22 ਜਨਵਰੀ, 2026 ਅਜ ਦੀ ਆਵਾਜ਼
Education Desk: ਜੇ ਤੁਹਾਨੂੰ ਟੈਕਨੋਲੋਜੀ ਦੀ ਡੂੰਘੀ ਸਮਝ ਹੈ, ਕ੍ਰੀਏਟਿਵ ਸੋਚ ਹੈ ਅਤੇ ਲੋਕਾਂ ਨੂੰ ਸਮਝਣ ਦੀ ਖ਼ੂਬੀ ਹੈ, ਤਾਂ ਤੁਹਾਡੇ ਲਈ ਇੱਕ ਵੱਡਾ ਮੌਕਾ ਹੈ। ਟੈਸਲਾ ਅਤੇ ਸਪੇਸਐਕਸ ਦੇ ਸੀਈਓ ਐਲਨ ਮਸਕ ਆਪਣੀ ਆਰਟੀਫ਼ਿਸ਼ਲ ਇੰਟੈਲੀਜੈਂਸ ਕੰਪਨੀ xAI ਲਈ ਖਾਸ ਕਿਸਮ ਦੇ ਇੰਜੀਨੀਅਰਾਂ ਦੀ ਭਰਤੀ ਕਰ ਰਹੇ ਹਨ। ਇੱਥੇ ਡਿਗਰੀ ਤੋਂ ਵੱਧ ਤੁਹਾਡੀ ਸੋਚ, ਤਜਰਬਾ ਅਤੇ ਟੈਲੈਂਟ ਪਛਾਣਣ ਦੀ ਸਮਰਥਾ ਨੂੰ ਤਰਜੀਹ ਦਿੱਤੀ ਜਾਵੇਗੀ। ਸਭ ਤੋਂ ਵੱਡੀ ਗੱਲ ਇਹ ਹੈ ਕਿ ਇਸ ਨੌਕਰੀ ਵਿੱਚ ਸਾਲਾਨਾ ਸੈਲਰੀ ਕਰੋੜਾਂ ਰੁਪਏ ਤੱਕ ਹੋ ਸਕਦੀ ਹੈ।
xAI ਵਿੱਚ ‘ਟੈਲੈਂਟ ਇੰਜੀਨੀਅਰ’ ਦੀ ਭਰਤੀ
ਐਲਨ ਮਸਕ ਆਪਣੀ AI ਕੰਪਨੀ xAI ਰਾਹੀਂ ਭਵਿੱਖ ਦੀ ਤਕਨਾਲੋਜੀ ‘ਤੇ ਕੰਮ ਕਰ ਰਹੇ ਹਨ। ਇਸ ਮਕਸਦ ਲਈ ਉਹ ਇੱਕ ਛੋਟੀ ਪਰ ਬਹੁਤ ਹੀ ਕਾਬਲ ਟੀਮ ਬਣਾਉਣਾ ਚਾਹੁੰਦੇ ਹਨ, ਜਿਸਨੂੰ ਟੈਲੈਂਟ ਇੰਜੀਨੀਅਰ ਕਿਹਾ ਗਿਆ ਹੈ। xAI ਦੀ ਕਰੀਅਰ ਵੈਬਸਾਈਟ ਮੁਤਾਬਕ, ਇਹ ਟੀਮ ਦੁਨੀਆ ਭਰ ਤੋਂ ਸਭ ਤੋਂ ਵਧੀਆ ਟੈਲੈਂਟ ਦੀ ਪਛਾਣ ਕਰਕੇ ਉਨ੍ਹਾਂ ਨੂੰ ਕੰਪਨੀ ਨਾਲ ਜੋੜੇਗੀ।
ਉਨ੍ਹਾਂ ਉਮੀਦਵਾਰਾਂ ਨੂੰ ਤਰਜੀਹ ਮਿਲੇਗੀ ਜਿਨ੍ਹਾਂ ਨੇ ਘੱਟ ਉਮਰ ਤੋਂ ਹੀ ਪర్సਨਲ ਪ੍ਰੋਜੈਕਟਸ ‘ਤੇ ਕੰਮ ਕੀਤਾ ਹੋਵੇ, ਓਪਨ-ਸੋਰਸ ਵਿੱਚ ਯੋਗਦਾਨ ਦਿੱਤਾ ਹੋਵੇ ਜਾਂ ਨਵੇਂ ਇਨੋਵੇਟਿਵ ਆਈਡੀਆਜ਼ ‘ਤੇ ਤਜਰਬੇ ਕੀਤੇ ਹੋਣ। ਇਹ ਟੀਮ ਸਿੱਧੇ ਤੌਰ ‘ਤੇ ਐਲਨ ਮਸਕ ਨੂੰ ਰਿਪੋਰਟ ਕਰੇਗੀ ਅਤੇ ਭਰਤੀ ਲਈ ਰਵਾਇਤੀ ਤਰੀਕਿਆਂ ਤੋਂ ਵੱਖਰਾ ਅਪ੍ਰੋਚ ਅਪਣਾਇਆ ਜਾਵੇਗਾ।
ਸਾਲਾਨਾ ਕਰੋੜਾਂ ਦੀ ਸੈਲਰੀ
xAI ਦੀ ਜੌਬ ਲਿਸਟਿੰਗ ਅਨੁਸਾਰ, ਚੁਣੇ ਗਏ ਟੈਲੈਂਟ ਇੰਜੀਨੀਅਰਾਂ ਨੂੰ 1.09 ਕਰੋੜ ਤੋਂ 2.18 ਕਰੋੜ ਰੁਪਏ ਸਾਲਾਨਾ ਤੱਕ ਦਾ ਪੈਕੇਜ ਮਿਲ ਸਕਦਾ ਹੈ। ਨੌਕਰੀ ਦੀ ਪੋਸਟਿੰਗ ਕੈਲੀਫੋਰਨੀਆ ਦੇ ਪਾਲੋ ਆਲਟੋ ਵਿੱਚ ਹੋਵੇਗੀ। ਸੈਲਰੀ ਤੋਂ ਇਲਾਵਾ ਇਕਵਿਟੀ, ਮੈਡੀਕਲ, ਡੈਂਟਲ ਅਤੇ ਵਿਜ਼ਨ ਕਵਰੇਜ, 401(k) ਰਿਟਾਇਰਮੈਂਟ ਪਲਾਨ, ਇਨਸ਼ੋਰੈਂਸ ਅਤੇ ਹੋਰ ਕਈ ਸੁਵਿਧਾਵਾਂ ਵੀ ਮਿਲਣਗੀਆਂ।
ਬਿਨਾਂ ਇਮਤਿਹਾਨ ਸਿੱਧਾ ਇੰਟਰਵਿਊ
ਇਸ ਭਰਤੀ ਪ੍ਰਕਿਰਿਆ ਦੀ ਸਭ ਤੋਂ ਖਾਸ ਗੱਲ ਇਹ ਹੈ ਕਿ ਇਸ ਵਿੱਚ ਕੋਈ ਲਿਖਤੀ ਪਰੀਖਿਆ ਨਹੀਂ ਹੋਵੇਗੀ। ਅਰਜ਼ੀ ਦੇਣ ਤੋਂ ਬਾਅਦ ਪਹਿਲਾਂ 30 ਮਿੰਟ ਦੀ ਇੰਟਰੋ ਕਾਲ ਹੋਵੇਗੀ, ਫਿਰ ਇੰਟਰਵਿਊ ਅਤੇ ਪ੍ਰੇਜ਼ੈਂਟੇਸ਼ਨ ਦੇ ਆਧਾਰ ‘ਤੇ ਉਮੀਦਵਾਰਾਂ ਦੀ ਪਰਖ ਕੀਤੀ ਜਾਵੇਗੀ।
ਪੂਰੀ ਸਿਲੈਕਸ਼ਨ ਪ੍ਰਕਿਰਿਆ ਲਗਭਗ ਦੋ ਹਫ਼ਤਿਆਂ ਵਿੱਚ ਪੂਰੀ ਹੋ ਸਕਦੀ ਹੈ। ਜੋ ਉਮੀਦਵਾਰ ਆਪਣੇ ਆਪ ਨੂੰ ਇਸ ਰੋਲ ਲਈ ਯੋਗ ਸਮਝਦੇ ਹਨ, ਉਹ xAI ਦੀ ਅਧਿਕਾਰਕ ਕਰੀਅਰ ਵੈਬਸਾਈਟ ‘ਤੇ ਜਾ ਕੇ ਸਿੱਧਾ ਅਪਲਾਈ ਕਰ ਸਕਦੇ ਹਨ।
