29 ਦਸੰਬਰ, 2025 ਅਜ ਦੀ ਆਵਾਜ਼
Lifestyle Desk: ਡਾਰਕ ਚਾਕਲੇਟ ਨੂੰ ਅਕਸਰ ਸਿਰਫ਼ ਸਵਾਦ ਨਾਲ ਹੀ ਨਹੀਂ, ਸਗੋਂ ਸਿਹਤ ਲਈ ਲਾਭਦਾਇਕ ਹੋਣ ਦੇ ਦਾਵਿਆਂ ਕਰਕੇ ਵੀ ਚਰਚਾ ਵਿੱਚ ਰੱਖਿਆ ਜਾਂਦਾ ਹੈ। ਹੁਣ ਇਕ ਨਵੀਂ ਵਿਗਿਆਨਕ ਖੋਜ ਨੇ ਇਸ ਗੱਲ ਨੂੰ ਹੋਰ ਦਿਲਚਸਪ ਬਣਾ ਦਿੱਤਾ ਹੈ। ਖੋਜ ਮੁਤਾਬਕ, ਡਾਰਕ ਚਾਕਲੇਟ ਵਿੱਚ ਪਾਇਆ ਜਾਣ ਵਾਲਾ ਕੁਦਰਤੀ ਤੱਤ ਥਿਓਬ੍ਰੋਮਾਈਨ ਸਰੀਰ ਦੀ ਜੈਵਿਕ ਉਮਰ ‘ਤੇ ਅਸਰ ਪਾ ਸਕਦਾ ਹੈ।
ਵਿਗਿਆਨੀਆਂ ਦਾ ਕਹਿਣਾ ਹੈ ਕਿ ਜਿਨ੍ਹਾਂ ਲੋਕਾਂ ਦੇ ਖੂਨ ਵਿੱਚ ਥਿਓਬ੍ਰੋਮਾਈਨ ਦਾ ਪੱਧਰ ਵੱਧ ਪਾਇਆ ਗਿਆ, ਉਨ੍ਹਾਂ ਦੀ ਜੈਵਿਕ ਉਮਰ ਉਨ੍ਹਾਂ ਦੀ ਅਸਲੀ ਉਮਰ ਨਾਲੋਂ ਘੱਟ ਨਜ਼ਰ ਆਈ। ਪਰ ਸਵਾਲ ਇਹ ਹੈ ਕਿ ਕੀ ਇਸਦਾ ਮਤਲਬ ਇਹ ਹੈ ਕਿ ਡਾਰਕ ਚਾਕਲੇਟ ਨੂੰ ਖੁੱਲ੍ਹ ਕੇ ਖਾਇਆ ਜਾ ਸਕਦਾ ਹੈ? ਆਓ ਇਸ ਬਾਰੇ ਵਿਸਥਾਰ ਨਾਲ ਜਾਣੀਏ।
ਖੋਜ ਕੀ ਕਹਿੰਦੀ ਹੈ?
ਇਹ ਖੋਜ ਯੂਨਾਈਟਡ ਕਿੰਗਡਮ ਦੇ ਕਿੰਗਜ਼ ਕਾਲਜ ਲੰਡਨ ਦੇ ਵਿਗਿਆਨੀਆਂ ਵੱਲੋਂ ਕੀਤੀ ਗਈ ਹੈ। ਅਧਿਐਨ ਦੌਰਾਨ 1600 ਤੋਂ ਵੱਧ ਲੋਕਾਂ ਦੇ ਡੇਟਾ ਦੀ ਜਾਂਚ ਕੀਤੀ ਗਈ, ਜਿਸ ਵਿੱਚ 509 ਮਹਿਲਾਵਾਂ ਵੀ ਸ਼ਾਮਲ ਸਨ। ਖੋਜਕਾਰਾਂ ਨੇ ਭਾਗ ਲੈਣ ਵਾਲਿਆਂ ਦੇ ਖੂਨ ਵਿੱਚ ਥਿਓਬ੍ਰੋਮਾਈਨ ਦੇ ਪੱਧਰ ਅਤੇ ਉਨ੍ਹਾਂ ਦੀ ਜੈਵਿਕ ਉਮਰ ਦਰਮਿਆਨ ਸੰਬੰਧ ਨੂੰ ਸਮਝਣ ਦੀ ਕੋਸ਼ਿਸ਼ ਕੀਤੀ।
ਜੈਵਿਕ ਉਮਰ ਕੀ ਹੁੰਦੀ ਹੈ?
ਆਮ ਤੌਰ ‘ਤੇ ਅਸੀਂ ਉਮਰ ਨੂੰ ਸਾਲਾਂ ਨਾਲ ਮਾਪਦੇ ਹਾਂ, ਪਰ ਜੈਵਿਕ ਉਮਰ ਇਸ ਤੋਂ ਵੱਖਰੀ ਹੁੰਦੀ ਹੈ। ਇਹ ਦਰਸਾਉਂਦੀ ਹੈ ਕਿ ਸਰੀਰ ਅੰਦਰੋਂ ਕਿੰਨਾ ਤੰਦਰੁਸਤ ਹੈ ਅਤੇ ਉਸਦੇ ਅੰਗ ਕਿੰਨੀ ਚੰਗੀ ਤਰ੍ਹਾਂ ਕੰਮ ਕਰ ਰਹੇ ਹਨ। ਜੈਵਿਕ ਉਮਰ ਦਾ ਅੰਦਾਜ਼ਾ ਡੀਐਨਏ ਵਿੱਚ ਹੋਣ ਵਾਲੇ ਕੁਝ ਰਸਾਇਣਕ ਬਦਲਾਵਾਂ ਦੇ ਆਧਾਰ ‘ਤੇ ਲਗਾਇਆ ਜਾਂਦਾ ਹੈ। ਕਈ ਵਾਰ ਕਿਸੇ ਵਿਅਕਤੀ ਦੀ ਜੈਵਿਕ ਉਮਰ ਉਸ ਦੀ ਅਸਲ ਉਮਰ ਨਾਲੋਂ ਘੱਟ ਜਾਂ ਵੱਧ ਵੀ ਹੋ ਸਕਦੀ ਹੈ।
ਥਿਓਬ੍ਰੋਮਾਈਨ ਅਤੇ ਉਮਰ ਦਾ ਸੰਬੰਧ
ਥਿਓਬ੍ਰੋਮਾਈਨ ਇੱਕ ਕੁਦਰਤੀ ਅਲਕਾਲਾਇਡ ਹੈ ਜੋ ਕੋਕੋ ਵਿੱਚ ਪਾਇਆ ਜਾਂਦਾ ਹੈ। 100 ਗ੍ਰਾਮ ਡਾਰਕ ਚਾਕਲੇਟ ਵਿੱਚ ਲਗਭਗ 200 ਤੋਂ 450 ਮਿਲੀਗ੍ਰਾਮ ਤੱਕ ਥਿਓਬ੍ਰੋਮਾਈਨ ਹੁੰਦਾ ਹੈ। ਇਹ ਤੱਤ ਸੈੱਲਾਂ ਦੀ ਸੁਰੱਖਿਆ ਕਰਨ, ਸੋਜ ਘਟਾਉਣ ਅਤੇ ਖੂਨ ਦੇ ਪ੍ਰਵਾਹ ਨੂੰ ਸੁਧਾਰਨ ਵਿੱਚ ਮਦਦਗਾਰ ਮੰਨਿਆ ਜਾਂਦਾ ਹੈ। ਵਿਗਿਆਨੀਆਂ ਅਨੁਸਾਰ, ਇਹ ਟੈਲੋਮੀਅਰ ਨੂੰ ਜਲਦੀ ਛੋਟਾ ਹੋਣ ਤੋਂ ਰੋਕ ਸਕਦਾ ਹੈ। ਟੈਲੋਮੀਅਰ ਦੇ ਛੋਟੇ ਹੋਣ ਨੂੰ ਬੁੱਢਾਪੇ ਅਤੇ ਕਈ ਬਿਮਾਰੀਆਂ ਨਾਲ ਜੋੜਿਆ ਜਾਂਦਾ ਹੈ।
ਉਮਰ ਮਾਪਣ ਦੇ ਦੋ ਤਰੀਕੇ
ਇਸ ਅਧਿਐਨ ਵਿੱਚ ਜੈਵਿਕ ਉਮਰ ਮਾਪਣ ਲਈ ਦੋ ਵਿਗਿਆਨਕ ਤਰੀਕੇ ਵਰਤੇ ਗਏ। ਪਹਿਲਾ, ਡੀਐਨਏ ਵਿੱਚ ਹੋਣ ਵਾਲੇ ਰਸਾਇਣਕ ਬਦਲਾਵਾਂ ਦੀ ਜਾਂਚ, ਜਿਸ ਨਾਲ ਇਹ ਪਤਾ ਲੱਗਦਾ ਹੈ ਕਿ ਸਰੀਰ ਕਿੰਨੀ ਤੇਜ਼ੀ ਨਾਲ ਬੁੱਢਾ ਹੋ ਰਿਹਾ ਹੈ। ਦੂਜਾ, ਟੈਲੋਮੀਅਰ ਦੀ ਲੰਬਾਈ ਮਾਪੀ ਗਈ। ਜਿਨ੍ਹਾਂ ਲੋਕਾਂ ਵਿੱਚ ਥਿਓਬ੍ਰੋਮਾਈਨ ਵੱਧ ਸੀ, ਉਨ੍ਹਾਂ ਦੇ ਟੈਲੋਮੀਅਰ ਵੀ ਲੰਬੇ ਪਾਏ ਗਏ।
ਕੀ ਡਾਰਕ ਚਾਕਲੇਟ ਨੂੰ ਹੈਲਦੀ ਫੂਡ ਕਿਹਾ ਜਾ ਸਕਦਾ ਹੈ?
ਵਿਗਿਆਨੀ ਸਾਫ਼ ਕਰਦੇ ਹਨ ਕਿ ਇਸ ਖੋਜ ਦਾ ਮਤਲਬ ਇਹ ਨਹੀਂ ਕਿ ਡਾਰਕ ਚਾਕਲੇਟ ਨੂੰ ਵੱਧ ਮਾਤਰਾ ਵਿੱਚ ਖਾਣਾ ਸ਼ੁਰੂ ਕਰ ਦਿੱਤਾ ਜਾਵੇ। ਭਾਵੇਂ ਇਸਦੇ ਕੁਝ ਲਾਭ ਹੋ ਸਕਦੇ ਹਨ, ਪਰ ਡਾਰਕ ਚਾਕਲੇਟ ਵਿੱਚ ਮੌਜੂਦ ਖੰਡ ਅਤੇ ਚਰਬੀ (ਫੈਟ) ਇਸਦੇ ਫਾਇਦੇ ਘਟਾ ਸਕਦੇ ਹਨ। ਇਸ ਲਈ ਇਸਨੂੰ ਸਿਰਫ਼ ਇੱਕ ‘ਟ੍ਰੀਟ’ ਵਜੋਂ ਹੀ ਲੈਣਾ ਚਾਹੀਦਾ ਹੈ, ਨਾ ਕਿ ਪੂਰੀ ਤਰ੍ਹਾਂ ਸਿਹਤਮੰਦ ਖੁਰਾਕ ਸਮਝ ਕੇ। ਉਮਰ ਲੰਬੀ ਕਰਨ ਦੇ ਚੱਕਰ ਵਿੱਚ ਜ਼ਿਆਦਾ ਚਾਕਲੇਟ ਖਾਣਾ ਸਿਹਤ ਲਈ ਨੁਕਸਾਨਦਾਇਕ ਹੋ ਸਕਦਾ ਹੈ।
