29 ਅਕਤੂਬਰ 2025 ਅਜ ਦੀ ਆਵਾਜ਼
Haryana Desk: ਯਮੁਨਾਨਗਰ ਦੇ ਬਾਡੀ ਮਾਜਰਾ ਵਿਖੇ ਮੰਗਲਵਾਰ ਸ਼ਾਮ ਨੂੰ ਵੱਡਾ ਹਾਦਸਾ ਹੋਣ ਤੋਂ ਬਚ ਗਿਆ। ਪੱਛਮੀ ਯਮੁਨਾ ਦਰਿਆ ‘ਤੇ ਲਗਭਗ 100 ਸਾਲ ਪੁਰਾਣਾ ਪੁਲ ਅਚਾਨਕ ਢਹਿ ਕੇ ਨਹਿਰ ਵਿੱਚ ਡਿੱਗ ਗਿਆ। ਖੁਸ਼ਕਿਸਮਤੀ ਨਾਲ ਉਸ ਵੇਲੇ ਪੁਲ ‘ਤੇ ਕੋਈ ਵਾਹਨ ਜਾਂ ਵਿਅਕਤੀ ਮੌਜੂਦ ਨਹੀਂ ਸੀ। ਜਾਣਕਾਰੀ ਅਨੁਸਾਰ ਸਿੰਚਾਈ ਵਿਭਾਗ ਨੇ ਇਸ ਪੁਲ ਨੂੰ ਤਿੰਨ ਸਾਲ ਪਹਿਲਾਂ ਹੀ ‘ਕੰਡਮ’ ਘੋਸ਼ਿਤ ਕਰ ਦਿੱਤਾ ਸੀ, ਪਰ ਇਸ ਦੇ ਬਾਵਜੂਦ ਲੋਕ ਇਸ ਰਾਹ ਤੋਂ ਲੰਘ ਰਹੇ ਸਨ।
ਛੱਠ ਪੂਜਾ ਦੇ ਮੌਕੇ ‘ਤੇ ਸੋਮਵਾਰ ਅਤੇ ਮੰਗਲਵਾਰ ਨੂੰ ਹਜ਼ਾਰਾਂ ਭਗਤ ਇਸੇ ਪੁਲ ਰਾਹੀਂ ਗੁਜ਼ਰੇ ਸਨ। ਮੇਅਰ ਸੁਮਨ ਬਹਮਨੀ, ਮੰਡਲ ਪ੍ਰਧਾਨ ਸ਼ੁਭਮ ਰਾਣਾ ਅਤੇ ਹੋਰ ਅਧਿਕਾਰੀ ਵੀ ਹਾਲ ਹੀ ਵਿੱਚ ਇਸ ਪੁਲ ਤੋਂ ਲੰਘੇ ਸਨ। ਚੰਗੀ ਗੱਲ ਇਹ ਰਹੀ ਕਿ ਪੁਲ ਭੀੜ ਦੌਰਾਨ ਨਹੀਂ ਢਹਿਆ। ਵਿਭਾਗ ਨੇ ਮੰਗਲਵਾਰ ਦੁਪਹਿਰ ਪੁਲ ਦੇ ਦੋਵੇਂ ਪਾਸਿਆਂ ‘ਤੇ ਮਿੱਟੀ ਪਾ ਕੇ ਰਾਹ ਬੰਦ ਕੀਤਾ, ਪਰ ਚੇਤਾਵਨੀ ਬੋਰਡ ਨਹੀਂ ਲਗਾਇਆ ਗਿਆ ਸੀ।
ਅਧਿਕਾਰੀਆਂ ਨੇ ਦੱਸਿਆ ਕਿ ਨਵੇਂ ਪੁਲ ਦੇ ਨਿਰਮਾਣ (8 ਕਰੋੜ ਰੁਪਏ ਦੀ ਲਾਗਤ ਨਾਲ) ਤੋਂ ਬਾਅਦ ਪੁਰਾਣੇ ਪੁਲ ਨੂੰ ਬੇਕਾਰ ਐਲਾਨਿਆ ਗਿਆ ਸੀ। ਬਾਡੀ ਮਾਜਰਾ, ਤੀਰਥ ਨਗਰ, ਪਾਂਸਰਾ ਤੇ ਤਾਜਕਪੁਰ ਵਰਗੇ ਕਈ ਪਿੰਡਾਂ ਦੇ ਲੋਕ ਇਸੇ ਪੁਲ ਦਾ ਇਸਤੇਮਾਲ ਕਰਦੇ ਸਨ। ਸ਼ਾਮ ਕਰੀਬ ਸਵਾ ਚਾਰ ਵਜੇ ਪੁਲ ਦਾ ਵਿਚਕਾਰਲਾ ਹਿੱਸਾ ਜ਼ੋਰਦਾਰ ਧਮਾਕੇ ਨਾਲ ਨਹਿਰ ਵਿੱਚ ਡਿੱਗ ਗਿਆ। ਅੱਖੀਂ ਦੇਖੇ ਗਵਾਹਾਂ ਨੇ ਦੱਸਿਆ ਕਿ ਉਸ ਵੇਲੇ ਪੁਲ ਖਾਲੀ ਸੀ।
ਤੀਰਥ ਨਗਰ ਦੇ ਗੋਤਾਖੋਰ ਰਾਜੀਵ ਨੇ ਦੱਸਿਆ ਕਿ ਨਹਿਰ ਦੇ ਮੁੜ ਨਿਰਮਾਣ ਦੌਰਾਨ ਪੁਲ ਦੀਆਂ ਸਲੈਬਾਂ ਵਿੱਚ ਦਰਾਰਾਂ ਪੈ ਗਈਆਂ ਸਨ। ਉਸ ਨੇ ਮੰਗਲਵਾਰ ਸਵੇਰੇ ਹੀ ਇਸ ਦੀ ਸੂਚਨਾ ਪੁਲਿਸ ਨੂੰ ਦਿੱਤੀ ਸੀ। ਸ਼ਾਮ ਨੂੰ ਅਚਾਨਕ ਪੁਲ ਦਾ ਵਿਚਕਾਰਲਾ ਹਿੱਸਾ ਢਹਿ ਗਿਆ ਤੇ ਧਮਾਕੇ ਦੀ ਆਵਾਜ਼ ਬਮ ਵਰਗੀ ਸੀ।
ਸਿੰਚਾਈ ਵਿਭਾਗ ਦੇ ਐਸ.ਈ. ਆਰ.ਐਸ. ਮਿੱਤਲ ਨੇ ਕਿਹਾ ਕਿ ਪੁਲ ਪਹਿਲਾਂ ਹੀ ਕੰਡਮ ਐਲਾਨਿਆ ਗਿਆ ਸੀ ਤੇ ਸਵੇਰੇ ਹੀ ਰਾਹ ਬੰਦ ਕੀਤਾ ਗਿਆ ਸੀ। ਵਿਭਾਗ ਦਾ ਇਰਾਦਾ ਜਲਦੀ ਹੀ ਪੁਰਾਣਾ ਪੁਲ ਤੋੜਣ ਦਾ ਸੀ। ਹੁਣ ਉੱਥੇ ਨਵਾਂ ਪੁਲ ਤਿਆਰ ਹੈ ਤੇ ਪੁਰਾਣੇ ਪੁਲ ਦੀ ਵਰਤੋਂ ਨਹੀਂ ਕੀਤੀ ਜਾ ਰਹੀ ਸੀ।
