24 ਮਾਰਚ 2026 Aj Di Awaaj
International Desk: ਅਮਰੀਕਾ ਦੇ ਨਿਊਯਾਰਕ ਸਥਿਤ ਲਾ ਗਾਰਡੀਆ ਹਵਾਈ ਅੱਡੇ ‘ਤੇ ਇੱਕ ਭਿਆਨਕ ਹਾਦਸਾ ਵਾਪਰ ਗਿਆ, ਜਿੱਥੇ ਏਅਰ ਕੈਨੇਡਾ ਐਕਸਪ੍ਰੈਸ ਦਾ ਯਾਤਰੀ ਜਹਾਜ਼ ਰਨਵੇਅ ‘ਤੇ ਫਾਇਰ ਬ੍ਰਿਗੇਡ ਦੇ ਟਰੱਕ ਨਾਲ ਟਕਰਾ ਗਿਆ। ਇਸ ਹਾਦਸੇ ਵਿੱਚ ਜਹਾਜ਼ ਦੇ ਪਾਇਲਟ ਅਤੇ ਕੋ-ਪਾਇਲਟ ਦੀ ਮੌ*ਤ ਹੋ ਗਈ, ਜਦਕਿ 13 ਲੋਕ ਜ਼ਖ਼ਮੀ ਹੋ ਗਏ ਹਨ। ਜ਼ਖ਼ਮੀਆਂ ਵਿੱਚ ਦੋ ਫਾਇਰਫਾਈਟਰ ਵੀ ਸ਼ਾਮਲ ਹਨ।
CCTV ਵਿੱਚ ਕੈਦ ਹੋਈ ਟੱਕਰ
ਹਵਾਈ ਅੱਡੇ ਦੇ ਸੀਸੀਟੀਵੀ ਫੁਟੇਜ ਵਿੱਚ ਇਹ ਭਿਆਨਕ ਟੱਕਰ ਕੈਦ ਹੋ ਗਈ ਹੈ। ਵੀਡੀਓ ਵਿੱਚ ਦਿਖਾਈ ਦਿੰਦਾ ਹੈ ਕਿ ਜਹਾਜ਼ ਅਤੇ ਫਾਇਰ ਬ੍ਰਿਗੇਡ ਦਾ ਟਰੱਕ ਵੱਖ-ਵੱਖ ਰਨਵੇਅ ‘ਤੇ ਅੱਗੇ ਵਧ ਰਹੇ ਸਨ। ਜਦੋਂ ਦੋਵੇਂ ਇੱਕ ਚੌਰਾਹੇ ‘ਤੇ ਪਹੁੰਚੇ ਤਾਂ ਜਹਾਜ਼ ਸਿੱਧਾ ਟਰੱਕ ਨਾਲ ਟਕਰਾ ਗਿਆ। ਟੱਕਰ ਇੰਨੀ ਜ਼ੋਰਦਾਰ ਸੀ ਕਿ ਫਾਇਰ ਟਰੱਕ ਪਲਟ ਗਿਆ ਅਤੇ ਜਹਾਜ਼ ਰਨਵੇਅ ‘ਤੇ ਘਿਸੜਦਾ ਹੋਇਆ ਅੱਗੇ ਵਧ ਗਿਆ, ਜਿਸ ਵਿੱਚੋਂ ਧੂੰਆਂ ਨਿਕਲਣ ਲੱਗ ਪਿਆ।
ਮਾਂਟਰੀਅਲ ਤੋਂ ਆ ਰਿਹਾ ਸੀ ਜਹਾਜ਼
ਇਹ ਹਾਦਸਾ ਨਿਊਯਾਰਕ ਦੇ ਕਵੀਨਜ਼ ਇਲਾਕੇ ਵਿੱਚ ਸਥਿਤ ਲਾ ਗਾਰਡੀਆ ਏਅਰਪੋਰਟ ‘ਤੇ ਸਥਾਨਕ ਸਮੇਂ ਅਨੁਸਾਰ ਰਾਤ 11:38 ਵਜੇ ਵਾਪਰਿਆ। ਏਅਰ ਕੈਨੇਡਾ ਦੀ ਸਹਿਯੋਗੀ ਕੰਪਨੀ ਜੈਜ਼ ਐਵੀਏਸ਼ਨ ਵੱਲੋਂ ਚਲਾਇਆ ਜਾ ਰਿਹਾ CRJ-900 ਜਹਾਜ਼ (ਫਲਾਈਟ 8646) ਮਾਂਟਰੀਅਲ ਤੋਂ ਆ ਰਿਹਾ ਸੀ। ਜਦੋਂ ਇਹ ਰਨਵੇਅ 4 ‘ਤੇ ਅੱਗੇ ਵਧ ਰਿਹਾ ਸੀ ਤਾਂ ਪੋਰਟ ਅਥਾਰਟੀ ਪੁਲਿਸ ਵਿਭਾਗ ਦਾ ਫਾਇਰ ਟਰੱਕ ਇਸ ਦੇ ਸਾਹਮਣੇ ਆ ਗਿਆ ਅਤੇ ਦੋਵਾਂ ਦੀ ਟੱਕਰ ਹੋ ਗਈ।
ਫਲਾਈਟ ਟ੍ਰੈਕਿੰਗ ਪਲੇਟਫਾਰਮ ਫਲਾਈਟਰਾਡਾਰ24 ਮੁਤਾਬਕ, ਟੱਕਰ ਵੇਲੇ ਜਹਾਜ਼ ਦੀ ਰਫ਼ਤਾਰ ਲਗਭਗ 24 ਮੀਲ ਪ੍ਰਤੀ ਘੰਟਾ ਸੀ। ਜਹਾਜ਼ ਵਿੱਚ ਚਾਲਕ ਦਲ ਦੇ ਚਾਰ ਮੈਂਬਰਾਂ ਸਮੇਤ ਕੁੱਲ 76 ਲੋਕ ਸਵਾਰ ਸਨ।
ਹਾਦਸੇ ਦੀ ਜਾਂਚ ਸ਼ੁਰੂ
ਰਿਪੋਰਟਾਂ ਮੁਤਾਬਕ 1992 ਤੋਂ ਬਾਅਦ ਲਾ ਗਾਰਡੀਆ ਹਵਾਈ ਅੱਡੇ ‘ਤੇ ਇਹ ਸਭ ਤੋਂ ਘਾਤਕ ਹਾਦਸਾ ਹੈ। ਅਮਰੀਕੀ ਹਵਾਈ ਸੁਰੱਖਿਆ ਏਜੰਸੀਆਂ ਨੇ ਕੈਨੇਡਾ ਦੇ ਅਧਿਕਾਰੀਆਂ ਨਾਲ ਮਿਲ ਕੇ ਘਟਨਾ ਦੀ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।
ਏਅਰ ਟ੍ਰੈਫਿਕ ਕੰਟਰੋਲ ਦੀ ਆਡੀਓ ਰਿਕਾਰਡਿੰਗ ਵਿੱਚ ਸੁਣਿਆ ਗਿਆ ਕਿ ਇੱਕ ਕੰਟਰੋਲਰ ਨੇ ਪਹਿਲਾਂ ਫਾਇਰ ਟਰੱਕ ਨੂੰ ਰਨਵੇਅ ਪਾਰ ਕਰਨ ਦੀ ਇਜਾਜ਼ਤ ਦਿੱਤੀ ਸੀ, ਪਰ ਕੁਝ ਸਮੇਂ ਬਾਅਦ ਉਸ ਨੇ ਟਰੱਕ ਨੂੰ ਤੁਰੰਤ ਰੁਕਣ ਲਈ ਕਿਹਾ।
ਕੰਟਰੋਲਰ ਨੇ ਮੰਨੀ ਗਲਤੀ
ਰਿਕਾਰਡਿੰਗ ਵਿੱਚ ਕੰਟਰੋਲਰ ਕਹਿੰਦਾ ਸੁਣਿਆ ਗਿਆ, “ਟਰੱਕ ਵਨ, ਰੁਕੋ… ਰੁਕੋ, ਰੁਕੋ!” ਪਰ ਇਸ ਤੋਂ ਪਹਿਲਾਂ ਹੀ ਟੱਕਰ ਹੋ ਚੁੱਕੀ ਸੀ। ਬਾਅਦ ਵਿੱਚ ਇੱਕ ਕੰਟਰੋਲਰ ਨੇ ਕਿਹਾ, “ਇਹ ਦੇਖਣਾ ਬਹੁਤ ਮਾੜਾ ਸੀ,” ਜਿਸ ‘ਤੇ ਦੂਜੇ ਨੇ ਜਵਾਬ ਦਿੱਤਾ, “ਹਾਂ, ਮੈਨੂੰ ਪਤਾ ਹੈ… ਮੈਥੋਂ ਗਲਤੀ ਹੋ ਗਈ।”
ਨੇਤਾਵਾਂ ਦੀ ਪ੍ਰਤੀਕਿਰਿਆ
ਅਮਰੀਕਾ ਦੇ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਇਸ ਹਾਦਸੇ ਨੂੰ ਬਹੁਤ ਹੀ ਦੁਖਦਾਈ ਅਤੇ ਖ਼ਤਰਨਾਕ ਘਟਨਾ ਕਰਾਰ ਦਿੱਤਾ। ਉੱਧਰ ਕੈਨੇਡਾ ਦੇ ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਨੇ ਮ੍ਰਿਤਕਾਂ ਲਈ ਸੰਵੇਦਨਾ ਪ੍ਰਗਟ ਕਰਦਿਆਂ ਕਿਹਾ ਕਿ ਇਹ ਬੇਹੱਦ ਦੁਖਦਾਈ ਹਾਦਸਾ ਹੈ।
