International 16 Mar 2026 AJ DI Awaaj
International Desk : ਇਰਾਕ ਦੇ ਪੱਛਮੀ ਇਲਾਕੇ ਵਿੱਚ ਵੀਰਵਾਰ ਨੂੰ ਅਮਰੀਕੀ ਵਾਯੂ ਸੈਨਾ ਦਾ KC-135 ਰਿਫਿਊਲਿੰਗ ਜਹਾਜ਼ ਕ੍ਰੈਸ਼ ਹੋਣ ਕਾਰਨ 6 ਹਵਾਈ ਸੈਨਿਕਾਂ ਦੀ ਮੌ*ਤ ਹੋ ਗਈ। ਇਸ ਦੁਖਦਾਈ ਘਟਨਾ ਤੋਂ ਬਾਅਦ ਅਮਰੀਕੀ ਰੱਖਿਆ ਵਿਭਾਗ ਪੈਂਟਾਗਨ ਵੱਲੋਂ ਮਾਰੇ ਗਏ ਸੈਨਿਕਾਂ ਦੇ ਨਾਮ ਜਾਰੀ ਕਰ ਦਿੱਤੇ ਗਏ ਹਨ। ਹਾਦਸੇ ਦੇ ਕਾਰਨਾਂ ਦੀ ਜਾਂਚ ਇਸ ਸਮੇਂ ਜਾਰੀ ਹੈ।
ਪੈਂਟਾਗਨ ਮੁਤਾਬਕ ਮਰਨ ਵਾਲਿਆਂ ਵਿੱਚ 33 ਸਾਲਾ ਮੇਜਰ ਜੌਨ ਏ. ਕਲਿਨਰ (ਅਲਾਬਾਮਾ), 31 ਸਾਲਾ ਕੈਪਟਨ ਏਰੀਆਨਾ ਜੀ. ਸਾਵੀਨੋ (ਵਾਸ਼ਿੰਗਟਨ), 34 ਸਾਲਾ ਟੈਕਨੀਕਲ ਸਰਜੰਟ ਐਸ਼ਲੀ ਬੀ. ਪ੍ਰੂਇਟ (ਕੈਂਟਕੀ), 38 ਸਾਲਾ ਕੈਪਟਨ ਸੈਥ ਆਰ. ਕੋਵਲ (ਇੰਡੀਆਨਾ), 30 ਸਾਲਾ ਕੈਪਟਨ ਕਰਟਿਸ ਜੇ. ਐਂਗਸਟ (ਓਹਾਇਓ) ਅਤੇ 28 ਸਾਲਾ ਟੈਕਨੀਕਲ ਸਰਜੰਟ ਟਾਇਲਰ ਐਚ. ਸਿਮਨਸ (ਓਹਾਇਓ) ਸ਼ਾਮਲ ਹਨ।
ਜਾਣਕਾਰੀ ਮੁਤਾਬਕ ਇਹ ਸਾਰੇ ਸੈਨਿਕ ਅਮਰੀਕੀ ਵਾਯੂ ਸੈਨਾ ਵਿੱਚ ਮਹੱਤਵਪੂਰਨ ਜ਼ਿੰਮੇਵਾਰੀਆਂ ਨਿਭਾ ਰਹੇ ਸਨ। ਕੈਪਟਨ ਏਰੀਆਨਾ ਜੀ. ਸਾਵੀਨੋ ਹਾਲ ਹੀ ਵਿੱਚ ਪਾਇਲਟ ਵਜੋਂ ਆਪਣੀ ਟ੍ਰੇਨਿੰਗ ਪੂਰੀ ਕਰਕੇ ਸਕਵਾਡਰਨ ਓਪਰੇਸ਼ਨਾਂ ਵਿੱਚ ਸਰਗਰਮ ਭੂਮਿਕਾ ਨਿਭਾ ਰਹੀ ਸੀ ਅਤੇ ਉਨ੍ਹਾਂ ਨੂੰ ਭਵਿੱਖ ਦੀ ਉਭਰਦੀ ਪਾਇਲਟ ਵਜੋਂ ਦੇਖਿਆ ਜਾ ਰਿਹਾ ਸੀ।
ਇਸੇ ਤਰ੍ਹਾਂ ਕੈਪਟਨ ਸੈਥ ਆਰ. ਕੋਵਲ ਕਈ ਹਵਾਈ ਸੈਨਿਕਾਂ ਨੂੰ ਫਲਾਈਟ ਟ੍ਰੇਨਿੰਗ ਦੇਣ ਦੀ ਜ਼ਿੰਮੇਵਾਰੀ ਨਿਭਾ ਰਹੇ ਸਨ। ਉਹ ਤਜਰਬੇਕਾਰ ਅਧਿਕਾਰੀ ਮੰਨੇ ਜਾਂਦੇ ਸਨ ਅਤੇ ਨਵੇਂ ਪਾਇਲਟਾਂ ਦੀ ਤਿਆਰੀ ਵਿੱਚ ਉਨ੍ਹਾਂ ਦਾ ਮਹੱਤਵਪੂਰਨ ਯੋਗਦਾਨ ਸੀ।
28 ਸਾਲਾ ਟੈਕਨੀਕਲ ਸਰਜੰਟ ਟਾਇਲਰ ਐਚ. ਸਿਮਨਸ ਨੂੰ ਉਸਦੇ ਸਾਥੀ ਉਸਦੀ “ਮਿਲੀਅਨ ਡਾਲਰ ਮੁਸਕਾਨ” ਲਈ ਯਾਦ ਕਰ ਰਹੇ ਹਨ। ਸਾਥੀਆਂ ਮੁਤਾਬਕ ਉਹ ਹਮੇਸ਼ਾਂ ਖੁਸ਼ਮਿਜਾਜ਼ ਰਹਿੰਦਾ ਸੀ ਅਤੇ ਟੀਮ ਦਾ ਮਨੋਬਲ ਉੱਚਾ ਰੱਖਣ ਵਿੱਚ ਅਹਿਮ ਭੂਮਿਕਾ ਨਿਭਾਉਂਦਾ ਸੀ।
KC-135 ਜਹਾਜ਼ ਅਮਰੀਕੀ ਵਾਯੂ ਸੈਨਾ ਦਾ ਇੱਕ ਮਹੱਤਵਪੂਰਨ ਰਿਫਿਊਲਿੰਗ ਜਹਾਜ਼ ਹੈ ਜੋ ਉਡਾਨ ਦੌਰਾਨ ਹੀ ਹੋਰ ਜਹਾਜ਼ਾਂ ਨੂੰ ਇੰਧਨ ਪ੍ਰਦਾਨ ਕਰਦਾ ਹੈ ਅਤੇ ਲੰਬੇ ਹਵਾਈ ਮਿਸ਼ਨਾਂ ਵਿੱਚ ਇਸਦੀ ਵੱਡੀ ਭੂਮਿਕਾ ਹੁੰਦੀ ਹੈ।
