ਰਾਜਧਾਨੀ ਐਕਸਪ੍ਰੈਸ ਹਾਦਸਾ ਅਸਾਮ ਵਿੱਚ: ਹਾਥੀਆਂ ਨਾਲ ਟੱਕਰ

ਅਸਾਮ 20 Dec 2025 AJ DI Awaaj

National Desk : ਅਸਾਮ ਦੇ ਨਾਗਾਓਂ ਜ਼ਿਲ੍ਹੇ ਵਿੱਚ ਸ਼ਨੀਵਾਰ ਸਵੇਰੇ ਸੈਰੰਗ-ਨਵੀਂ ਦਿੱਲੀ ਰਾਜਧਾਨੀ ਐਕਸਪ੍ਰੈਸ (ਟ੍ਰੇਨ ਨੰਬਰ 20507 ਡਾਊਨ) ਹਾਥੀਆਂ ਦੇ ਇੱਕ ਝੁੰਡ ਨਾਲ ਟੱਕਰ ਖਾ ਗਈ। ਹਾਦਸੇ ਦੀ ਭਿਆਨਕਤਾ ਦੇ ਕਾਰਨ ਟ੍ਰੇਨ ਦਾ ਇੰਜਣ ਅਤੇ ਪੰਜ ਡੱਬੇ ਪਟੜੀ ਤੋਂ ਉਤਰ ਗਏ। ਇਸ ਟੱਕਰ ਵਿੱਚ ਸੱਤ ਹਾਥੀਆਂ ਦੀ ਮੌ*ਤ ਹੋ ਗਈ, ਜਦਕਿ ਇੱਕ ਬੱਚਾ ਹਾਥੀ ਨਾਲ ਟੱਕਰ ਵਿੱਚ ਗੰਭੀਰ ਰੂਪ ਵਿੱਚ ਜ਼ਖਮੀ ਹੋਇਆ। ਖ਼ੁਸ਼ਕਿਸਮਤੀ ਨਾਲ, ਟ੍ਰੇਨ ਵਿੱਚ ਯਾਤਰੀਆਂ ਨੂੰ ਕੋਈ ਨੁਕਸਾਨ ਨਹੀਂ ਪਹੁੰਚਿਆ।

ਘਟਨਾ ਲੁਮਡਿੰਗ ਡਿਵੀਜ਼ਨ ਦੇ ਜਮੁਨਾਮੁਖ-ਕਾਨਪੁਰ ਸੈਕਸ਼ਨ ‘ਤੇ ਸਵੇਰੇ 2:17 ਤੋਂ 2:23 ਵਜੇ ਦੇ ਵਿਚਕਾਰ ਵਾਪਰੀ। ਟ੍ਰੇਨ ਗੁਹਾਟੀ ਤੋਂ ਲਗਭਗ 126 ਕਿਲੋਮੀਟਰ ਦੂਰ ਸੀ। ਪਾਇਲਟ ਨੇ ਹਾਥੀਆਂ ਨੂੰ ਦੇਖ ਕੇ ਐਮਰਜੈਂਸੀ ਬ੍ਰੇਕ ਲਗਾਈ, ਪਰ ਘੱਟ ਦੂਰੀ ਅਤੇ ਤੇਜ਼ ਰਫ਼ਤਾਰ ਕਾਰਨ ਟੱਕਰ ਤੋਂ ਬਚਣਾ ਮੁਸ਼ਕਲ ਸੀ।

ਹਾਦਸੇ ਦੀ ਜਾਣਕਾਰੀ ਮਿਲਦੇ ਹੀ ਰਾਹਤ ਅਤੇ ਬਚਾਅ ਟੀਮ ਮੌਕੇ ‘ਤੇ ਪੁੱਜੀ। ਐਨਐਫ ਰੇਲਵੇ ਦੇ ਜਨਰਲ ਮੈਨੇਜਰ ਅਤੇ ਲੁਮਡਿੰਗ ਡਿਵੀਜ਼ਨ ਦੇ ਡੀਆਰਐਮ ਸਮੇਤ ਸੀਨੀਅਰ ਅਧਿਕਾਰੀ ਮੌਕੇ ‘ਤੇ ਪਹੁੰਚੇ ਅਤੇ ਬਚਾਅ ਕਾਰਜਾਂ ਦੀ ਨਿਗਰਾਨੀ ਕੀਤੀ। ਪ੍ਰਭਾਵਿਤ ਡੱਬਿਆਂ ਵਿੱਚ ਯਾਤਰੀਆਂ ਨੂੰ ਦੂਜੇ ਡੱਬਿਆਂ ਵਿੱਚ ਅਸਥਾਈ ਤੌਰ ‘ਤੇ ਬੈਠਾ ਦਿੱਤਾ ਗਿਆ। ਨੁਕਸਾਨੇ ਡੱਬਿਆਂ ਨੂੰ ਹਟਾਉਣ ਤੋਂ ਬਾਅਦ, ਰੇਲਗੱਡੀ ਗੁਹਾਟੀ ਵੱਲ ਰਵਾਨਾ ਹੋ ਗਈ।

ਰੇਲਵੇ ਅਧਿਕਾਰੀਆਂ ਨੇ ਦੱਸਿਆ ਕਿ ਹਾਦਸਾ ਰੇਲਵੇ ਦੇ ਨਿਰਧਾਰਤ ਹਾਥੀ ਕੋਰੀਡੋਰ ਵਿੱਚ ਨਹੀਂ ਆਇਆ, ਫਿਰ ਵੀ ਜੰਗਲੀ ਹਾਥੀਆਂ ਦੀ ਪਟੜੀਆਂ ‘ਤੇ ਮੌਜੂਦਗੀ ਚਿੰਤਾ ਦਾ ਵਿਸ਼ਾ ਹੈ। ਅਸਾਮ ਵਿੱਚ ਟਰੈਕ ਅਤੇ ਜੰਗਲ ਦੇ ਨੇੜੇ ਹੋਣ ਕਾਰਨ ਅਜਿਹੇ ਹਾਦਸੇ ਵਾਪਰਦੇ ਰਹਿੰਦੇ ਹਨ। ਰੇਲਵੇ ਅਤੇ ਜੰਗਲਾਤ ਵਿਭਾਗ ਮਿਲ ਕੇ ਇਨ੍ਹਾਂ ਹਾਦਸਿਆਂ ਨੂੰ ਰੋਕਣ ਲਈ ਕੰਮ ਕਰ ਰਹੇ ਹਨ।

ਮੌਕੇ ‘ਤੇ 5 ਡੱਬੇ ਪਟੜੀ ਤੋਂ ਉਤਰ ਗਏ, ਯਾਤਰੀ ਬੇਹਤ ਸੁਰੱਖਿਅਤ।