India 24 July 2025 AJ Di Awaaj
National Desk : ਦਿਵਿਆ ਦੇਸ਼ਮੁਖ ਨੇ ਚੈਸ ਦੀ ਦੁਨੀਆ ਵਿੱਚ ਇੱਕ ਹੋਰ ਇਤਿਹਾਸਕ ਮੀਲ ਪੱਥਰ ਹਾਸਲ ਕਰ ਲਿਆ ਹੈ। ਉਹ ਫਿਡੇ ਵੂਮੈਂਜ਼ ਵਰਲਡ ਕੱਪ ਦੇ ਫਾਈਨਲ ਵਿੱਚ ਪਹੁੰਚਣ ਵਾਲੀ ਪਹਿਲੀ ਭਾਰਤੀ ਬਣ ਗਈ ਹੈ। ਉਨ੍ਹਾਂ ਨੇ 2017 ਦੀ ਵਿਸ਼ਵ ਚੈਂਪੀਅਨ ਚੀਨੀ ਖਿਡਾਰੀ ਝੋਂਗਯੀ ਤਾਨ ਨੂੰ ਸੈਮੀਫਾਈਨਲ ਵਿੱਚ 1.5-0.5 ਨਾਲ ਹਰਾਇਆ।
ਬੁੱਧਵਾਰ ਨੂੰ ਹੋਏ ਦੂਜੇ ਗੇਮ ਵਿੱਚ, ਦਿਵਿਆ ਨੇ ਸਫੈਦ ਮੋਹਰੇ ਨਾਲ ਖੇਡਦਿਆਂ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ ਅਤੇ ਅੰਤਮ ਗੇਮ ਵਿੱਚ ਤਾਨ ਦੀ ਵੱਡੀ ਗਲਤੀ ਦਾ ਲਾਭ ਚੁੱਕਦਿਆਂ ਇਤਿਹਾਸਕ ਜਿੱਤ ਦਰਜ ਕਰੀ। ਪਹਿਲੇ ਦਿਨ, ਦੋਹਾਂ ਵਿੱਚ ਖੇਡਿਆ ਗਿਆ ਮੁਕਾਬਲਾ ਡਰੌ ਰਿਹਾ ਸੀ ਜਿਸ ਵਿੱਚ ਦਿਵਿਆ ਨੇ ਕਿੰਗਸ ਗੈਂਬਿਟ ਡਿਕਲਾਈਨਡ ‘ਚ ਸੰਭਲ ਕੇ ਖੇਡਦਿਆਂ ਤਾਨ ਨੂੰ ਕੋਈ ਮੌਕਾ ਨਹੀਂ ਦਿੱਤਾ।
ਇਸ ਜਿੱਤ ਨਾਲ ਦਿਵਿਆ ਨਾ ਸਿਰਫ ਫਾਈਨਲ ‘ਚ ਪਹੁੰਚੀ ਹੈ, ਸਗੋਂ ਉਹ ਅਗਲੇ ਫਿਡੇ ਵੂਮੈਂਜ਼ ਕੈਂਡੀਡੇਟ ਟੂਰਨਾਮੈਂਟ ਲਈ ਵੀ ਕਵਾਲੀਫਾਈ ਕਰ ਗਈ ਹੈ।
ਹੁੰਪੀ ਟਾਈਬ੍ਰੇਕ ਵਿਚ ਲੈ ਗਈ ਮੈਚ, ਅਜੇ ਵੀ ਫਾਈਨਲ ਦੀ ਦੌੜ ਵਿਚ
ਦੂਜੇ ਸੈਮੀਫਾਈਨਲ ਵਿਚ ਭਾਰਤ ਦੀ ਹੋਰ ਸਿਟਾਰਾ ਖਿਡਾਰੀ ਕੋਨੇਰੂ ਹੁੰਪੀ ਨੇ ਚੀਨ ਦੀ ਜੀਐੱਮ ਲੇਈ ਟਿੰਗਜੀ ਨਾਲ ਇੱਕ ਹੋਰ ਡਰੌ ਖੇਡਿਆ। ਦੋਨੋਂ ਗੇਮਾਂ 1-1 ‘ਤੇ ਸਮਾਪਤ ਹੋਣ ਕਾਰਨ ਹੁਣ ਮੈਚ ਟਾਈਬ੍ਰੇਕ ਵਿੱਚ ਜਾਵੇਗਾ, ਜੋ ਵੀਰਵਾਰ ਨੂੰ ਖੇਡਿਆ ਜਾਵੇਗਾ।
ਹੁੰਪੀ ਨੇ ਅੰਤਮ ਦੌਰ ਵਿੱਚ ਵੱਡੀ ਬਢਤ ਹਾਸਲ ਕਰ ਲਈ ਸੀ ਪਰ ਉਸ ਨੂੰ ਕਾਇਮ ਨਹੀਂ ਰੱਖ ਸਕੀ ਅਤੇ ਖੇਡ ਡਰੌ ‘ਚ ਖਤਮ ਹੋਈ।
ਦਿਵਿਆ ਦੇਸ਼ਮੁਖ ਦਾ ਕਰੀਅਰ ਕਿਵੇਂ ਰਿਹਾ ਹੈ?
2021 ਵਿੱਚ ਦਿਵਿਆ ਭਾਰਤ ਦੀ 21ਵੀਂ ਵੁਮੈਨ ਗ੍ਰਾਂਡਮਾਸਟਰ ਬਣੀ। 2022 ਵਿੱਚ ਉਨ੍ਹਾਂ ਨੇ ਨੈਸ਼ਨਲ ਵੁਮੈਨਜ਼ ਚੈਸ ਚੈਂਪੀਅਨਸ਼ਿਪ ਜਿੱਤੀ ਅਤੇ ਚੈਸ ਓਲੰਪਿਆਡ ‘ਚ ਕਾਂਸੀ ਦਾ ਤਮਗਾ ਜਿੱਤਿਆ। 2020 ਦੀ ਫਿਡੇ ਓਨਲਾਈਨ ਓਲੰਪਿਆਡ ‘ਚ ਭਾਰਤ ਨੂੰ ਸੋਨਾ ਜਿਤਵਾਉਣ ਵਿੱਚ ਵੀ ਉਨ੍ਹਾਂ ਦਾ ਯੋਗਦਾਨ ਰਿਹਾ।
2023 ‘ਚ ਉਨ੍ਹਾਂ ਨੇ ਅਲਮਾਟੀ ਵਿੱਚ ਏਸ਼ੀਅਨ ਵੁਮੈਨਜ਼ ਚੈਸ ਚੈਂਪੀਅਨਸ਼ਿਪ ਜਿੱਤੀ ਅਤੇ ਟਾਟਾ ਸਟੀਲ ਇੰਡੀਆ ਰੈਪਿਡ ਟੂਰਨਾਮੈਂਟ ਵਿੱਚ ਵੀ ਸ਼ਾਨਦਾਰ ਜਿੱਤ ਦਰਜ ਕੀਤੀ। ਮਈ 2024 ਵਿੱਚ ਉਨ੍ਹਾਂ ਨੇ ਸ਼ਾਰਜਾਹ ਚੈਲੇਂਜਰਜ਼ ਜਿੱਤੇ ਅਤੇ ਫਿਰ ਜੂਨ ਵਿੱਚ ਫਿਡੇ ਵਿਸ਼ਵ U20 ਲੜਕੀਆਂ ਦੀ ਚੈਂਪੀਅਨਸ਼ਿਪ ਜਿੱਤੀ, ਇਹ ਟਾਈਟਲ ਜਿੱਤਣ ਵਾਲੀ ਕੇਵਲ ਚੌਥੀ ਭਾਰਤੀ ਬਣੀ। ਉਨ੍ਹਾਂ ਨੇ 11 ‘ਚੋਂ 10 ਅੰਕ ਪ੍ਰਾਪਤ ਕੀਤੇ।
2025 ਦੀ ਵਰਲਡ ਰੈਪਿਡ ਅਤੇ ਬਲਿਟਜ਼ ਟੀਮ ਚੈਸ ਚੈਂਪੀਅਨਸ਼ਿਪ (ਲੰਡਨ) ‘ਚ ਦਿਵਿਆ ਨੇ ਹੇਕਸਾਮਾਈਂਡ ਚੈਸ ਕਲੱਬ ਲਈ ਖੇਡਦਿਆਂ ਰੈਪਿਡ ਟੀਮ ‘ਚ ਚਾਂਦੀ ਅਤੇ ਬਲਿਟਜ਼ ਟੀਮ ‘ਚ ਕਾਂਸੀ ਹਾਸਲ ਕੀਤਾ। ਬਲਿਟਜ਼ ਦੇ ਸੈਮੀਫਾਈਨਲ ਵਿਚ ਉਨ੍ਹਾਂ ਨੇ ਵਿਸ਼ਵ ਨੰਬਰ 1 ਹੋਉ ਯੀਫਾਨ ਨੂੰ 74 ਚਾਲਾਂ ਵਾਲੇ ਰੋਮਾਂਚਕ ਮੁਕਾਬਲੇ ਵਿਚ ਹਰਾਇਆ।
ਦਿਵਿਆ ਦੀ ਇਹ ਜਿੱਤ ਸਿਰਫ਼ ਇਕ ਵਿਅਕਤੀਗਤ ਕਾਮਯਾਬੀ ਨਹੀਂ, ਸਗੋਂ ਭਾਰਤੀ ਚੈਸ ਲਈ ਇੱਕ ਨਵਾਂ ਦੌਰ ਸ਼ੁਰੂ ਕਰਨ ਵਾਲੀ ਮੀਲ ਪੱਥਰ ਹੈ।
