31 ਦਸੰਬਰ, 2025 ਅਜ ਦੀ ਆਵਾਜ਼
Bollywood Desk: ਸਿਨੇਮਾ ਦੇ ਸ਼ਹਿਨਸ਼ਾਹ ਅਮਿਤਾਭ ਬੱਚਨ ਦੀ ਜ਼ਿੰਦਗੀ ਸਿਰਫ਼ ਕਾਮਯਾਬੀਆਂ ਨਾਲ ਹੀ ਨਹੀਂ, ਸਗੋਂ ਕਠਿਨ ਇਮਤਿਹਾਨਾਂ ਨਾਲ ਵੀ ਭਰੀ ਰਹੀ ਹੈ। 1990 ਦੇ ਦਹਾਕੇ ਦੇ ਅੰਤ ਅਤੇ 2000 ਦੀ ਸ਼ੁਰੂਆਤ ਵਿੱਚ ਬਿੱਗ ਬੀ ਨੇ ਆਪਣੇ ਕਰੀਅਰ ਦਾ ਸਭ ਤੋਂ ਮਾੜਾ ਦੌਰ ਵੇਖਿਆ, ਜਦੋਂ ਉਨ੍ਹਾਂ ‘ਤੇ ਕਰੀਬ 90 ਕਰੋੜ ਰੁਪਏ ਦਾ ਕਰਜ਼ਾ ਚੜ੍ਹ ਗਿਆ ਸੀ ਅਤੇ ਉਨ੍ਹਾਂ ਦੀ ਪ੍ਰੋਡਕਸ਼ਨ ਕੰਪਨੀ ABCL ਭਾਰੀ ਨੁਕਸਾਨ ‘ਚ ਚਲੀ ਗਈ ਸੀ।
ਮਸ਼ਹੂਰ ਲੇਖਕ ਅਤੇ ਨਿਰਦੇਸ਼ਕ ਰੂਮੀ ਜਾਫਰੀ ਨੇ ਹਾਲ ਹੀ ‘ਚ ਖੁਲਾਸਾ ਕੀਤਾ ਕਿ ਇਸ ਮੁਸ਼ਕਲ ਸਮੇਂ ਦੌਰਾਨ ਵੀ ਅਮਿਤਾਭ ਬੱਚਨ ਨੇ ਕਿਸੇ ਤੋਂ ਮਾਲੀ ਮਦਦ ਨਹੀਂ ਮੰਗੀ। ਇੱਥੋਂ ਤੱਕ ਕਿ ਜਦੋਂ ਉਦਯੋਗਪਤੀ ਧੀਰੂਭਾਈ ਅੰਬਾਨੀ ਨੇ ਆਪਣੇ ਛੋਟੇ ਪੁੱਤਰ ਅਨਿਲ ਅੰਬਾਨੀ ਰਾਹੀਂ ਮਦਦ ਦੀ ਪੇਸ਼ਕਸ਼ ਕੀਤੀ, ਤਦ ਵੀ ਬਿੱਗ ਬੀ ਨੇ ਆਪਣੀ ਖ਼ੁਦਦਾਰੀ ਦੇ ਚਲਦੇ ਉਹ ਮਦਦ ਸਵੀਕਾਰ ਨਹੀਂ ਕੀਤੀ।
ਰੂਮੀ ਜਾਫਰੀ ਮੁਤਾਬਕ, ਅਮਿਤਾਭ ਬੱਚਨ ਨੇ ਆਪਣੀ ਮਿਹਨਤ ਨਾਲ ਕਮਾਇਆ ਹਰ ਰੁਪਇਆ ਕਰਜ਼ੇ ਚੁਕਾਉਣ ‘ਚ ਲਗਾਇਆ। ‘ਕੌਣ ਬਣੇਗਾ ਕਰੋੜਪਤੀ’ ਅਤੇ ਫ਼ਿਲਮਾਂ ਤੋਂ ਹੋਈ ਕਮਾਈ ਨਾਲ ਉਨ੍ਹਾਂ ਨੇ ਧੀਰੇ-ਧੀਰੇ ਸਾਰੇ ਕਰਜ਼ੇ ਅਦਾ ਕਰ ਦਿੱਤੇ। ਇਸ ਦੌਰਾਨ ਉਨ੍ਹਾਂ ਨੇ ਹੌਂਸਲਾ ਨਹੀਂ ਹਾਰਿਆ ਅਤੇ ਮੁੜ ਆਪਣੇ ਪੈਰਾਂ ‘ਤੇ ਖੜ੍ਹੇ ਹੋ ਕੇ ਉਦਾਹਰਨ ਕਾਇਮ ਕੀਤੀ।
ਅਮਿਤਾਭ ਬੱਚਨ ਦੇ ਇਸ ਜਜ਼ਬੇ ਅਤੇ ਖ਼ੁਦਦਾਰੀ ਨੇ ਧੀਰੂਭਾਈ ਅੰਬਾਨੀ ਨੂੰ ਵੀ ਪ੍ਰਭਾਵਿਤ ਕੀਤਾ। ਕਿਹਾ ਜਾਂਦਾ ਹੈ ਕਿ ਉਨ੍ਹਾਂ ਨੇ ਬਿੱਗ ਬੀ ਦੀ ਤਾਰੀਫ਼ ਕਰਦਿਆਂ ਆਖਿਆ ਸੀ, “ਇਹ ਆਦਮੀ ਡਿੱਗਿਆ, ਪਰ ਆਪਣੇ ਦਮ ‘ਤੇ ਮੁੜ ਖੜ੍ਹਾ ਹੋ ਗਿਆ—ਇਹੀ ਸੱਚੀ ਹਿੰਮਤ ਹੈ।”
