ਮਿਜ਼ੋਰਮ 09 Jan 2026 AJ DI Awaaj
Sports Desk : ਕ੍ਰਿਕਟ ਮੈਚਾਂ ਦੌਰਾਨ ਅਚਾਨਕ ਮੌ*ਤਾਂ ਦੀਆਂ ਘਟਨਾਵਾਂ ਨੇ ਇੱਕ ਵਾਰ ਫਿਰ ਖੇਡ ਜਗਤ ਨੂੰ ਝੰਝੋੜ ਕੇ ਰੱਖ ਦਿੱਤਾ ਹੈ। ਇਸ ਕੜੀ ਵਿੱਚ ਸਾਬਕਾ ਭਾਰਤੀ ਘਰੇਲੂ ਕ੍ਰਿਕਟ ਖਿਡਾਰੀ ਲਾਲਰੇਮਰੂਤਾ ਦਾ ਨਾਮ ਵੀ ਸ਼ਾਮਲ ਹੋ ਗਿਆ ਹੈ। ਮਿਜ਼ੋਰਮ ਲਈ ਘਰੇਲੂ ਕ੍ਰਿਕਟ ਖੇਡਣ ਵਾਲੇ ਲਾਲਰੇਮਰੂਤਾ ਦਾ 8 ਜਨਵਰੀ ਨੂੰ ਇੱਕ ਸਥਾਨਕ ਕ੍ਰਿਕਟ ਮੈਚ ਦੌਰਾਨ ਅਚਾਨਕ ਡਿੱਗ ਪੈਣ ਕਾਰਨ ਦੇਹਾਂਤ ਹੋ ਗਿਆ।
ਇਹ ਦਰਦਨਾਕ ਘਟਨਾ ਖਾਲਿਦ ਮੈਮੋਰੀਅਲ ਸੈਕਿੰਡ ਡਿਵੀਜ਼ਨ ਸਕ੍ਰੀਨਿੰਗ ਟੂਰਨਾਮੈਂਟ ਦੌਰਾਨ ਵੈਂਘਨੁਈ ਰੇਡਰਜ਼ ਸੀਸੀ ਅਤੇ ਚੋਨਪੁਈ ਇਲਮੋਵ ਸੀਸੀ ਦੇ ਮੈਚ ਵਿੱਚ ਵਾਪਰੀ। ਵੈਂਘਨੁਈ ਰੇਡਰਜ਼ ਸੀਸੀ ਵੱਲੋਂ ਖੇਡ ਰਹੇ ਲਾਲਰੇਮਰੂਤਾ ਨੂੰ ਮੈਚ ਦੌਰਾਨ ਅਚਾਨਕ ਡਾਕਟਰੀ ਐਮਰਜੈਂਸੀ ਆ ਗਈ। ਉਨ੍ਹਾਂ ਨੂੰ ਤੁਰੰਤ ਹਸਪਤਾਲ ਲਿਜਾਇਆ ਗਿਆ, ਪਰ ਡਾਕਟਰ ਉਨ੍ਹਾਂ ਦੀ ਜਾਨ ਨਹੀਂ ਬਚਾ ਸਕੇ।
38 ਸਾਲਾ ਲਾਲਰੇਮਰੂਤਾ ਦੇ ਅਕਾਲ ਦੇਹਾਂਤ ਨਾਲ ਮਿਜ਼ੋਰਮ ਦੇ ਕ੍ਰਿਕਟ ਭਾਈਚਾਰੇ ਵਿੱਚ ਸੋਗ ਦੀ ਲਹਿਰ ਦੌੜ ਗਈ ਹੈ। ਮਿਜ਼ੋਰਮ ਸਟੇਟ ਕ੍ਰਿਕਟ ਐਸੋਸੀਏਸ਼ਨ ਨੇ ਉਨ੍ਹਾਂ ਦੇ ਸਨਮਾਨ ਵਿੱਚ ਸਾਰੇ ਨਿਰਧਾਰਤ ਮੈਚ ਰੱਦ ਕਰਨ ਦਾ ਫੈਸਲਾ ਕੀਤਾ ਹੈ।
ਲਾਲਰੇਮਰੂਤਾ ਨੇ ਮਿਜ਼ੋਰਮ ਲਈ ਦੋ ਰਣਜੀ ਟਰਾਫੀ ਮੈਚ ਖੇਡੇ ਸਨ, ਜਿਨ੍ਹਾਂ ਵਿੱਚੋਂ ਆਖਰੀ ਮੈਚ 2022 ਵਿੱਚ ਨਾਗਾਲੈਂਡ ਵਿਰੁੱਧ ਖੇਡਿਆ ਗਿਆ ਸੀ। ਇਸ ਤੋਂ ਇਲਾਵਾ ਉਨ੍ਹਾਂ ਨੇ ਸੱਤ ਟੀ-20 ਮੈਚਾਂ ਵਿੱਚ ਹਿੱਸਾ ਲੈਂਦੇ ਹੋਏ ਕੁੱਲ 87 ਦੌੜਾਂ ਬਣਾਈਆਂ, ਜਿਸ ਵਿੱਚ ਉਨ੍ਹਾਂ ਦਾ ਸਰਵੋਚ ਸਕੋਰ ਅਜੇਤੂ 44 ਦੌੜਾਂ ਰਿਹਾ। ਫਰਸਟ ਕਲਾਸ ਕ੍ਰਿਕਟ ਵਿੱਚ ਉਨ੍ਹਾਂ ਨੇ ਦੋ ਮੈਚਾਂ ਦੀਆਂ ਚਾਰ ਪਾਰੀਆਂ ਵਿੱਚ 17 ਦੌੜਾਂ ਬਣਾਈਆਂ।
ਰਿਟਾਇਰਮੈਂਟ ਤੋਂ ਬਾਅਦ ਵੀ ਲਾਲਰੇਮਰੂਤਾ ਮਿਜ਼ੋਰਮ ਕ੍ਰਿਕਟ ਨਾਲ ਸਰਗਰਮੀ ਨਾਲ ਜੁੜੇ ਰਹੇ ਅਤੇ ਸੀਨੀਅਰ ਟੂਰਨਾਮੈਂਟਾਂ ਵਿੱਚ ਕਮੇਟੀ ਮੈਂਬਰ ਵਜੋਂ ਸੇਵਾਵਾਂ ਨਿਭਾਉਂਦੇ ਰਹੇ। ਮਿਜ਼ੋਰਮ ਕ੍ਰਿਕਟ ਐਸੋਸੀਏਸ਼ਨ ਵੱਲੋਂ ਜਾਰੀ ਅਧਿਕਾਰਤ ਬਿਆਨ ਵਿੱਚ ਉਨ੍ਹਾਂ ਦੇ ਦੇਹਾਂਤ ’ਤੇ ਡੂੰਘੇ ਦੁੱਖ ਦਾ ਪ੍ਰਗਟਾਵਾ ਕਰਦਿਆਂ ਰਾਜ ਕ੍ਰਿਕਟ ਲਈ ਉਨ੍ਹਾਂ ਦੇ ਯੋਗਦਾਨ ਨੂੰ ਸਲਾਹਿਆ ਗਿਆ ਅਤੇ ਪਰਿਵਾਰ ਨਾਲ ਦਿਲੋਂ ਸੰਵੇਦਨਾ ਜਤਾਈ ਗਈ।
