ਅੱਜ ਦੀ ਆਵਾਜ਼ | 16 ਅਪ੍ਰੈਲ 2025
ਮਨੇਸਰ ‘ਚ ਸਾਈਬਰ ਪੁਲਿਸ ਦੇ ਏਐਸਆਈ ਨੇ ਘਰ ਵਿੱਚ ਕੀਤੀ ਖੁਦ*ਕੁਸ਼ੀ, ਪਤਨੀ ਨੇ ਦੋਸ਼ ਲਾਇਆ – ਸਬ-ਇਨਸਪੈਕਟਰ ਦੀਆਂ ਕਾਲਾਂ ਕਾਰਨ ਸੀ ਤੰਗ
ਮਨੇਸਰ ‘ਚ ਸਾਈਬਰ ਪੁਲਿਸ ਸਟੇਸ਼ਨ ‘ਚ ਤਾਇਨਾਤ ਅਸਿਸਟੈਂਟ ਸਬ-ਇਨਸਪੈਕਟਰ (ਏਐਸਆਈ) ਸ਼੍ਰੀ ਭਗਵਾਨ ਨੇ ਆਪਣੇ ਘਰ ‘ਚ ਖੁਦ*ਕੁਸ਼ੀ ਕਰ ਲਈ। ਮ੍ਰਿ*ਤਕ ਦੀ ਪਤਨੀ ਸਪਨਾ ਨੇ ਦੋਸ਼ ਲਾਇਆ ਕਿ ਉਸਦੇ ਪਤੀ ਨੂੰ ਗੁਰੂਗ੍ਰਾਮ ਵਿਖੇ ਤਾਇਨਾਤ ਇੱਕ ਮਹਿਲਾ ਸਬ-ਇਨਸਪੈਕਟਰ ਵੱਲੋਂ ਬਾਰ-ਬਾਰ ਕਾਲ ਕਰਕੇ ਤੰਗ ਕੀਤਾ ਜਾਂਦਾ ਸੀ, ਜਿਸ ਕਰਕੇ ਉਹ ਮਾਨਸਿਕ ਤੌਰ ‘ਤੇ ਬਹੁਤ ਪ੍ਰਭਾਵਿਤ ਹੋ ਗਿਆ ਸੀ। ਸਪਨਾ ਨੇ ਪੁਲਿਸ ਨੂੰ ਦੱਸਿਆ ਕਿ 7 ਅਪ੍ਰੈਲ 2025 ਨੂੰ ਡਿਊਟੀ ਦੌਰਾਨ ਸ਼੍ਰੀ ਭਗਵਾਨ ਨਾਲ ਇਕ ਘਟਨਾ ਵਾਪਰੀ ਸੀ, ਜਿਸ ਤੋਂ ਬਾਅਦ ਡਾਕਟਰ ਨੇ ਉਸਨੂੰ ਅਰਾਮ ਕਰਨ ਦੀ ਸਲਾਹ ਦਿੱਤੀ ਸੀ। 15 ਅਪ੍ਰੈਲ ਨੂੰ ਜਦ ਉਹ ਡਿਊਟੀ ‘ਤੇ ਗਈ ਹੋਈ ਸੀ, ਘਰ ਪਰਤਣ ‘ਤੇ ਉਸਨੇ ਦੇਖਿਆ ਕਿ ਪਤੀ ਨੇ ਆਪਣੇ ਆਪ ਨੂੰ ਲਟਕਾ ਕੇ ਖੁਦਕੁਸ਼ੀ ਕਰ ਲਈ। ਘਰ ‘ਚ ਇਕੱਤਰ ਹੋਏ ਲੋਕਾਂ ਨੇ ਵੀ ਇਸ ਦੀ ਪੁਸ਼ਟੀ ਕੀਤੀ।
ਮੌਕੇ ਤੋਂ ਪੁਲਿਸ ਨੇ ਤਿੰਨ ਸਫ਼ਿਆਂ ਦਾ ਆਤਮਘਾਤੀ ਨੋਟ, ਇਕ ਪੈਨ, ਵਨਪਲਸ ਕੰਪਨੀ ਦਾ ਮੋਬਾਈਲ ਅਤੇ ਇਕ ਡਾਇਰੀ ਬਰਾਮਦ ਕੀਤੀ ਹੈ। ਇਨ੍ਹਾਂ ਸਾਰੀਆਂ ਵਸਤਾਂ ਨੂੰ ਸੀਲ ਕਰ ਲਿਆ ਗਿਆ ਹੈ। ਸਪਨਾ ਵੱਲੋਂ ਦਿੱਤੀ ਗਈ ਲਿਖਤੀ ਸ਼ਿਕਾਇਤ ‘ਤੇ ਪੁਲਿਸ ਨੇ ਐਫਆਈਆਰ ਦਰਜ ਕਰਕੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ। ਸਪਨਾ ਦਾ ਕਹਿਣਾ ਹੈ ਕਿ ਉਸ ਦੇ ਪਤੀ ਨੂੰ ਇੱਕ ਮਹਿਲਾ ਸਬ-ਇਨਸਪੈਕਟਰ ਵੱਲੋਂ ਬਾਰੰਬਾਰ ਤੰਗ ਕੀਤਾ ਜਾਂਦਾ ਸੀ ਅਤੇ ਉਹਨਾ ਫੋਨਾਂ ਤੋਂ ਪਰੇਸ਼ਾਨ ਹੋ ਕੇ ਹੀ ਉਸ ਨੇ ਇਹ ਕਦਮ ਚੁੱਕਿਆ। ਉਸ ਨੇ ਮੰਗ ਕੀਤੀ ਹੈ ਕਿ ਦੋਸ਼ੀ ਵਿਅਕਤੀ ਵਿਰੁੱਧ ਸਖ਼ਤ ਕਾਨੂੰਨੀ ਕਾਰਵਾਈ ਹੋਵੇ।
ਇਸ ਮਾਮਲੇ ਨੂੰ ਲੈ ਕੇ ਗੁਰੂਗ੍ਰਾਮ ਪੁਲਿਸ ਅਜੇ ਤਕ ਕੋਈ ਬਿਆਨ ਨਹੀਂ ਦੇ ਰਹੀ।
