23 ਦਸੰਬਰ, 2025 ਅਜ ਦੀ ਆਵਾਜ਼
Bollywood Desk: ਸੋਸ਼ਲ ਮੀਡੀਆ ਸਟਾਰ ਅਤੇ ਅਦਾਕਾਰਾ ਉਰਫ਼ੀ ਜਾਵੇਦ ਇੱਕ ਵਾਰ ਫਿਰ ਚਰਚਾ ਵਿੱਚ ਹੈ, ਪਰ ਇਸ ਵਾਰ ਕਾਰਨ ਉਸਦਾ ਲੁੱਕ ਜਾਂ ਬਿਆਨ ਨਹੀਂ, ਸਗੋਂ ਉਸ ਨਾਲ ਵਾਪਰੀ ਇੱਕ ਡਰਾਉਣੀ ਘਟਨਾ ਹੈ। ਅੱਧੀ ਰਾਤ ਨੂੰ ਦੋ ਵਿਅਕਤੀਆਂ ਵੱਲੋਂ ਕੀਤੀ ਗਈ ਹਰਾਸਮੈਂਟ ਤੋਂ ਬਾਅਦ ਉਰਫ਼ੀ ਨੂੰ ਪੁਲਿਸ ਸਟੇਸ਼ਨ ਜਾ ਕੇ NC (ਨਾਨ-ਕਾਗਨਿਜ਼ੇਬਲ) ਸ਼ਿਕਾਇਤ ਦਰਜ ਕਰਵਾਉਣੀ ਪਈ।
ਸਵੇਰੇ 5 ਵਜੇ ਪੁਲਿਸ ਥਾਣੇ ਕਿਉਂ ਪਹੁੰਚੀ ਉਰਫ਼ੀ?
ਉਰਫ਼ੀ ਜਾਵੇਦ ਨੇ ਆਪਣੇ ਅਧਿਕਾਰਕ ਇੰਸਟਾਗ੍ਰਾਮ ਅਕਾਊਂਟ ‘ਤੇ ਇੱਕ ਸਟੋਰੀ ਸਾਂਝੀ ਕਰਦਿਆਂ ਪੁਲਿਸ ਸਟੇਸ਼ਨ ਵਿੱਚ ਬੈਠੀ ਆਪਣੀ ਤਸਵੀਰ ਪੋਸਟ ਕੀਤੀ। ਉਸਨੇ ਲਿਖਿਆ,
“ਸਵੇਰੇ ਦੇ ਪੰਜ ਵੱਜ ਰਹੇ ਹਨ ਅਤੇ ਮੈਂ ਪੁਲਿਸ ਸਟੇਸ਼ਨ ਵਿੱਚ ਬੈਠੀ ਹਾਂ। ਇਹ ਮੇਰੀ ਜ਼ਿੰਦਗੀ ਦਾ ਸਭ ਤੋਂ ਡਰਾਉਣਾ ਤਜਰਬਾ ਸੀ। ਮੈਂ ਅਤੇ ਮੇਰੀਆਂ ਭੈਣਾਂ ਰਾਤ ਭਰ ਇਕ ਪਲ ਵੀ ਨਹੀਂ ਸੌਂ ਸਕੀਆਂ।”
ਕੀ ਸੀ ਪੂਰਾ ਮਾਮਲਾ?
ਰਿਪੋਰਟਾਂ ਮੁਤਾਬਕ, 22 ਦਸੰਬਰ ਦੀ ਰਾਤ ਕਰੀਬ 3:30 ਵਜੇ ਇੱਕ ਵਿਅਕਤੀ ਲਗਾਤਾਰ ਲਗਭਗ 10 ਮਿੰਟ ਤੱਕ ਉਰਫ਼ੀ ਦੇ ਘਰ ਦਾ ਦਰਵਾਜ਼ਾ ਖੜਕਾਉਂਦਾ ਰਿਹਾ। ਜਦੋਂ ਉਰਫ਼ੀ ਨੇ ਬਾਹਰ ਝਾਤੀ ਮਾਰੀ ਤਾਂ ਉਸਨੇ ਵੇਖਿਆ ਕਿ ਇੱਕ ਵਿਅਕਤੀ ਦਰਵਾਜ਼ੇ ਦੇ ਬਾਹਰ ਖੜ੍ਹਾ ਸੀ ਅਤੇ ਜ਼ਬਰਦਸਤੀ ਅੰਦਰ ਆਉਣ ਦੀ ਕੋਸ਼ਿਸ਼ ਕਰ ਰਿਹਾ ਸੀ, ਜਦਕਿ ਦੂਜਾ ਵਿਅਕਤੀ ਕੋਨੇ ਵਿੱਚ ਖੜ੍ਹਾ ਸੀ।
ਉਰਫ਼ੀ ਦੇ ਕਈ ਵਾਰ ਕਹਿਣ ਬਾਵਜੂਦ ਵੀ ਉਹ ਉੱਥੋਂ ਨਹੀਂ ਗਏ। ਜਦੋਂ ਉਸਨੇ ਪੁਲਿਸ ਨੂੰ ਕਾਲ ਕਰਨ ਦੀ ਚੇਤਾਵਨੀ ਦਿੱਤੀ, ਤਦੋਂ ਜਾ ਕੇ ਦੋਵੇਂ ਵਿਅਕਤੀ ਉੱਥੋਂ ਹਟੇ।
ਸਿਆਸੀ ਪਹੁੰਚ ਦੀ ਧਮਕੀ
ਉਰਫ਼ੀ ਨੇ ਦੱਸਿਆ ਕਿ ਦੋਵੇਂ ਵਿਅਕਤੀ ਉਸੇ ਬਿਲਡਿੰਗ ਦੀ 13ਵੀਂ ਮੰਜ਼ਿਲ ‘ਤੇ ਰਹਿੰਦੇ ਹਨ। ਉਨ੍ਹਾਂ ਵਿੱਚੋਂ ਇੱਕ ਨੇ ਆਪਣੇ ਸਿਆਸੀ ਸਬੰਧ ਹੋਣ ਦਾ ਦਾਅਵਾ ਕਰਦੇ ਹੋਏ ਕਿਹਾ ਕਿ ਉਹ ਜੋ ਮਰਜ਼ੀ ਕਰ ਸਕਦਾ ਹੈ। ਪੁਲਿਸ ਦੇ ਮੌਕੇ ‘ਤੇ ਪਹੁੰਚਣ ਮਗਰੋਂ ਵੀ ਉਹ ਵਿਅਕਤੀ ਬਦਤਮੀਜ਼ੀ ਕਰਦੇ ਰਹੇ।
ਉਰਫ਼ੀ ਨੇ ਇਹ ਵੀ ਖੁਲਾਸਾ ਕੀਤਾ ਕਿ ਉਨ੍ਹਾਂ ਨੂੰ ਸਕਿਉਰਿਟੀ ਗਾਰਡ ਨੂੰ ਕਹਿੰਦੇ ਸੁਣਿਆ ਗਿਆ ਕਿ CCTV ਫੁਟੇਜ ਡਿਲੀਟ ਕਰ ਦਿਓ, ਕਿਉਂਕਿ ਉਹ “ਸਿਆਸਤਦਾਨਾਂ ਨਾਲ ਜੁੜੇ ਹੋਏ ਹਨ।”
“ਇਹ ਬਹੁਤ ਡਰਾਉਣਾ ਅਨੁਭਵ ਸੀ”
ਉਰਫ਼ੀ ਜਾਵੇਦ ਨੇ ਕਿਹਾ ਕਿ ਜਦੋਂ ਕੋਈ ਅੱਧੀ ਰਾਤ ਨੂੰ ਤੁਹਾਡੇ ਘਰ ਆ ਕੇ ਦਰਵਾਜ਼ਾ ਖੋਲ੍ਹਣ ਲਈ ਮਜ਼ਬੂਰ ਕਰੇ ਅਤੇ ਜਾਣ ਤੋਂ ਇਨਕਾਰ ਕਰ ਦੇਵੇ, ਤਾਂ ਇਹ ਕਿਸੇ ਵੀ ਔਰਤ ਲਈ ਬਹੁਤ ਡਰਾਉਣਾ ਹੁੰਦਾ ਹੈ—ਖ਼ਾਸ ਕਰਕੇ ਜਦੋਂ ਉਹ ਇਕੱਲੀ ਰਹਿ ਰਹੀ ਹੋਵੇ।
ਅਦਾਕਾਰਾ ਨੇ ਕਿਹਾ ਕਿ ਉਹ ਆਪਣੇ ਆਪ ਨੂੰ ਸੁਰੱਖਿਅਤ ਮਹਿਸੂਸ ਨਹੀਂ ਕਰ ਰਹੀ, ਇਸ ਲਈ ਉਸਨੇ ਪੁਲਿਸ ਕੋਲ ਸ਼ਿਕਾਇਤ ਦਰਜ ਕਰਵਾ ਦਿੱਤੀ ਹੈ। ਹੁਣ ਦੇਖਣਾ ਇਹ ਹੋਵੇਗਾ ਕਿ ਪੁਲਿਸ ਇਸ ਮਾਮਲੇ ਵਿੱਚ ਅੱਗੇ ਕੀ ਕਾਰਵਾਈ ਕਰਦੀ ਹੈ।
