ਵਾਸ਼ਿੰਗਟਨ: 08 Nov 2025 AJ DI Awaaj
International Desk : ਅਮਰੀਕੀ ਸਰਕਾਰ ਨੇ ਇੱਕ ਨਵਾਂ ਵੀਜ਼ਾ ਨਿਯਮ ਲਾਗੂ ਕਰਨ ਦੀ ਤਿਆਰੀ ਕਰ ਲਈ ਹੈ, ਜਿਸ ਨੇ ਦੁਨੀਆ ਭਰ ਵਿੱਚ ਚਰਚਾ ਅਤੇ ਵਿਰੋਧ ਦੋਵੇਂ ਪੈਦਾ ਕਰ ਦਿੱਤੇ ਹਨ। ਨਵੇਂ ਨਿਰਦੇਸ਼ਾਂ ਅਨੁਸਾਰ, ਜਿਹੜੇ ਵਿਦੇਸ਼ੀ ਨਾਗਰਿਕ ਸ਼ੂਗਰ, ਦਿਲ ਦੀ ਬਿਮਾਰੀ, ਮੋਟਾਪੇ ਜਾਂ ਹੋਰ ਪੁਰਾਣੀਆਂ ਬਿਮਾਰੀਆਂ ਤੋਂ ਪੀੜਤ ਹਨ, ਉਨ੍ਹਾਂ ਨੂੰ ਹੁਣ ਅਮਰੀਕਾ ਦਾ ਵੀਜ਼ਾ ਜਾਂ ਗ੍ਰੀਨ ਕਾਰਡ ਮਿਲਣਾ ਮੁਸ਼ਕਲ ਹੋ ਸਕਦਾ ਹੈ।
ਅਮਰੀਕੀ ਵਿਦੇਸ਼ ਵਿਭਾਗ ਵੱਲੋਂ ਜਾਰੀ ਨਿਰਦੇਸ਼ਾਂ ਵਿੱਚ ਸਾਰੇ ਦੂਤਾਵਾਸਾਂ ਅਤੇ ਕੌਂਸਲੇਟਾਂ ਨੂੰ ਕਿਹਾ ਗਿਆ ਹੈ ਕਿ ਹੁਣ ਵੀਜ਼ਾ ਅਧਿਕਾਰੀ ਬਿਨੈਕਾਰ ਦੀ ਜਾਂਚ ਦੌਰਾਨ ਸਿਰਫ਼ ਛੂਤ ਦੀਆਂ ਬਿਮਾਰੀਆਂ ਹੀ ਨਹੀਂ, ਸਗੋਂ ਗੈਰ-ਸੰਚਾਰੀ ਬਿਮਾਰੀਆਂ (ਜਿਵੇਂ ਸ਼ੂਗਰ, ਦਿਲ ਦੀ ਬਿਮਾਰੀ, ਮੋਟਾਪਾ ਆਦਿ) ਨੂੰ ਵੀ ਧਿਆਨ ਵਿੱਚ ਰੱਖਣਗੇ।
ਨਵੀਂ ਹੈਲਥ ਚੈੱਕਲਿਸਟ ਵਿੱਚ ਸ਼ਾਮਲ ਬਿਮਾਰੀਆਂ ਵਿੱਚ —
- ਸ਼ੂਗਰ ਅਤੇ ਦਿਲ ਦੀਆਂ ਬਿਮਾਰੀਆਂ
- ਮੋਟਾਪਾ
- ਤੰਤੂ ਅਤੇ ਪਾਚਕ ਤਕਲੀਫ਼ਾਂ
- ਕੁਝ ਮਾਨਸਿਕ ਸਿਹਤ ਸਮੱਸਿਆਵਾਂ
ਦਸਤਾਵੇਜ਼ ਅਨੁਸਾਰ, ਇਹ ਬਿਮਾਰੀਆਂ ਲੰਬੇ ਸਮੇਂ ਦੇ ਇਲਾਜ ਦੀ ਮੰਗ ਕਰਦੀਆਂ ਹਨ, ਜਿਸ ‘ਤੇ ਲੱਖਾਂ ਡਾਲਰ ਤੱਕ ਦਾ ਖਰਚਾ ਆ ਸਕਦਾ ਹੈ। ਇਸ ਲਈ ਵੀਜ਼ਾ ਅਧਿਕਾਰੀ ਹੁਣ ਬਿਨੈਕਾਰਾਂ ਤੋਂ ਤਿੰਨ ਮੁੱਖ ਸਵਾਲ ਪੁੱਛਣਗੇ —
- ਕੀ ਉਨ੍ਹਾਂ ਜਾਂ ਉਨ੍ਹਾਂ ਦੇ ਪਰਿਵਾਰਕ ਮੈਂਬਰਾਂ ਨੂੰ ਕੋਈ ਮਹਿੰਗੀ ਜਾਂ ਲੰਬੇ ਸਮੇਂ ਵਾਲੀ ਬਿਮਾਰੀ ਹੈ?
- ਕੀ ਉਨ੍ਹਾਂ ਕੋਲ ਇਲਾਜ ਦਾ ਖਰਚਾ ਖੁਦ ਝੱਲਣ ਦੀ ਸਮਰੱਥਾ ਹੈ ਜਾਂ ਉਹ ਸਰਕਾਰੀ ਸਹਾਇਤਾ ‘ਤੇ ਨਿਰਭਰ ਹਨ?
- ਕੀ ਪਰਿਵਾਰ ਦੇ ਕਿਸੇ ਮੈਂਬਰ ਦੀ ਸਿਹਤ ਜਾਂ ਅਪਾਹਜਤਾ ਉਨ੍ਹਾਂ ਦੀ ਕਮਾਈ ‘ਤੇ ਅਸਰ ਪਾ ਸਕਦੀ ਹੈ?
ਇਹ ਨਿਯਮ ਤਕਨੀਕੀ ਤੌਰ ‘ਤੇ ਸਾਰੇ ਵੀਜ਼ਾ ਸ਼੍ਰੇਣੀਆਂ — ਸੈਲਾਨੀ, ਵਿਦਿਆਰਥੀ, ਕਾਰੋਬਾਰ ਅਤੇ ਇਮੀਗ੍ਰੇਸ਼ਨ — ‘ਤੇ ਲਾਗੂ ਹੁੰਦੇ ਹਨ, ਪਰ ਸਭ ਤੋਂ ਵੱਧ ਪ੍ਰਭਾਵ ਗ੍ਰੀਨ ਕਾਰਡ ਅਤੇ ਲੰਬੇ ਸਮੇਂ ਦੇ ਵੀਜ਼ਾ ਬਿਨੈਕਾਰਾਂ ‘ਤੇ ਪੈਣ ਦੀ ਸੰਭਾਵਨਾ ਹੈ। ਪਹਿਲਾਂ ਸਿਹਤ ਜਾਂਚ ਸਿਰਫ਼ ਛੂਤ ਦੀਆਂ ਬਿਮਾਰੀਆਂ ਲਈ ਹੁੰਦੀ ਸੀ, ਪਰ ਹੁਣ ਛੋਟੀਆਂ ਬਿਮਾਰੀਆਂ ਵੀ ਵੀਜ਼ਾ ਇਨਕਾਰ ਦਾ ਕਾਰਨ ਬਣ ਸਕਦੀਆਂ ਹਨ।
ਮਨੁੱਖੀ ਅਧਿਕਾਰ ਤੇ ਪ੍ਰਵਾਸੀ ਸੰਗਠਨਾਂ ਨੇ ਇਸ ਨੀਤੀ ਦੀ ਸਖ਼ਤ ਆਲੋਚਨਾ ਕੀਤੀ ਹੈ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਇਹ ਨਿਯਮ ਪੱਖਪਾਤੀ ਹੈ ਅਤੇ ਪੁਰਾਣੀਆਂ ਬਿਮਾਰੀਆਂ ਵਾਲੇ ਬਜ਼ੁਰਗਾਂ ਜਾਂ ਵਿਕਾਸਸ਼ੀਲ ਦੇਸ਼ਾਂ ਦੇ ਨਾਗਰਿਕਾਂ ਨੂੰ ਨੁਕਸਾਨ ਪਹੁੰਚਾ ਸਕਦਾ ਹੈ, ਜਿੱਥੇ ਸ਼ੂਗਰ ਤੇ ਦਿਲ ਦੀਆਂ ਬਿਮਾਰੀਆਂ ਆਮ ਹਨ।
ਆਲੋਚਕਾਂ ਅਨੁਸਾਰ, ਇਹ ਨਵਾਂ ਨਿਯਮ ਸਿਹਤ ਦੇ ਆਧਾਰ ‘ਤੇ ਇਮੀਗ੍ਰੇਸ਼ਨ ਸੀਮਾਵਾਂ ਕੜੀਆਂ ਕਰਨ ਦੀ ਕੋਸ਼ਿਸ਼ ਹੈ।
