਬਤ ਹੋ ਸਕਦਾ ਹੈ।
E-85 ਪੈਟਰੋਲ ਵਿੱਚ 85 ਫੀਸਦੀ ਐਥੇਨੋਲ ਅਤੇ 15 ਫੀਸਦੀ ਪੈਟਰੋਲ ਦਾ ਮਿਸ਼ਰਣ ਹੁੰਦਾ ਹੈ, ਜਦਕਿ ਆਮ ਪੈਟਰੋਲ ਵਿੱਚ ਵੱਧ ਤੋਂ ਵੱਧ 20 ਫੀਸਦੀ ਐਥੇਨੋਲ ਮਿਲਾਇਆ ਜਾਂਦਾ ਹੈ। ਇਸ ਦੀ ਕੀਮਤ ਦਿੱਲੀ ਵਿੱਚ 82.12 ਰੁਪਏ ਪ੍ਰਤੀ ਲੀਟਰ ਰੱਖੀ ਗਈ ਹੈ, ਜੋ ਮੌਜੂਦਾ CNG ਦੀ ਕੀਮਤ 83.09 ਰੁਪਏ ਪ੍ਰਤੀ ਕਿਲੋਗ੍ਰਾਮ ਤੋਂ ਵੀ ਘੱਟ ਹੈ।
ਫਿਲਹਾਲ ਇਹ ਈਂਧਨ ਆਨੰਦ ਵਿਹਾਰ, ਪੂਸਾ ਰੋਡ (ਕਰੋਲ ਬਾਗ), ਨਿਜ਼ਾਮੁੱਦੀਨ ਸਮੇਤ ਦਿੱਲੀ ਦੇ ਸੱਤ ਚੁਣਿੰਦੇ ਪੈਟਰੋਲ ਪੰਪਾਂ ‘ਤੇ ਉਪਲਬਧ ਕਰਵਾਇਆ ਗਿਆ ਹੈ। ਹਾਲਾਂਕਿ ਇਸ ਦੀ ਵਰਤੋਂ ਸਿਰਫ਼ E-85 ਅਨੁਕੂਲ (ਫਲੈਕਸ-ਫਿਊਲ) ਵਾਹਨਾਂ ਵਿੱਚ ਹੀ ਕੀਤੀ ਜਾ ਸਕਦੀ ਹੈ। ਭਾਰਤ ਵਿੱਚ ਇਸ ਸ਼੍ਰੇਣੀ ਦੇ ਵਾਹਨ ਅਜੇ ਸ਼ੁਰੂਆਤੀ ਪੜਾਅ ਵਿੱਚ ਹਨ ਅਤੇ ਵਾਹਨ ਨਿਰਮਾਤਾ ਕੰਪਨੀਆਂ ਨੇ ਹਾਲ ਹੀ ਵਿੱਚ ਇਨ੍ਹਾਂ ਨੂੰ ਬਾਜ਼ਾਰ ਵਿੱਚ ਉਤਾਰਨਾ ਸ਼ੁਰੂ ਕੀਤਾ ਹੈ।
ਕੇਂਦਰੀ ਪੈਟਰੋਲੀਅਮ ਅਤੇ ਕੁਦਰਤੀ ਗੈਸ ਮੰਤਰੀ ਹਰਦੀਪ ਸਿੰਘ ਪੁਰੀ ਨੇ ਪੂਸਾ ਰੋਡ ਸਥਿਤ ਇੰਡਿਅਨ ਆਇਲ ਦੇ ਆਉਟਲੈੱਟ ‘ਤੇ ਆਯੋਜਿਤ ਸਮਾਗਮ ਦੌਰਾਨ ਇਸ ਵਿਸ਼ੇਸ਼ ਈਂਧਨ ਦੀ ਸ਼ੁਰੂਆਤ ਕੀਤੀ। ਉਨ੍ਹਾਂ ਦੱਸਿਆ ਕਿ ਸਾਲ 2026 ਦੇ ਅੰਤ ਤੱਕ ਇਸ ਨੂੰ ਦੇਸ਼ ਭਰ ਦੇ 500 ਪੈਟਰੋਲ ਪੰਪਾਂ ਅਤੇ ਅਗਲੇ ਸਾਲ 5,000 ਪੈਟਰੋਲ ਪੰਪਾਂ ਤੱਕ ਵਿਸਤਾਰ ਕਰਨ ਦੀ ਯੋਜਨਾ ਹੈ।
ਪੈਟਰੋਲ ਪੰਪ ਸੰਚਾਲਕਾਂ ਮੁਤਾਬਕ E-85 ਦੀ ਵਿਕਰੀ ਲਈ ਵੱਖਰੇ ਟੈਂਕ, ਪਾਈਪਲਾਈਨ ਅਤੇ ਡਿਸਪੈਂਸਿੰਗ ਸਿਸਟਮ ਸਥਾਪਿਤ ਕੀਤੇ ਗਏ ਹਨ। ਜਿਵੇਂ-ਜਿਵੇਂ E-85 ਵਾਹਨਾਂ ਦੀ ਗਿਣਤੀ ਵਧੇਗੀ, ਇਸ ਈਂਧਨ ਦੀ ਉਪਲਬਧਤਾ ਵੀ ਹੋਰ ਪੈਟਰੋਲ ਪੰਪਾਂ ਤੱਕ ਵਧਾਈ ਜਾਵੇਗੀ।
ਮਾਹਿਰਾਂ ਦਾ ਮੰਨਣਾ ਹੈ ਕਿ E-85 ਪੈਟਰੋਲ ਦੀ ਵਰਤੋਂ ਨਾਲ ਕਾਰਬਨ ਗੈਸਾਂ ਦੇ ਨਿਕਾਸ ਵਿੱਚ ਲਗਭਗ 61 ਫੀਸਦੀ ਤੱਕ ਕਮੀ ਆ ਸਕਦੀ ਹੈ। ਐਥੇਨੋਲ ਗੰਨੇ ਅਤੇ ਹੋਰ ਖੇਤੀਬਾੜੀ ਅਵਸ਼ੇਸ਼ਾਂ ਤੋਂ ਤਿਆਰ ਕੀਤਾ ਜਾਂਦਾ ਹੈ, ਜਿਸ ਨਾਲ ਕਿਸਾਨਾਂ ਨੂੰ ਆਪਣੀ ਫਸਲ ਦਾ ਵਧੀਆ ਮੁੱਲ ਮਿਲਣ ਅਤੇ ਵਾਧੂ ਆਮਦਨ ਪ੍ਰਾਪਤ ਹੋਣ ਦੀ ਸੰਭਾਵਨਾ ਹੈ। ਇਸ ਨਾਲ ਪੇਂਡੂ ਅਰਥਵਿਵਸਥਾ ਨੂੰ ਮਜ਼ਬੂਤੀ ਮਿਲੇਗੀ ਅਤੇ ਦੇਸ਼ ਦੀ ਊਰਜਾ ਆਤਮਨਿਰਭਰਤਾ ਨੂੰ ਵੀ ਉਤਸ਼ਾਹ ਮਿਲੇਗਾ।
